2 Corintios 2 - Q'eqchi Bible

¹ A'in li xink'oxla xb'aanunkil: naq ink'a' tinxik wi' chik eerik'in chi xk'eeb'al xrahil eech'ool.

² Xb'aan naq wi tink'e xrahil eech'ool, ani ta chik taak'ehoq xsahil li waanm laa'in? Ma ink'a' ka'ajwi' laa'ex li xinrahob'tesi sa' eech'ool?

³ A'in aj e naq xintz'iib'a eerik'in chi jo'ka'in, re naq jo'q'e tinwulaq, maak'a'aq xrahil inch'ool xb'aaneb' li tento raj xe'xk'e xsahil li waanm. Ninnaw chi us cherix chejunilex naq linsahojik a'an ajwi' leesahojik chejunilex.

⁴ Relik chi yaal naq xintz'iib'ak eerik'in chi q'axal ra sa' inch'ool: k'ajo' naq xyot'e'k li waanm ut xinyaab'ak! Ab'anan moko re ta xrahob'tesinkil eech'ool naq xintz'iib'ak, re b'an naq teenaw naq numtajenaq raarookex inb'aan.

⁵ Wi ani xk'ehok rahil ch'oolej, moko laa'in ta xinxrahob'tesi, laa'ex b'an xexrahob'resiik chejunilex. Ab'an yookin chi xk'eeb'al reetal re naq ink'a' tink'e xb'een li aatin.

⁶ Tz'aqal li rahob'tesiik xk'ul li winq a'an xb'aaneb' li xkomon;

⁷ jo'kan naq q'axal us raj naq anaqwan teekuy xmaak ut teek'ojob' xch'ool: mare anchal chinumtaaq sa' xb'een li xnimal xrahil xch'ool.

⁸ Jo'kan utan, nintz'aama cheru: k'utomaq wi' chik chiru naq nekera.

⁹ Ak xintz'iib'ak eerik'in re xyalb'al eerix, re rilb'al ma nekex'ab'ink rik'in chixjunil.

¹⁰ Ut li teekuy xmaak laa'ex, tinkuy ajwi' xmaak laa'in. Xb'aan naq, wi wank junaq xinkuy xmaak laa'in, eeraab'al laa'ex naq xinb'aanu, sa' xk'ab'a' li Kriist,

¹¹ re naq ink'a' tooxb'alaq'i laj tza: ak naqanaw k'aru li xna'leb'.

Laj Pablo xwulak Tróada ut Macedonia

¹² Naq xinwulak Tróada, li Qaawa' xte chiwu jun nimla okeb'aal re xpuktesinkil li xChaab'il Esil li Kriist,

¹³ ab'anan ink'a' xk'ojlaak linch'ool, xb'aan naq ink'a' xintaw laj Tito, li wiitz'in. Jo'kan naq xinchaq'rab'iheb' laj Tróada ut xkohin Macedonia.

¹⁴ B'anyox re li Yos naq sa' xk'ab'a' li Kriist junelik nokooxk'e chi tz'aqonk sa' li x'awab'ejihom ut naxk'e chi nawe'k li Kriist sa' qak'ab'a' laa'o: a'an chanchan xb'ook li sununkil b'an naxik yalaq b'ar.

¹⁵ Xb'aan naq laa'o kama'o xsununkil li Kriist chiru li Yos, sa' xyanqeb' li wankeb' sa' xb'e li kolb'a ib' jo'wi' sa' xyanqeb' li yookeb' chi sachk:

¹⁶ cho'q reheb' li junch'ol laa'o xb'ook li kamk li nak'amok chaq li kamk, ut cho'q reheb' li junch'ol chik laa'o xb'ook li yu'am nak'ehok yu'am. Ut ani truuq tixb'aanu a'in?

¹⁷ Relik chi yaal naq laa'o ink'a' nokooyakok rik'in Raatin li Yos kama' neke'xb'aanu naab'aleb'; nokoo'aatinak b'an sa' yaal, chiru li Yos, sa' xk'ab'a' li Kriist, jo' chanru musiq'anb'ilo xb'aan li Yos.