2 Reyes 22 - Q'eqchi Bible

Laj Josías, awab'ej re Judá

¹ Waqxaqib' chihab' wank re laj Josías naq kixtikib' awab'ejink, ut junlaju xka'k'aal chihab' kitaqlank aran Jerusalén. xYedidá xk'ab'a' li xna', xrab'in laj Adaías, Boskat xtenamit.

² Laj Josías kixb'aanu li nawulak chiru li Qaawa', ut tz'aqal kixtaaqe li xb'e laj David li xyuwa': kixpaab' li Yos chi tz'aqal re ru.

Kitawe'k li xhuhil li Chaq'rab'

³ Ak waqxaqlaju chihab' rokik chi awab'ejink laj Josías, naq li awab'ej kixtaqla laj Safán, aj tz'iib' chiru, ralal laj Asalías ut ri laj Mesulán, sa' rochoch li Qaawa'. Laj Josías kixye re laj Safán chi jo'ka'in:

⁴ “Ayu rik'in laj Jilkías, xb'eenil aj tij, ut ye re naq xb'isaq li tumin k'eeb'il xb'aaneb' li tenamit reheb' li neke'k'aak'alenk re li rokeb'aal li rochoch li Qaawa'.

⁵ Chiq'axtesimanq reheb' laj jolominel k'anjel, a'eb' laj ilol re li rochoch li Yos, ut rik'in a'an chitojmanq li yookeb' chi k'anjelak aran,

⁶ a'eb' laj peech', eb' laj kab'lanel ut eb' laj tz'ak, ut chik'anjelaq ajwi' re xloq'b'al li tz'alamche' ut eb' li pek aajel ru re xyiib'ankil li rochoch li Yos.

⁷ Ab'anan ink'a' chitz'ilmanq rix li tumin q'axtesinb'il reheb', xb'aan naq jwal tiikeb' xch'ool eb' laj k'anjel a'an”.

⁸ Naq kirab'i a'in, laj Jilkías, xb'eenil aj tij, kixye re laj Safán laj tz'iib': “Xintaw sa' rochoch li Qaawa' li xhuhil li Chaq'rab'”. Ut kixq'axtesi li hu re laj Safán, ut a'in kiril xsa'.

⁹ Chirix chik a'an laj Safán laj tz'iib' koho rik'in li awab'ej ut kixye re li k'aru kik'ulmank: “Eb' laj k'anjel chawu ak ke'xxok li tumin wank sa' rochoch li Qaawa' ut ke'xq'axtesi reheb' li neke'jolomink re li xyiib'ankil li loq'laj ochoch”, chan.

¹⁰ Kixye ajwi' re li awab'ej: “Laj Jilkías, li xb'eenil aj tij, xtaw li hu a'in”. Ut laj Safán kixyaab'asi xsa' li hu chiru li awab'ej.

¹¹ Naq li awab'ej kirab'i li tz'iib'anb'il sa' li hu, kixq'ich li raq'

¹² ut tikto kixye re laj Jilkías, xb'eenil aj tij, jo'wi' re laj Ajikán, ralal laj Safán, re laj Akbor, ralal laj Mikeas, re laj Safán aj tz'iib' ut re laj Asaías, laj k'anjel chiru li awab'ej:

¹³ “Ayuqex chi patz'ok rik'in li Qaawa' chiwix laa'in, chirix li tenamit ut sa' xk'ab'a' chixjunileb' laj Judá. Patz'omaq k'aru naraj xyeeb'al eb' li aatin tz'iib'anb'ileb' sa' li hu xtawmank. Nim li xjosq'il li Qaawa' sa' qab'een, xb'aan naq eb' li qaxe' qatoon ink'a' ke'xpaab' li aatin wank sa' li hu a'in chi moko ke'xb'aanu jo' tz'iib'anb'il arin”.

¹⁴ Toja' naq laj Jilkías, xb'eenil aj tij, laj Ajikán, laj Akbor, laj Safán ut laj Asaías koheb' rik'in lix Juldá, ixqipropeet, rixaqil laj Salún, ralal laj Tikbá ut ri laj Jarkás, aj k'uulahom re li raq'eb' laj tij. Lix Juldá wank rochoch Jerusalén, sa' li Ak' Na'ajej, ut naq eb' li xtaql li awab'ej ke'aatinak rik'in,

¹⁵ kixye reheb': “Jo'ka'in xye li Qaawa', xYos laj Israel: «Yehomaq re li winq li xtaqlank chaq eere

¹⁶ naq li Qaawa' xye chi jo'ka'in: Tintaqla chaq nimla rahilal sa' xb'een li na'ajej a'in ut sa' xb'eeneb' li wankeb' arin, jo' tz'iib'anb'il sa' li hu xyaab'asimank xsa' xb'aan li awab'ej re Judá,

¹⁷ xb'aan naq kine'xtz'eqtaana ut ke'ok chi k'atok pom chiruheb' jalan chik yos. Ke'xchiq' injosq'il rik'in chixjunil li k'aru ke'xyiib'. Jo'kan naq k'ajo' linjosq'il sa' xb'een li na'ajej a'in ut maajoq'e taach'anaaq.

¹⁸ Yehomaq re li awab'ej re Judá li xtaqlank chaq eere chi patz'ok rik'in li Qaawa': Jo'ka'in xye li Qaawa', xYos laj Israel: Laa'at xapaab' li waatin xawab'i

¹⁹ chirix li na'ajej a'in ut eb' li xpoyanamil li te'sache'q ru ut te'majewaaq. Xyot'e'k laach'ool, xakub'si laawankil chiru li Qaawa', xaq'ich laawaq' ut xatyaab'ak chiwu. Jo'kan naq laa'in xwab'i li k'aru xaye, chan li Qaawa'.

²⁰ Tatq'ajq tatsutq'iiq rik'ineb' laaxe'toonil yuwa' ut tatmuqe'q sa' tuqtuukilal sa' laamuqleb'aal. Ink'a' taawil chixjunil li nimla rahilal tintaqla chaq sa' xb'een li na'ajej a'in»”. Eb' li xtaql li awab'ej ke'xk'am li aatin a'in ut ke'xnumsi re.