2 Reyes 5 - Q'eqchi Bible

Xk'irajik laj Nahamán, li saqlep rix

¹ Laj Nahamán, xyuwa'ileb' laj puub' re li awab'ej re Aram, a'an jun li winq nawno ru chi us ut jwal raaro xb'aan li awab'ej, xb'aan naq sa' xk'ab'a' a'an li Qaawa' kixk'eheb' laj Aram chi numtaak sa' xb'eeneb' li xik' neke'ilok reheb'. Ab'anan li xnimal ru winq a'an yaj xb'aan li saqlepil.

² Sa' jun kutan eb' laj Aram ke'wulak chi yalok rik'ineb' laj Israel, ut ke'xk'am chaq chirixeb' jun ch'ina ixq aj Israel, li kox'okaq chi k'anjelak chiru li rixaqil laj Nahamán.

³ Li ixqa'al a'an kixye re laj eechal re: “Us raj naq linwa'chin taaxik chi xk'utb'al rib' chiru li propeet wank Samaria. Chi jo'kan taak'irtasiiq raj li xsaqlepil”.

⁴ Laj Nahamán koho rik'in li awab'ej ut kixye re chixjunil li yeeb'il chaq xb'aan li ixqa'al chalenaq sa' li tenamit Israel.

⁵ Ut li awab'ej re Aram kixsume: “Ayu, ut laa'in tintaqla junaq hu rik'in li awab'ej re Israel”, chan. Toja' naq koho laj Nahamán ut kixk'am lajeeb' xka'k'aal mil chi tumin plaat, waqib' mil chi tumin oor ut lajeeb' ak' aq'ej.

⁶ Kixk'am ajwi' li hu cho'q re li awab'ej re Israel. Sa' li hu naxye chi jo'ka'in: “Naq taak'ul li hu a'in, taanaw naq yookin chi xtaqlankil aawik'in laj Nahamán, laj k'anjel chiwu, re naq taak'irtasi chiru li xsaqlepil”.

⁷ Naq li awab'ej re Israel kiril xsa' li hu, kixq'ich li raq' ut kixye: “Ma laa'in tab'i' Yos chi kamsink ut chi k'ehok yu'am? Li awab'ej re Aram xtaqla chaq li winq a'in chink'irtasi li xsaqlepil. K'ehomaq reetal naq a'in yal yo xsik'b'al chanru naq taayaloq wik'in”.

⁸ Naq laj Eliseo, li xtaql li Yos, kirab'i naq li awab'ej re Israel kixq'ich li raq', kixtaqla xyeeb'al re: “K'a'ut naq xaq'ich laawaq'? Taqla chaq laj Nahamán wik'in ut taanaw naq wank jun propeet arin Israel”.

⁹ Jo'kan naq laj Nahamán kiwulak rochb'eeneb' li xkawaay ut li xb'eleb'aal ch'iich', ut koxxaqliiq chiru li rochoch laj Eliseo.

¹⁰ Ab'an laj Eliseo kixtaqla xyeeb'al re: “Ayu ut atin wuqub' sut sa' li nima' Jordán. Taayo'laaq chaq wi' chik laatib'el, ut ch'ajob'resinb'il tatkanaaq”.

¹¹ K'ajo' naq kijosq'o'k laj Nahamán, ut naq ki'elk aran, kixye: “Laa'in xink'oxla: Naq taa'elq chaq chink'ulb'al, taaxaqliiq, tixyaab'a xk'ab'a' li Qaawa' li xYos, tixb'iqb'iqi raj li ruq' chiru linrahilal ut xk'iraak raj linsaqlepil!

¹² Ma ink'a' tab'i' jwal chaab'ileb' chik li nima' Abaná ut Farfar li wankeb' Damaask, chiru chixjunileb' li nima' li wankeb' Israel? Xin'atink raj sa'eb' li nima' a'an ut xink'iraak raj”. Ut k'ajo' xjosq'il naq koho.

¹³ Toja' naq eb' laj k'anjel chiru ke'jilok chi xk'atq ut ke'xye re: “Wa'chin, wi ta li propeet xatxtaqla chi xb'aanunkil li q'axal ch'a'aj, ma ink'a' raj xab'aanu? Ma toja' ta chik naq yal xye aawe: «Ayu chi ch'ajok ut tatch'ajob'resiiq»”.

¹⁴ Jo'kan naq koho laj Nahamán sa' li nima' Jordán ut wuqub' sut ki'atink, jo' kiyehe'k re xb'aan li xtaql li Qaawa'. Ut li xtib'el kiq'unaak jo' xtib'el junaq ch'ina'al, ut ch'ajob'resinb'il chik kikanaak.

¹⁵ Toja' naq laj Nahamán ut chixjunileb' li rochb'een ke'sutq'iik wi' chik rik'in li xtaql li Yos. Ut naq kiwulak rik'in, laj Nahamán koxxaqliiq chiru laj Eliseo ut kixye re: “Anaqwan xink'e reetal naq maak'a' chik junaq Yos sa' chixjunil li ruuchich'och'. Ka'ajwi' arin Israel. K'ul b'i' li simaatan a'in naxk'e aawe laj k'anjel chawu”.

¹⁶ Ab'an laj Eliseo kixye: “Sa' xk'ab'a' li Qaawa' li nink'anjelak chiru, ninye aawe naq maak'a' tink'ul”. Ut us ta laj Nahamán kirelaji ru chi xk'ulb'al li xmaatan, ab'an laj Eliseo ink'a' kiraj.

¹⁷ Toja' naq laj Nahamán kixye: “Laa'at ink'a' xak'ul laamaatan. B'aanu usilal, si kach'inaq inch'och', riiqeb' wiib'aq chi muul sa' lintenamit, xb'aan naq ink'a' chik tinmayejaq chi moko tink'at inmayej chiruheb' li jalanil yos. Ka'ajwi' chiru li Qaawa' tinloq'oninq.

¹⁸ Ab'anan chixkuyaq taxaq inmaak li Qaawa' rik'in li tinb'aanu: naq li awab'ej aj eechal we taaxik chi loq'onink sa' rochoch li yos Rimón ut tinxchap re xwiq'ib'ankil rib', jo'kan naq tinwiq'laaq ajwi' laa'in. A' taxaq li Yos chikuyuq inmaak”.

¹⁹ Kichaq'ok laj Eliseo: “Ayu sa' tuqtuukilal”, chan. Laj Nahamán ki'elk aran ut toj maji' ajwi' nawulak chi najt,

²⁰ naq laj Kejasí, laj tenq' re li propeet Eliseo, kixye sa' xch'ool: “Laj Eliseo, linqaawa', xkanab' chi xik laj Nahamán aj Aram, chi ink'a' xk'ul li xsiik raj re. Sa' xk'ab'a' li Qaawa', tinxik chi junpaat ut tinchap waanil chirix: mare tixsi kach'inaq we”.

²¹ Ut laj Kejasí koho sa' aanil chirix laj Nahamán. Naq laj Nahamán kiril chi xik sa' aanil chirix, kikub'eek sa' li xb'eleb'aal ch'iich' chi xk'ulb'al ut kixpatz' re: “K'aru xk'ulmank?”, chan.

²² Kisumeek: “Maak'a' xk'ulmank, ab'anan laj eechal we xinxtaqla chaq chi xyeeb'al aawe naq wiib'eb' xtzolomeb' li propeet xe'chalk chaq sa' k'iche'b'aal xteepaleb' laj Efraín. B'aanu usilal, k'e reheb' oxib' mil li tumin plaat ut wiib'aqeb' sumal raq'eb'”.

²³ Kichaq'ok laj Nahamán: “B'aanu usilal, chak'ul waqib' mil chi tumin plaat”, chan. Ut kirelaji ru chi xk'ulb'al a'an, kixk'e sa' wiib' jelool rochb'een li wiib' sumal chi aq'ej ut kixq'axtesi reheb' wiib' aj k'anjel chiru re naq te'rochb'eeni laj Kejasí sa' xsutq'ijik.

²⁴ Naq laj Kejasí kiwulak Ofel, kixxok chixjunil li kik'ehe'k re ut koxmuq sa' li kab'l. Chirix chik a'an kixchaq'rab'iheb' laj k'anjel chiru laj Nahamán

²⁵ ut kox'okaq wan wi' laj eechal re: “B'ar xatchalk chaq, a Kejasí?”, chan laj Eliseo. Kichaq'ok laj Kejasí: “Maab'ar xinwulak, at inqaawa'”.

²⁶ Ab'an laj Eliseo kixye wi' chik re: “Ma ink'a' tab'i' aawochb'een linmusiq' naq jun li winq xkub'eek sa' li xb'eleb'aal ch'iich' re chalk chak'ulb'al? Ma xq'ehil anaqwan re k'uluk tumin ut re loq'ok aq'ej, awimq oliiw ut uub', karneer, b'ooyx ut aj k'anjeleb' winq ut ixq?

²⁷ Li xsaqlepil laj Nahamán tixletz rib' chawix ut chirixeb' laawalal aak'ajol chi junajwa”. Ut naq laj Kejasí ki'elk chiru laj Eliseo, nujenaq chi saqlep naq koho, jo' ratz'amke xsaqsaqil.