2 Reyes 1 - Q'eqchi Bible

Laj Elías ut laj Okosías

¹ Chirix xkamik laj Ajab, eb' laj Mohab ke'q'etq'eto'k chiruheb' laj Israel.

² Sa' jun kutan laj Okosías kit'ane'k chaq sa' xb'entaanil sa' xkab' k'ojaril li rochoch li wank aran Samaria, ut kixtiq' rib'. Toja' naq kixtaqlaheb' xtaql ut kixye reheb': “Ayuqex chi patz'ok rik'in laj Bahal-Sebub, xyoseb' laj Ekrón, re xnawb'al ma tink'iraaq chiru lintiq'ilal a'in”, chan.

³ Ab'anan li x'ánjel li Qaawa' kixye re laj Elías aj Tisbé: “Xaqlin ut ayu chi xk'ulb'aleb' li xtaql li awab'ej re Samaria ut ye reheb': «Ma maak'a' tab'i' li Yos arin Israel naq texxik chi patz'ok rik'in laj Bahal-Sebub, xyoseb' laj Ekrón?

⁴ Jo'kan naq li Qaawa' xye chi jo'ka'in: Chiru li ch'aat sotsookat wi' tatkamq chi maak'a' chik xja'lenkil»”. Laj Elías koho ut kixb'aanu chi jo'kan.

⁵ Ut naq eb' li taql ke'sutq'iik wan wi' laj Okosías, a'in kixpatz' reheb': “K'aru xek'ul naq xexsutq'iik chaq chi junpaat?”, chan reheb'.

⁶ Ke'chaq'ok ut ke'xye: “Xqak'ul jun li winq sa' b'e ut xye qe: «Sutq'inqex rik'in li awab'ej li xtaqlank chaq eere ut toxeeye re: Jo'ka'in xye li Qaawa': Ma maak'a' tab'i' li Yos arin Israel naq taataqla chi patz'ok rik'in laj Bahal-Sebub, xyoseb' laj Ekrón? Jo'kan naq chiru li ch'aat sotsookat wi' tatkamq chi maak'a' xja'lenkil»”.

⁷ Li awab'ej kixpatz' reheb': “Chanru na'ilok li winq a'an li xek'ul sa' li b'e ut xye eere li aatin a'in?”, chan.

⁸ Ke'xsume: “Jun li winq tiqto rik'in rixixul ut wank xk'aamal xsa', rix ajwi' xul”. Kixye li awab'ej: “A'an laj Elías aj Tisbé”, chan.

⁹ Tikto laj Okosías kixtaqla jun xjolomileb' laj puub' rochb'eeneb' lajeeb' roxk'aal chi winq. Koheb' wan wi' laj Elías ut koxe'xtaw chi k'ojk'ook sa' xb'een jun li tzuul: “At xtaql li Yos, li awab'ej xye chaq naq tatkub'eeq”, chan li xjolomileb' laj puub'.

¹⁰ Kichaq'ok laj Elías ut kixye re laj jolominel: “Wi relik chi yaal naq laa'in xtaql li Yos, chichalq chaq xam sa' choxa re tatxk'at laa'at ut eb' li lajeeb' roxk'aal chi winq”. Tikto kikub'e chaq xam sa' choxa ut kolxkamsiheb' li xjolomileb' laj puub' ut chixjunileb' li lajeeb' roxk'aaleb' chi winq.

¹¹ Laj Okosías li awab'ej kixtaqla wi' chik jun xjolomileb' laj puub' rochb'eeneb' lajeeb' roxk'aal chi winq, li koheb' chi tzuul ut ke'xye re laj Elías: “At xtaql li Yos, li awab'ej xye chaq naq tatkub'eeq chi junpaat”.

¹² Ab'an laj Elías kixye: “Wi relik chi yaal naq laa'in xtaql li Yos, chichalq chaq xam sa' choxa re tatxk'at laa'at ut eb' li lajeeb' roxk'aal chi winq”. Tikto kikub'e chaq xam sa' choxa ut kolxkamsiheb' li xjolomileb' laj puub' ut chixjunileb' li lajeeb' roxk'aaleb' chi winq.

¹³ Li awab'ej kixtaqla wi' chik sa' rox sut jun chik xjolomileb' laj puub', rochb'een lajeeb' roxk'aaleb' chi winq. Koho chi tzuul laj jolominel, ab'an naq kiwulak, kixwiq'ib' rib' chiru laj Elías ut kixtz'aama chiru: “At xtaql li Yos, chakuy inmaak. Nintz'aama chawu naq chakol linyu'am ut li xyu'ameb' li lajeeb' roxk'aaleb' chi winq a'in aj k'anjeleb' chawu.

¹⁴ K'e reetal naq ak ka' sut xkub'e chaq xam sa' choxa ut xkamsi eb' li wiib' aj jolominel rochb'eeneb' li xlajeetq roxk'aaleb' chi aj puub'. Ab'an anaqwan nintz'aama chawu naq chakol linyu'am”.

¹⁵ Toja' naq li x'ánjel li Qaawa' kixye re laj Elías: “Kub'en aawochb'een a'an. Matxiwak chiru”. Kixaqliik laj Elías ut kikub'e chaq rochb'een li xjolomileb' laj puub'. Naq kiwulak rik'in li awab'ej,

¹⁶ kixye re: “Jo'ka'in xye li Qaawa': «Laa'at xataqlaheb' aataql chi patz'ok rik'in laj Bahal-Sebub, xyoseb' laj Ekrón. Jo'kan naq chiru li ch'aat sotsookat wi', tatkamq chi maak'a' xja'lenkil»”.

¹⁷ Ut relik chi yaal naq kikamk laj Okosías, jo' kixye li Qaawa' chi xtz'uumal re laj Elías. Sa' xna'aj a'an ki'ok chi awab'ejink laj Jorán li riitz'in, xb'aan naq maak'a'eb' ralal laj Okosías. A'in kik'ulmank naq yo xkab' chihab' rokik laj Jorán cho'q awab'ej re Judá.

¹⁸ Chixjunil li xyehom xb'aanuhom laj Okosías, tz'iib'anb'il sa' xHuhil xyehom ut xb'aanuhomeb' li awab'ej re Israel.