2 Reyes 16 - Q'eqchi Bible

Laj Ajás, awab'ej re Judá

¹ Ak wuqlaju chihab' rokik cho'q awab'ej laj Pékaj, ralal laj Romelías, kixtikib' awab'ejink laj Ajás, ralal laj Jotán, sa' xb'eeneb' laj Judá.

² Junmay chihab' wank re laj Ajás naq ki'ok cho'q awab'ej, ut waqlaju chihab' kitaqlank aran Jerusalén. Ab'an ink'a' kixb'aanu li nawulak chiru li Qaawa' li xYos, jo' kixb'aanu laj David li xyuwa';

³ kixb'aanu b'an jo' ke'xb'aanu eb' li awab'ej re Israel, ut kixq'axtesi li ralal chi k'ate'k, jo' li tz'i'b'eetalil neke'xb'aanu eb' li tenamit li ke'sache'k ru xb'aan li Qaawa' chiruheb' laj Israel.

⁴ Kimayejak ut kik'atok pom sa'eb' li tijob'aal sa' xjolomeb' li tzuul ut rub'elatq chixjunil li xninqal che'.

⁵ Toja' naq laj Resón, awab'ej re Aram, ut laj Pékaj, ralal laj Romelías, awab'ej re Israel, koheb' Jerusalén re yalok ut xsutb'al li tenamit, ab'anan ink'a' keruhank chi xq'axb'al ru laj Ajás.

⁶ Sa'eb' li kutan a'an laj Rasón, awab'ej re Aram, kireechani wi' chik li tenamit Elat cho'q re Aram. Kirisiheb' laj Judá li wankeb' aran Elat, ut a'eb' chik laj Edom ke'ok Elat chalen toj anaqwan.

⁷ Toja' naq laj Ajás kixtaqla xyeeb'al resil re laj Tiklat-Piléser, awab'ej re Asiria: “Laa'in aj k'anjel chawu ut chanchanin aawalal. Jo'kan naq kim ut cholinaakol chiru li awab'ej re Aram ut chiru li awab'ej re Israel, li xe'chalk chi yalok wik'in”.

⁸ Laj Ajás kixxok li plaat ut li oor wank sa' rochoch li Qaawa' ut li wank sa' xk'uuleb'aal li awab'ej, ut kixtaqla jo' maatan cho'q re li awab'ej re Asiria,

⁹ ut a'in kixb'aanu li kitz'aamaak chiru: koho chi yalok rik'in Damaask, kireechani li tenamit, kixk'ameb' li xpoyanamil toj sa' li tenamit Kir ut kixkamsi laj Resón.

¹⁰ Chirix chik a'an li awab'ej Ajás koho Damaask chi xtawb'al laj Tiklat-Piléser, awab'ej re Asiria, ut naq kiril li artal wank Damaask, kixtaqla reetalil li xyiib'ankil rik'in laj Urías laj tij, re naq tixyiib' junaq artal jo' tz'aqal a'an.

¹¹ Laj Urías aj tij kixyiib' li artal jo' tz'aqal li reetalil kitaqlaak re toj Damaask xb'aan li awab'ej Ajás. Kama' a'an kixyiib' li artal laj Urías aj tij naq toj maji' nasutq'iik chaq li awab'ej Ajás sa' li tenamit Damaask.

¹² Naq li awab'ej kisutq'iik chaq Damaask, kiril li artal, kijilok chi xk'atq ut kitaqe'k chiru;

¹³ kixk'at li xmayej ut li xyeechi'om, kixhoyoyi li b'iin sa' xb'een li artal ut kixrachrachi rik'in xkik'el li xmayejil li k'amok ib' sa' usilal.

¹⁴ Kirisi sa' li xna'aj li artal yiib'anb'il rik'in q'anch'iich' li wank chiru li rochoch li Qaawa', sa' xyanq li ak' artal ut li rochoch li Yos, ut koxk'e chi xk'atq li ak' artal, sa' xjayal releb'l iq'.

¹⁵ Chirix chik a'an laj Ajás li awab'ej kixye re laj Urías laj tij: “Sa' xb'een li nimla artal a'in taak'at laamayej eq'la ut ewu, li xk'atb'il mayej li awab'ej ut li xyeechi'om, li mayej k'aj, eb' li k'atb'il mayej ut li xmayej b'iineb' li tenamit. Taarachrachi li artal rik'in xkik'eleb' chixjunileb' li k'atb'il mayej ut rik'in li xkik'eleb' chixjunil li mayej xul. Ut li artal yiib'anb'il rik'in q'anch'iich', laa'in yaal we k'aru tinb'aanu re”, chan laj Ajás.

¹⁶ Laj Urías laj tij kixb'aanu chixjunil li k'aru kiyehe'k re xb'aan li awab'ej Ajás.

¹⁷ Chirix chik a'an li awab'ej Ajás kixtaqla risinkil eb' li perpookil ch'iich' chapchookeb' wi' li k'ochleb'aal; kirisi ajwi' li nimla xna'aj ha' li wank sa' xb'eeneb' li xjalam u eb' li kaahib' chi b'ooyx yiib'anb'ileb' rik'in q'anch'iich', ut koxk'e sa' xb'een li tz'aqal pek.

¹⁸ Kirisi ajwi' li xna'aj li xk'ojarib'aal li awab'ej li wank sa' rochoch li Qaawa', ut kixtz'ap li okeb'aal li wank chirix li ochoch. Kixb'aanu a'an yal re naq taasaho'q sa' xch'ool li awab'ej re Asiria.

¹⁹ Chixjunil li xyehom xb'aanuhom laj Ajás, tz'iib'anb'il sa' xHuhil li xyehom ut xb'aanuhomeb' li awab'ej re Judá.

²⁰ Naq laj Ajás kiq'ajk kisutq'iik rik'ineb' li xxe'toonil yuwa', kimuqe'k sa' xyanqeb' li xna' xyuwa', sa' xtenamit laj David, ut a' chik laj Esekías li ralal kikanaak chi awab'ejink sa' xna'aj.