2 Corintios 7 - Q'eqchi Bible

¹ Ex was wiitz'in raarookex inb'aan, qe laa'o yeechi'inb'il chaq chixjunil a'an. Jo'kan naq qach'ajob'resiiq qib', qisihaq chixjunil li tz'ajnil wank chiqix ut li xtz'ajnil li musiq'ej, qoxloq'iiq li Yos ut qatz'aqob'resiiq ru li qasantilal.

² K'ehomaq qana'aj sa' leeraanm! Maa'ani xqarahob'tesi xch'ool, maa'ani xqasach, maa'ani xqab'alaq'i.

³ Ink'a' yookin chi xyeeb'al a'in re eewech'b'al; ak xinye eere naq junelik wankex sa' qach'ool: qochb'eenaqex wi naqak'ul li kamk malaj ut yo'yooqo.

⁴ Ninye eere li yaal ut q'axal ninnima wu sa' eek'ab'a' laa'ex. K'ojk'o inch'ool ut numtajenaq xsahil li waanm sa' chixjunil li rahilal.

Laj Pablo xo'xtaw laj Tito aran Macedonia

⁵ Relik chi yaal naq chalen qak'ulunik aran Macedonia tik ink'a' xhilank li qach'och'el qasululel, rahob'tesinb'ilo b'an rik'in chixjunil: yo li raaxiik' chiqix ut yo qaxiw sa' li qach'ool.

⁶ Ab'anan li Yos, aj k'ojob'anel xch'ooleb' li toq'ob'eb' ru, xk'ojob' qach'ool rik'in xk'ulunik laj Tito;

⁷ ut moko ka'aj ta wi' rik'in li xk'ulunik, rik'in aj b'an wi' xk'ojlajik xch'ool eerik'in laa'ex. Laa'ex nikineek'oxla, q'axal nikineera, ra nekereek'a chirix li xk'ulmank: a'an a'in li xseeraq'i we laj Tito, jo'kan naq q'axal chik xsaho'k linch'ool.

⁸ Us ta xinrahob'tesi eech'ool rik'in linhu, ab'an ink'a' ra naweek'a. Ut wi ra xweek'a junxil (xb'aan naq nink'e reetal naq li hu a'an xrahob'tesi eech'ool us ta yal jun k'amok ajwi'), anaqwan nasaho'k sa' li waanm:

⁹ ink'a' rik'in naq xrahob'tesiik eech'ool, rik'in b'an naq xyot'e'k eech'ool xejal eek'a'uxl. Xekuy li rahilal a'an jo' naraj li Yos ut anaqwan neketaw ru naq maajun rahilal xek'ul qab'aan laa'o.

¹⁰ Li rahil ch'oolej jo' naraj li Yos naxyoob' chi junajwa li yot'b'ach'oolej jalb'ak'a'uxl ut naxk'am chaq li kolb'a ib'; ab'an li rahil ch'oolej jo' chanru naraj li ruuchich'och', a'an naxyoob' li kamk.

¹¹ Chek'e reetal k'aru xyoob' sa' eeyanq li xrahil eech'ool jo' naraj li Yos: k'ajo' k'oxlak chiwix! Ut moko ka'aj ta wi' a'an. K'ajo' xpatz'b'al xkuyb'al eemaak, k'ajo' eejosq'il chirix li ink'a' us, k'ajo' eexiw, k'ajo' eek'a'uxl, k'ajo' leerahom, k'ajo' li xrahob'tesinkil laj maak! Laa'ex xek'ut naq tik maak'a' eemaak sa' chixjunil li na'leb' a'in.

¹² Relik chi yaal naq laa'in xintz'iib'ak eerik'in moko xmaak ta li ani xb'aanunk rahilal, chi moko xb'aan li xk'uluk rahilal, re b'an naq chik'utunq sa' eeyanq li qaraab'al eeb'aan, chiru li Yos.

¹³ A'an a'in li xk'ojob'ank qach'ool. Ut q'axal wi' chik xsaho'k sa' li qaanm rik'in xsahil xch'ool laj Tito, xb'aan naq xk'ojlaak xch'ool eeb'aan chejunilex.

¹⁴ Ut wi wank k'aru xinnima wi' wu eeb'aan laa'ex chiru laj Tito, ink'a' xinkanaak sa' xutaan. Jo' naq yaal chixjunil li xqaye eere, jo'kan ajwi' tz'aqal yaal chixjunil li xqaye re laj Tito: naq laa'ex li xk'ojob'ankil qach'ool.

¹⁵ Ut q'axal wi' chik nekexra laj Tito naq najultiko'k re chanru naq chejunilex xepaab' jo'wi' chanru naq xek'ul chi chaab'il ut chi kub'enaq eewankil.

¹⁶ Nasaho'k inch'ool rik'in xk'eeb'al reetal naq naru tink'ojob' li waanm cherix sa' chixjunil.