2 Corintios 6 - Q'eqchi Bible

¹ Jo'kan utan, laa'o aj k'anjel qochb'een li Yos, naqatz'aama naqelaji naq ink'a' taxaq chek'ul li rusilal li Yos chi maak'a' rajb'al,

² xb'aan naq naxye: “Sa' chaab'il kutan xatwab'i, sa' xkutankil li kolb'a ib' xatintenq'a”. Chek'e reetal, a'an a'in li kutan q'axal chaab'il, a'an a'in xkutankil li kolb'a ib'!

³ Maajun wa naqaluktesi xch'ool anihaq, re naq ink'a' te'xwech' rix li qak'anjel.

⁴ Chixjunil li naqab'aanu, naxk'ut naq laa'o aj k'anjelo chiru li Yos: q'axal naqakuy li rahob'tesiik, li raasa, li ch'a'ajkilal,

⁵ li rape'k chi tz'uum, li wank sa' tz'alam, li mululij ib', li tawasiik, li yo'lek ut li kuyuk tz'okaak.

⁶ Naqak'ut ajwi' a'an rik'in xsaqal ru li qach'ool, rik'in qachaab'il k'a'uxl, xnimal qakuyum, usilal, rik'in Santil Musiq'ej ut rik'in tz'aqal rahok,

⁷ rik'in xyeeb'al li yaal, rik'in xwankil li Yos, rik'in xk'anjelob'aal li tiikil ch'oolej chi qanim ut chi qatz'e.

⁸ Wan naq naterq'usiik qawankil ut wan naq nokootz'eqtaanaak; wan naq nokooq'ab'aak ut wan naq chaab'il nayehe'k chiqix. Neke'xye naq aj b'alaq'o, ab'an naqaye li yaal;

⁹ jo'ko li ink'a' nanawe' qu, ab'an nawb'il qu chi us; jo'ko li yooko chi kamk, ab'an yo'yooko. Rahob'tesinb'ilo, ab'an ink'a' kamsinb'ilo;

¹⁰ ra wanko, ab'an junelik sa sa' qach'ool; wanko sa' neb'a'il, ab'an naqab'ihomob'resi naab'aleb'; chanchan wi' maak'a' wank qe, ab'anan chixjunil wank qe.

Xk'eeb'al xna'leb'eb' laj Korinto

¹¹ Ex aj Korinto, xexqaatina chi tz'aqal yaal ut xqate li qach'ool cheru.

¹² Nimla na'ajej wank cho'q eere sa' li qaanm, ab'an leech'ool laatz' wank cho'q qe laa'o.

¹³ Jo'kex li walal naq yookin cheraatinankil: k'ehomaq reeqaj leeraab'al qab'aan ut tehomaq ajwi' leech'ool laa'ex!

¹⁴ Meelaq'ab' eerib' rik'ineb' li maak'a' neke'xpaab', re riiqaninkil li moko eek'ulub' ta. K'aru wank re li tiikilal rik'in li maa'usilal? Ma truuq tab'i' taawanq sa' komonil li saqenk rik'in li aak'ab'?

¹⁵ Chanru naq te'wanq chi sum'aatin li Kriist ut laj tza? K'aru tixwotz laj paab'anel rik'in li maak'a' naxpaab'?

¹⁶ K'aru wank re li rochoch li Yos rik'ineb' li yal k'oxlanb'il yos? Xb'aan naq laa'o tz'aqal rochoch li yo'yookil Yos, jo' yeeb'il chaq xb'aan: “Tinwanq rik'ineb' ut tinb'eeq sa' xyanqeb'; laa'inaq li xYoseb' ut a'anaqeb' lintenamit”.

¹⁷ Jo'kan utan, “elenqex sa' xyanqeb' ut jek'omaq eerib' rik'ineb', chan li Qaawa'. Meech'e' li k'a'aq re ru tz'ajn ru. Toja' naq laa'in texink'ul:

¹⁸ laa'inaq leeyuwa' ut laa'exaq li walal ink'ajol, chan li Qaawa' nim xwankil”.