2 Reyes 11 - Q'eqchi Bible

Lix Atalía

¹ Naq lix Atalía, xna' laj Okosías, kixnaw naq kikamsiik li xyum, koho chi xsachb'aleb' ru chixjunileb' li ralal xk'ajol li awab'ej.

² Ab'an lix Joseba, xrab'in laj Jorán li awab'ej ut ranab' laj Okosías, kirisi laj Johás sa' xyanqeb' li ralal xk'ajol li awab'ej, li yookeb' chi kamsiik, kixk'am ut koxmuq sa' li xwarib'aal, rochb'een li ixq aj ilol re. Jo'kan naq kimuqmuuk chiru lix Atalía ut ink'a' kikamsiik.

³ Waqib' chihab' kiwank chi muqmu laj Johás sa' rochoch li Qaawa' rochb'een lix Joseba, naq lix Atalía yo chi awab'ejink sa' li tenamit.

⁴ Chiru li xwuq chihab', laj Johadá aj tij kixtaqla xb'oqb'aleb' li xjolomileb' li o'taqk'aal chi aj puub' jo'wi' eb' laj taqlanel ut eb' laj k'aak'alenel, ut kixch'utub'eb' rik'in, sa' rochoch li Qaawa'. Aran kixk'uub' jun sumwank rik'ineb' ut kixtz'aama li jurament chiruheb'. Toja' naq kixk'ut chiruheb' laj Johás, li ralal li awab'ej.

⁵ Chirix chik a'an kixchaq'rab'iheb' chi jo'ka'in: “A'an a'in li teeb'aanu laa'ex: teek'e eerib' sa' oxib' ch'uut. Li jun ch'uut taa'ok chi k'anjelak sa' li kutan sábado ut taakananaaq chi rilb'al li rochoch li awab'ej.

⁶ Jun ch'uut chik taakanaaq sa' li okeb'aal Sur xk'ab'a', ut li rox ch'uut taakanaaq sa' li okeb'aal wank chirix li xna'ajeb' laj k'aak'alenel. Jo'ka'in naq te'xk'aak'ale li rochoch li awab'ej.

⁷ Ab'anan eb' li wiib' ch'uut li neke'k'aak'alenk chiru li kutan sábado, te'kanaaq chi rilb'al li rochoch li Qaawa' re te'ril chi chaab'il li awab'ej.

⁸ Teesut rix li awab'ej b'arwi' wank, chi wanq leech'iich' sa' leeruq'. Ani taaraj xminb'al rib' chi nume'k sa' eeyanq, kamsinb'ilaq. Laa'ex tento teerochb'eeni li awab'ej b'ar txikje'q”, chan laj Johadá.

⁹ Eb' li xjolomileb' li o'taqk'aal chi aj puub' ke'xb'aanu chixjunil jo' kixye laj Johadá laj tij. Li junjunq kixk'ameb' laj puub', a'eb' li neke'elk ut neke'ok sa' xk'anjeleb' chiru li kutan sábado; chirix chik a'an koxe'xk'ut rib' chiru laj Johadá laj tij.

¹⁰ Toja' naq laj tij kixq'axtesi reheb' li xjolomileb' laj puub', eb' li jutz' che' ut li koleb' ch'iich' k'uulanb'ileb' sa' rochoch li Qaawa', a'eb' li ke'k'anjelak najter re li awab'ej David.

¹¹ Eb' laj puub' ke'xtawaxi xna'ajeb', chi wankeb' xch'iich' sa' ruq'eb', chalen sa' li okeb'aal wank sa' xjayal rokeb'l iq' toj sa' xjayal li releb'l iq', ut chi xsutam li artal: sutsu li awab'ej chi xkaapak'alil.

¹² Toja' naq laj Johadá kirisi chaq li ralal li awab'ej, kixxaqab' cho'q awab'ej ut kixyul rik'in aseeyt. Ke'xpoq'poq'i li ruq'eb' chixjunileb' ut ke'xye chi kaw xyaab' xkuxeb': “Sahaq taxaq xch'ool li awab'ej!”, chankeb'.

¹³ Naq lix Atalía kirab'i naq japeb' re eb' laj k'aak'alenel jo'wi' eb' li tenamit, koho wankeb' wi' li k'iila poyanam sa' rochoch li Yos.

¹⁴ Aran kiril li awab'ej xaqxo chi xk'atq roqechal li rochoch li Qaawa', jo' k'aynaqeb' chi xb'aanunkil li awab'ej. Wankeb' ajwi' chi xk'atq li awab'ej eb' laj jolominel jo'wi' eb' laj yaab'asinel pur, ut chixjunil li tenamit q'axal saheb' sa' xch'ool, yookeb' chi xyaab'asinkil eb' li pur. Toja' naq lix Atalía kixq'ich li raq' ut kixjap re chi xyeeb'al: “Xinb'alaq'iik, xinb'alaq'iik!”, chan.

¹⁵ Ab'an laj Johadá laj tij kixye reheb' li xjolomileb' laj puub': “Isihomaq chaq lix Atalía sa' eeyanq ut kamsihomaq ani nataaqenk re”. Kixye chi jo'kan xb'aan naq ink'a' kiraj naq taakamsiiq sa' rochoch li Qaawa'.

¹⁶ Tikto ke'xte li xb'e ut naq ki'ok sa' rochoch li awab'ej, sa' li okeb'aal neke'wank wi' eb' li kawaay, aran ke'xkamsi.

¹⁷ Chirix chik a'an laj Johadá kixk'ojob' jun sumwank rik'in li Qaawa' ut li tenamit, re naq a'anaqeb' tz'aqal xtenamit li Qaawa'. Jo'kan ajwi' kixb'aanu rik'in li awab'ej ut li tenamit.

¹⁸ Ut chixjunileb' li poyanam koheb' sa' rochoch laj Bahal: ke'xjuk' ut ke'xputz'i eb' li artal ut eb' li jalam u, ut laj Matán, laj tij chiru laj Bahal, ke'xkamsi chiruheb' li artal. Chirix a'an laj tij kixxaqab'eb' aj k'aak'alehom re rochoch li Yos

¹⁹ ut kixjunajiheb' li xjolomileb' li o'taqk'aal chi aj puub' jo'wi' eb' laj taqlanel, eb' laj k'aak'alenel ut chixjunileb' li poyanam. Ke'rochb'eeni li awab'ej chalen sa' rochoch li Qaawa' toj sa' rochochil li awab'ej, ke'ok sa' li okeb'aal neke'wank wi' eb' laj k'aak'alenel, ut ke'xk'ojob' laj Johás sa' xk'ojarib'aaleb' li awab'ej.

²⁰ K'ajo' xsahilaleb' sa' xch'ool chixjunileb'! Kamenaq chik lix Atalía sa' rochochil li awab'ej. Jo'kan naq li tenamit kikanaak sa' tuqtuukilal.

²¹ Wuqub' chihab' wank re laj Johás naq ki'ok cho'q awab'ej.