Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Reyes 7 - Q'eqchi Bible

1 Laj Eliseo kixye re: “Ab'i li raatin li Qaawa'. Jo'ka'in naxye li Qaawa': «Wulaj sa' li honal a'in, sa' rokeb'aal Samaria teeloq' li chaab'il k'aj chi jun chi tumin plaat li jun aroow, ut li wiib' aroow chi seb'aad teeloq' ajwi' chi jun chi tumin plaat»”.

2 Kichaq'ok laj tenq' re li awab'ej: “Us ta raj li Qaawa' tixte chaq xb'entaanil li choxa, maajaruj taak'ulmanq li yookat chi xyeeb'al”, chan re li xtaql li Yos. Ab'an laj Eliseo kixye: “Relik chi yaal naq taawil rik'ineb' xsa' laawu, ab'an ink'a' taatzeka a'an”.

3 Chire rokeb'aal li tenamit wankeb' kaahib' chi winq saqlep rixeb', ut ke'xye chirib'ileb' rib': “K'aru naqab'aanu arin chi chunchu royb'eninkil qakamik?

4 Wi ta too'ok sa' li tenamit, tookamq xb'aan li we'ej yo aran; ut wi tookanaaq arin, yal tookamq ajwi'. Xaqliiqo b'i', ut q'axonqo sa' xyanqeb' laj puub' aj Aram. Wi aran te'xkuy qamaak, tooyo'yooq; wi ut toohe'xkamsi, tookamq”, chankeb'.

5 Naq ak ok re li q'oqyink, koheb' sa' xyanqeb' laj Aram. Ut naq ke'wulak nach' rik'in li xmuheb'aaleb', maa'ani chik wank aran.

6 A'in kik'ulmank xb'aan naq li Qaawa' kixk'e chi ab'iik, sa' li xmuheb'aaleb' laj Aram, xyaab'eb' li k'iila b'eleb'aal ch'iich' ut li k'iila kawaay, ut xyaab' xkuxeb' li k'iila aj puub'. Jo'kan naq ke'xye chirib'ileb' rib': “Li awab'ej re Israel xtojeb' li x'awab'ejeb' laj Hit ut li x'awab'ejeb' laj Ejiipt re chalk chi yalok qik'in”.

7 Ut naq ki'ok li q'oqyink, ke'elelik, ke'xkanab' li xmuheb'aaleb', li xkawaayeb' ut li xb'uureb', jo' ajwi' chixjunil li na'ajej chi maak'a' ke'xpoqle re, ut koheb' sa' aanil re xkolb'al rib'eb'.

8 Naq eb' li saqlep rixeb' ke'wulak rik'ineb' laj Aram, ke'ok sa' jun muheb'aal, ke'wa'ak ut ke'uk'ak. Chirix chik a'an ke'xxok li plaat ut li oor, jo'wi' jo'k'ihaleb' li aq'ej ke'xtaw, ut koxe'xmuq chaq. Ke'sutq'iik chaq ut ke'ok sa' jalan chik muheb'aal: aran ajwi' ke'xxok li k'a'aq ru ke'xtaw ut koxe'xmuq chaq.

9 Toja' naq ke'xye chirib'ileb' rib': “Moko us ta li yooko chi xb'aanunkil. Anaqwan xkutankil li sahil ch'oolej ut laa'o maak'a' naqaye. Wi naqoyb'eni naq toj tsaqewq, taateneb'aaq maak sa' qab'een. Yo'qeb' b'i' chi xyeeb'al li esil a'in sa' rochoch li awab'ej”.

10 Ke'elk sa' li na'ajej a'an ut naq ke'wulak sa' li rokeb'aal li tenamit, ke'xb'oqeb' laj k'aak'alenel ut ke'xye reheb': “Xoowulak sa' xmuheb'aaleb' laj Aram, ut aran maa'ani chik wank; chi moko xyaab' xkux junaq poyanam na'ab'imank. Ka'ajwi' eb' li kawaay ut eb' li b'uur b'ak'b'ookeb' xqataw aran, ut eb' li muheb'aal toj xaqxookeb' sa' li xna'ajeb'”.

11 Eb' laj k'aak'alehom re li okeb'aal ke'xjap re chi xyeeb'al li esil a'in ut koxnawmanq toj sa' rochoch li awab'ej.

12 Toja' naq kiwakliik li awab'ej chiru li q'oqyink ut kixye reheb' li xjolomileb' laj puub': “Tinch'olob' cheru li k'aru te'raj xb'aanunkil qe eb' laj Aram. Neke'xnaw naq kamk qe xb'aan li we'ej. Jo'kan naq xe'elk sa' li xmuheb'aaleb' ut xe'xmuq rib' sa' pim, yookeb' chi xk'oxlankil: «Naq too'elq laa'o sa' li tenamit, tqachapeb' chi yo'yo ut too'ok sa' li xtenamiteb'»”.

13 Ab'an jun reheb' li xjolomileb' laj puub' kixye: “Qataqlaheb' winq chirix oob' chi kawaay xkomoneb' li xe'kanaak, ut qilaq k'aru taak'ulmanq. Wi te'kamq malaj ut te'yo'yooq, juntaq'eet tqak'ul ajwi' laa'o aj Israel li xookanaak arin”.

14 Jo'kan naq ke'xchap wiib' li kawaay rochb'eeneb' li xb'eleb'aal ch'iich', ut ke'taqlaak xb'aan li awab'ej chirixeb' laj Aram: “Ayuqex ut toxeek'e chaq reetal k'aru taak'ulmanq”, chan li awab'ej reheb'.

15 Koheb' ut ke'xtaaqe li xnumseb' laj Aram toj chire li nima' Jordán. Sa' chixjunil li b'e nasoq'oxink eb' li aq'ej ut li k'a'aq re ru ke'xtz'eq eb' laj Aram sa' raanileb'. Chirix chik a'an eb' li xtaql li awab'ej ke'sutq'iik chaq ut kole'xseeraq'i re chixjunil.

16 Tikto eb' li poyanam ke'elk ut koxe'xyamtasi xsa' li xmuheb'aaleb' laj Aram. Li jun aroow chi chaab'il k'aj kik'ayimank chi junjunq chi tumin plaat ut li ka'kab' aroow chi seb'aad kitawmank ajwi' chi junjunq chi tumin plaat, jo' kixye li Qaawa'.

17 Li awab'ej kixxaqab' laj tenq' re chi rilb'al li okeb'aal, ab'anan kipitz'iik xb'aaneb' li poyanam ut kikamk, jo' yeeb'il chaq xb'aan li xtaql li Yos naq kiwulak li awab'ej rik'in.

18 Chixjunil kik'ulmank jo' kiyehe'k re li awab'ej xb'aan li xtaql li Yos: “Wulaj sa' ajwi' li honal a'in, sa' rokeb'aal Samaria, teeloq' li chaab'il k'aj chi jun chi tumin plaat li jun aroow, ut li wiib' aroow chi seb'aad teeloq' ajwi' chi jun chi tumin plaat”.

19 Xyehom ajwi' laj tenq' re li awab'ej: “Us ta raj li Qaawa' tixte chaq xb'entaanil li choxa, maajaruj taak'ulmanq li yookat chi xyeeb'al, at xtaql li Yos”. Ab'an laj Eliseo kixye re: “Relik chi yaal naq taawil rik'ineb' xsa' laawu, ab'an ink'a' taatzeka a'an”.

20 Ut relik chi yaal naq jo'kan kik'ulmank: kipitz'e'k xb'aaneb' li poyanam sa' rokeb'aal li tenamit ut kikamk.

Q'eqchi DC Bible © Bible Society in Guatemala, 2005.

Bible Society in Guatemala
ကြှနျုပျတို့နောကျလိုကျပါ:



ကြော်ငြာတွေ