2 Reyes 20 - Q'eqchi Bible

Xyajel ut xk'irajik laj Esekías

¹ Sa'eb' li kutan a'an kiyajerk laj Esekías. Naq kamk re, kiwulak laj Isaías, ralal laj Amós, chi xyeeb'al re: “Jo'ka'in xye li Qaawa': «Tusub' ru chixjunil xsa' laawochoch, xb'aan naq kamk aawe ut ink'a' chik tatk'iraaq»”.

² Toja' naq laj Esekías kixb'alq'usi rib' chi ilok chiru li tz'ak ut kitijok chi jo'ka'in:

³ “At Qaawa', jultikaq taxaq aawe naq xinwank chawu sa' chaab'ilal ut chi tiik ru linyu'am, ut xinb'aanu li nawulak chawu”. K'ajo' naq kiyot'e'k xch'ool laj Esekías chi yaab'ak.

⁴ Toj maji' ajwi' na'elk chiru neb'aal, naq ki'aatinaak laj Isaías xb'aan li Qaawa' chi jo'ka'in:

⁵ “Sutq'in ut ye re laj Esekías, li xjolomil lintenamit: «Jo'ka'in xye li Qaawa', xYos laj David laayuwa': Xwab'i laatij ut xwil li xya'al laawu. Tatink'irtasi, ut sa' rox li kutan tatxik sa' rochoch li Qaawa'.

⁶ O'laju chihab' chik tatyo'yooq sa' ruuchich'och'. Tatinkol laa'at jo'wi' Jerusalén sa' ruq' li awab'ej re Asiria ut sa' xk'ab'a' linloq'al ut xb'aan xraab'al laj David, laj k'anjel chiwu, tinmuheela li tenamit a'in»”.

⁷ Toja' naq laj Isaías kixye: “K'amomaq chaq junaq k'uluj yiib'anb'il rik'in iig”. Ke'xk'am chaq li k'uluj, ke'xk'e chiru li xsankil xox li awab'ej ut a'an kik'iraak.

⁸ Ut laj Esekías kixpatz' re laj Isaías: “K'aru tinnaw wi' naq xink'iraak ut sa' rox li kutan tinxik sa' rochoch li Qaawa'?”, chan.

⁹ Kichaq'ok laj Isaías ut kixye: “A'an a'in li reetalil tixk'e aawe li Qaawa' re naq taanaw naq tixb'aanu li kixye: Ma taawaj naq li xmu li saq'e taajiloq lajeeb'aq yokb' chi uub'ej malaj naq taasutq'iiq chirix lajeeb'aq yokb'?”.

¹⁰ Kixye laj Esekías: “Moko ch'a'aj naq taajiloq lajeeb'aq yokb' chi uub'ej, chiru naq taasutq'iiq lajeeb'aq yokb'”.

¹¹ Toja' naq li propeet Isaías kitijok chiru li Qaawa', ut A'an kixsutq'isi lajeeb' yokb' chi ixb'ej li xmu li saq'e, sa' li xb'isob'aal honal laj Ajás.

Laj Esekías kixk'uleb' li xtaql li awab'ej re Babilonia

¹² Sa'eb' li kutan a'an laj Merodak-Baladán, ralal laj Baladán, awab'ej re Babilonia, kirab'i resil naq kiyajerk laj Esekías; jo'kan naq kixtaqla jun xhu jo'wi' jun xmaatan.

¹³ K'ajo' naq kisaho'k xch'ool laj Esekías naq kixk'ul a'an, ut kixk'ut chiruheb' li xtaql laj Merodak chixjunil li xb'ihomal, li plaat ut li oor, li sununkil b'an ut chaab'il aseeyt, jo' ajwi' li k'a'aq re ru nak'anjelak re yalok, li jo'ch'inal jo'nimal wank sa'eb' li xk'uuleb'aal.

¹⁴ Toja' naq li propeet Isaías kiwulak rik'in laj Esekías, li awab'ej, ut kixpatz' re: “K'aru xe'xye aawe eb' li winq a'an ut b'ar xe'chalk chaq?”, chan. Kichaq'ok laj Esekías: “Xe'chalk chaq sa' jun najtil tenamit; toj Babilonia xe'chalk chaq”, chan re.

¹⁵ Laj Isaías kipatz'ok wi' chik re: “K'aruhatq xe'ril sa' laawochoch?”, chan. Kixye laj Esekías: “Xe'ril chixjunil li k'a'aq re ru wank sa' li wochoch; maak'a' chik k'aru ink'a' ta xink'ut chiruheb'”.

¹⁶ Ut laj Isaías kixye re laj Esekías: “Ab'i li aatin xye li Qaawa':

¹⁷ «Taawulaq xkutankil naq te'xk'am Babilonia chixjunil li k'a'aq re ru wank sa' laawochoch, li jo'ch'inal jo'nimal ke'xk'uula laamama' aawixa'an chalen toj anaqwan. Maak'a' chik taakanaaq arin, chan li Qaawa'.

¹⁸ Wankeb' aawalal, siyanb'ileb' aab'aan, te'k'ame'q ut te'k'ehe'q chi ilok re li rochoch li awab'ej re Babilonia»”.

¹⁹ Toja' naq laj Esekías kixye re laj Isaías: “Q'axal chaab'il li raatin li Qaawa' xaye we”. Kixye chi jo'kan xb'aan naq kixk'oxla sa' xch'ool: “A' yaal naq taawanq li tuqtuukilal ut li sahilal chiru linyu'am”, chan sa' xch'ool.

Xkamik laj Esekías

²⁰ Chixjunil li xyehom xb'aanuhom laj Esekías, chixjunil li yalok, li tamb'aha' kixyiib' ut li roqha' kiroksi wi' ha' li tenamit, tz'iib'anb'ileb' sa' xHuhil li xyehom ut xb'aanuhomeb' li awab'ej re Judá.

²¹ Naq laj Esekías kiq'ajk kisutq'iik rik'ineb' li xxe'toonil yuwa', a' chik laj Manasés, li ralal, kikanaak chi awab'ejink sa' xna'aj.