2 Reyes 9 - Q'eqchi Bible

Naq laj Jehú kixaqab'aak cho'q awab'ej re Israel

¹ Laj Eliseo kixb'oq jun reheb' li propeet ut kixye re: “Kawresi aawib', k'am li jun meet chi aseeyt a'in ut ayu Ramot, sa' xteepal Galahad.

² Naq tatwulaq aran, tatxik rik'in laj Jehú, ralal laj Josafat, ralal laj Nimsí. Toxat-okaq sa' li na'ajej wan wi', taawisi sa' xyanqeb' li xkomon ut taak'am xjunes sa' junaq xtask' li ochoch.

³ Toja' naq taate li jun meet chi aseeyt, taahoy sa' xb'een xjolom ut taaye: «Jo'ka'in xye li Qaawa': Xatinxaqab' cho'q awab'ej re Israel». Chirix chik a'an taate li okeb'aal ut tat-eleliq chi maab'ar taaxaqab' aawib'”.

⁴ Koho li saaj propeet sa' li tenamit Ramot, sa' xteepal Galahad,

⁵ ut naq kiwulak aran, chunchuukeb' li xjolomileb' laj puub'. Kixye reheb': “Twaj xyeeb'al jun li esilal re li nataqlank arin”. “Ani qe laa'o?”, chan laj Jehú. Kichaq'ok li propeet: “Cho'q aawe laa'at, wa'chin”, chan.

⁶ Tikto laj Jehú kixaqliik ut ki'ok sa' li kab'l, ut li propeet kixhoy li aseeyt sa' xb'een xjolom ut kixye re: “Jo'ka'in xye li Qaawa', xYos laj Israel: «Tatinxaqab' cho'q awab'ej reheb' lintenamit Israel.

⁷ Taasach ruheb' li xjunkab'al laj Ajab li nataqlank sa' aab'een. Chi jo'kan tin'eeqajunq sa' xb'een lix Jesabel chirix xkamikeb' linpropeet ut chirix xkamikeb' chixjunileb' laj k'anjel chiwu.

⁸ Taa'oso'q chixjunil li xjunkab'al laj Ajab ut tinkamsiheb' chixjunileb' li xteelomal sa' xyanqeb' laj Israel, a' yaal ma aj muneb' malaj ut ink'a'.

⁹ Tinsach li xjunkab'al laj Ajab jo' kinb'aanu re li xjunkab'al laj Jerobohán, ralal laj Nebat, ut jo' li xjunkab'al laj Basá, ralal laj Ajías.

¹⁰ Ut lix Jesabel taatiwe'q xb'aaneb' li tz'i' sa' li k'aleb'aal re Jisrehel, chi maajun taamuquq re»”. Tikto kixte li okeb'aal ut ki'elelik.

¹¹ Ut naq laj Jehú koho wi' chik wankeb' wi' laj k'anjel chiru li awab'ej, eb' a'in ke'xpatz' re: “K'aru xk'ulmank? K'aru xk'ulunk wi' li kaan ru a'an?”, chankeb'. Kixye laj Jehú: “Laa'ex ak nekenaw ru li winq a'an ut chanru na'aatinak”.

¹² Ke'xsume: “Maak'a' naqanaw! Seeraq'i qe chixjunil li xye aawe!”, chankeb'. Toja' naq laj Jehú kixye reheb': “Xulxye a'in chi jo'ka'in: «Jo'ka'in xye li Qaawa': Tatinxaqab' cho'q awab'ej re Israel»”.

¹³ Tikto li junjunq kixseeb'a rib' chi xxokb'al ut xhelb'al li xb'aatal ut ke'xk'e cho'q xna'aj li roq sa' li pek ru. Chirix a'an ke'xyaab'asi li xukub' ut ke'xjap re chi xyeeb'al: “Laj Jehú a'an li awab'ej”, chankeb'.

Laj Jehú kixkamsi laj Jorán, awab'ej re Israel

^14-16 Laj Jorán ut chixjunileb' laj Israel yookeb' chi xkolb'al rix li tenamit Ramot, sa' xteepal Galahad, chiru laj Jasahel, awab'ej re Aram. Ab'an eb' laj Aram ke'xtiq' laj Jorán sa' li yalok, ut a'in kisutq'iik Jisrehel re taak'iraaq li xtiq'ilal. Laj Okosías, awab'ej re Judá, kirab'i resil li k'aru kik'ulmank ut koho chi rula'aninkil. Laj Jehú, ralal laj Josafat, ri laj Nimsí, kixk'uub' xkamsinkil laj Jorán. Jo'kan naq kixye reheb' li wankeb' rochb'een: “Wi relik chi yaal nekeraj naq laa'in tinwanq cho'q awab'ej, k'ehomaq reetal re naq maajun taa'elq sa' li tenamit Ramot re xyeeb'al resil reheb' laj Jisrehel”, chan. Chirix chik a'an kitaqe'k sa' li xb'eleb'aal ch'iich' ut koho Jisrehel.

¹⁷ Laj k'aak'alehom tenamit xaqxo chaq chi ilok toj sa' najt xteramil ochoch re Jisrehel. Ut naq kirileb' laj puub' re laj Jehú yookeb' chi nach'ok, kixye: “Yookin chi rilb'al jun teepeb' chi aj puub'”. Kixye laj Jorán: “Taqla junaq winq chirix kawaay re taaxik chi xk'ulb'aleb' ut tixpatz' reheb': «Ma xexchalk re tuqtuukilal?»”.

¹⁸ Koho jun li winq chirix kawaay chi xk'ulb'al laj Jehú ut kixye re: “Jo'ka'in xye chaq li awab'ej: «Ma xatchalk re tuqtuukilal?»”. Kichaq'ok laj Jehú: “K'aru taawaj wi' laa'at ma wank tuqtuukilal? K'e aawib' chiwix”, chan re. Toja' naq laj k'aak'alenel kixye: “Li taql xwulak rik'ineb', ab'an ink'a' xsutq'iik chaq”.

¹⁹ Tikto laj Jorán kixtaqla jun chik winq chirix kawaay li kiwulak rik'ineb' ut kixye: “Jo'ka'in xye chaq li awab'ej: «Ma xexchalk re tuqtuukilal?»”. Kichaq'ok laj Jehú: “K'aru taawaj wi' laa'at ma wank tuqtuukilal? K'e aawib' chiwix”, chan re.

²⁰ Kixye wi' chik laj k'aak'alenel: “Li taql xwulak rik'ineb', ab'an ink'a' xsutq'iik chaq. Li yo chaq chi b'eresink ch'iich' anaqwan a'an chanchan laj Jehú, li ralal laj Nimsí, xb'aan naq naxb'eresi li xb'eleb'aal ch'iich' sa' junpaat”.

²¹ Toja' naq laj Jorán kixye: “B'ak'omaq linb'eleb'aal ch'iich' rik'ineb' li kawaay”, chan. Ke'xb'ak' li xb'eleb'aal ch'iich'; ut laj Jorán, awab'ej re Israel, jo'wi' laj Okosías, awab'ej re Judá, li junjunq ki'ok sa' li xb'eleb'aal ch'iich', ke'elk chi xk'ulb'al laj Jehú ut koxe'xtaw sa' li xk'aleb'aal laj Nabot aj Jisrehel.

²² Naq laj Jorán kiril ru laj Jehú, kixpatz' re: “Ma re tuqtuukilal xatchalk, a Jehú?”, chan. Kichaq'ok laj Jehú: “K'aru chi tuqtuukilal taawanq naq lix Jesabel laana' toj yo chi xb'aanunkil li maa'usilal ink'a' nawulak chiru li Qaawa' ut k'ajo' chi tuulak?”, chan.

²³ Tikto laj Jorán kixsutq'isi li xb'eleb'aal ch'iich' ut ki'elelik chi japjo re chi xyeeb'al re laj Okosías: “Xooxb'alaq'i, a Okosías!”, chan.

²⁴ Ab'an laj Jehú kixyu' rix li xna' xsimaj ut kixkut li ral xsimaj chirix laj Jorán: a'an ki'ok ut koxpaynumi xch'ool, ut ak kamenaq chik laj Jorán naq kit'ane'k sa' li xb'eleb'aal ch'iich'.

²⁵ Toja' naq laj Jehú kixye re laj Bidkar, laj tenq' re: “Xok ut toxaakut sa' li xch'och' laj Nabot, aj Jisrehel. Laa'in jultik we: naq wotz yooko chi xik chirix laj Ajab li xyuwa', li Qaawa' kixteneb' li rahilal a'in sa' xb'een naq kixye:

²⁶ «Ewer xwil naq xe'kamsiik laj Nabot ut eb' li ralal xk'ajol. Relik chi yaal naq sa' ajwi' li na'ajej a'in tweeqaju li xkamikeb'. Raatin li Qaawa'». Jo'kan naq xok ut kut chaq sa' li xch'och' laj Nabot, jo' kixye li Qaawa'”.

Naq laj Jehú kixkamsi laj Okosías

²⁷ Naq laj Okosías, awab'ej re Judá, kiril li kik'ulmank, ki'elelik sa' xb'ehil Bet-Hagán. Ab'an laj Jehú kixchap raanil chirix ut kixye: “Kamsihomaq ajwi' a'an! Kutomaq chi simaj!”, chan. Ke'xkut ut ke'xtiq' sa' li xb'eleb'aal ch'iich' sa' li taqsink re Jur, nach' rik'in Iblehán. Ab'anan laj Okosías ki'elelik toj Mejido ut aran kikamk.

²⁸ Chirix chik a'an eb' laj k'anjel chiru ke'xk'am sa' li xb'eleb'aal ch'iich' toj Jerusalén ut ke'xmuq sa' xyanqeb' li xxe'toonil yuwa', aran sa' xtenamit laj David.

²⁹ Laj Okosías kixtikib' awab'ejink aran Judá naq ak junlajuhaq chihab' rokik laj Jorán, ralal laj Ajab, cho'q awab'ej.

Xkamik lix Jesabel

³⁰ Toja' naq laj Jehú kox'okaq sa' li tenamit Jisrehel. Ka'ajwi' kirab'i a'in lix Jesabel, kixb'aneb' li rix ru, kixt'e' li rismal ut ki'ilok sa' li b'entaan.

³¹ Ut naq laj Jehú ki'ok sa' li tenamit, kixye re: “Ma sa sa' laach'ool, a Simrí, aj kamsinelat re laj eechal aawe?”.

³² Laj Jehú kixtaqsi li rilob'aal sa' li b'entaan ut kixpatz': “Ani taa'okenq chiwix?”, chan. Wiib' oxib'eb' laj ilol ochoch ke'ilok wan wi' laj Jehú,

³³ ut a'an kixye reheb': “Kutomaq chaq taq'a li ixq a'an”. Ke'xkut chaq li ixq taq'a ut kirachok li xkik'el chiru li tz'ak ut chiruheb' li kawaay, ut kiyeq'iik xb'aaneb'.

³⁴ Chirix chik a'an laj Jehú ki'ok sa' li ochoch, kiwa'ak ki'uk'ak ut kixye: “Ilomaq chaq li reemaaru aj ixq a'an, ut muqumaq chaq, xb'aan naq a'an xrab'in li awab'ej”.

³⁵ Ab'an naq koheb' raj chi xmuqb'al, ka'aj chik ke'xtaw li xjolom, eb' li roq ut eb' li ruq'.

³⁶ Tikto ke'sutq'iik chi xyeeb'al resil re laj Jehú, ut a'an kixye: “Xtz'aqlok ru li kixye li Qaawa' chi xtz'uumal re laj Elías, aj Tisbé, laj k'anjel chiru: «Sa' xteepal Jisrehel taatiwe'q xtib'el lix Jesabel xb'aaneb' li tz'i'.

³⁷ Li xch'och'el xsululel taakanaaq jo' li k'ot cho'q xq'emal li ch'och', re naq maajun chiyehoq: A'an lix Jesabel»”.