2 Corintios 11 - Q'eqchi Bible

Laj Pablo ut eb' li apóstol aj b'alaq'

¹ Us raj teekuy kach'inaq li xkaanil wu! Jo'kan utan, chineekuy. Nekexinsowena jo' chanru li Yos naxsowena li xtenamit.

² Xb'aan naq xexinsi re sumlaak rik'in jun chi b'eelomej re eexaqab'ankil chiru li Kriist jo' jun tuq'ixq saq ru xch'ool.

³ Ab'anan ninxiwa naq mare taapo'q leek'a'uxl: kama' naq lix Eva kib'alaq'iik xb'aan xlab'alil li k'anti', mare tex'isiiq ajwi' laa'ex rik'in li yaal ut santilal wankex wi' cho'q re li Kriist.

⁴ Xb'aan naq yalaq ani taawulaq chi xpuktesinkil resil jalan chik Jesus chiru li ak xqapuktesi eere, yalaq ani tixk'ut cheru xk'ulb'al jalan chik Musiq'ej chiru li ak xek'ul malaj jalan chik Chaab'il Esilal chiru li ak eek'ulum, teepaab' aj raj wi' chi junpaat!

⁵ Ab'an laa'in nink'oxla naq moko kub'enaq ta inwankil chiruheb' li “xninqaleb' ru apóstol” a'an.

⁶ Us ta ink'a' ninnaw aatinak chi chaab'il, ab'an moko jo'kanin ta rik'in linna'leb'; ut a'in junelik xqak'ut cheru rik'in chixjunil ut sa' xyanqeb' chixjunil.

⁷ Malaj xinmaakob'k xb'aan naq xinkub'si inwankil re xterq'usinkil eewankil laa'ex rik'in naq xinpuktesi eere chi maatan li xChaab'il Esil li Yos?

⁸ Xinmaq' li k'aru reheb' li Iklees junch'ol ut xink'ul linq'axb'a kutan, re tink'anjelaq cheru.

⁹ Ut naq xinwank chaq sa' eeyanq ut xinkanaak sa' rajb'al ru, maa'ani xinch'i'ch'i'i. A'eb' li was wiitz'in li xe'chalk Macedonia xe'k'ehok we li namajelo'k chiwu. Rik'in chixjunil ink'a' xwaj eech'i'ch'i'inkil, ut ink'a' ajwi' texinch'i'ch'i'i.

¹⁰ Sa' xk'ab'a' li Kriist li wank wik'in, ninye li yaal: maa'ani taamaq'oq chiwu li xnimankil wu sa' xteepal Akaya.

¹¹ K'a' put? Ma aj b'an naq nekexinra? Li Yos naxnaw chi us naq jo'kan.

¹² Ut li ninb'aanu, ink'a' tinkanab' xb'aanunkil, re naq maak'a'aq chik k'aru te'xjuntaq'eeta wi' rib' qik'in eb' li neke'xnimob'resi rib' sa' chixjunil.

¹³ Xb'aan naq eb' a'an yal neke'xk'e rib' cho'q apóstol; ab'anan aj k'anjeleb' re b'alaq'ik, neke'xpak' rib' cho'q x'apóstol li Kriist.

¹⁴ Misachk eech'ool chi rab'inkil a'an, xb'aan naq a' ajwi' laj Tza naxpak' rib' cho'q x'ánjel li kutan saqenk.

¹⁵ Jo'kan utan, misachk eech'ool chi rab'inkil naq eb' laj tenq' re neke'xpak' rib' cho'q aj k'anjel re li tiikilal. Ab'an te'wanq roso'jikeb' a' yaal chanru li xb'aanuhomeb'.

¹⁶ Jun sut chik tinye naq maa'ani chixk'oxla naq laa'in maak'a' inna'leb'; ab'anan us ta maak'a' inna'leb' cheru laa'ex, chineekuyaq re naq tinnima ajwi' b'ayaq wib'.

¹⁷ Li yookin chi xyeeb'al anaqwan, moko jo' ta naraj li Qaawa'; naq yookin chi xnimankil wib' chi jo'kan, yookin chi aatinak kama' na'aatinak junaq li kaan ru.

¹⁸ Ab'an naab'aleb' neke'xnima rib' rik'in ruuchich'och'il na'leb'; jo'kan naq laa'in ajwi' tinnima wib'.

¹⁹ Chi sa sa' eech'ool nekekuy li maak'a'eb' xna'leb', laa'ex li wank eena'leb'!

²⁰ Nekekuy naq junaq nekexk'e chi moosil ut naq junaq naxmaq' chixjunil cheru, narelq'a li k'aru eere, naxq'etq'eti rib' ut nekexsak' chi xnaq' eeru.

²¹ Xutaanal cho'q we li ninye: xoowank sa' eeyanq chi tik maak'a' xkawub' qach'ool. Wi wank junaq kaw xch'ool chi xnimankil rib' (xmajelal inna'leb' ninye wi' a'in) tinnima ajwi' wib' laa'in.

²² Ma a'aneb' aj Hebreo? Jo'kan ajwi' laa'in. Ma a'aneb' aj Israel? Jo'kan ajwi' laa'in. Ma ralal xk'ajoleb' laj Abrahán? Jo'kan ajwi' laa'in.

²³ Ma aj k'anjeleb' chiru li Kriist? Us, tin'aatinaq jo' junaq kaan ru: q'axalin wi' chik chiruheb' a'an. Q'axal chik xintawasi wib' chi k'anjelak; numtejenaq chik chiruheb' xinwank sa' tz'alam ut xinrape'k chi tz'uum, k'iila sut x'aje'k inkamsinkil.

²⁴ Oob' wa xine'xk'e chi tz'uum eb' laj Judiiy: jun chik maa ka'k'aal chi tz'uum xk'ehe'k we.

²⁵ Ox wa xine'xteni chi che'; jun wa xine'xkuti chi pek; ox wa xjuk'e'k linjukub' chiru li palaw; jun kutan ut jun q'oqyink xinwank sa' xchamal li palaw.

²⁶ K'iila sutin chi b'eek; k'ajo' chaq linxiw xb'aaneb' li nima', xb'aaneb' laj elq', xb'aaneb' li wech tenamitul, xb'aaneb' li junch'ol chik; sa'atq li tenamit, sa'atq li junesal na'ajej, chiruhatq li palaw xb'aaneb' li was wiitz'in aj b'alaq'.

²⁷ Xinlub'je'k ut xintawasi wib' chi k'anjelak; k'iila q'oqyink xinyo'lek, xintz'okaak ut xchaqik we, k'iila wa xinkuyatq intz'okajik, xinkuy li ke ut li t'usam.

²⁸ Ut chirix chixjunil a'in wank li teneb'anb'il sa' inb'een rajlal kutan, a' li k'oxlak chirix chixjunileb' li Iklees.

²⁹ Ani nayajerk chi ink'a' ta tinyajerq laa'in? Ani naluktaak xch'ool chi ink'a' ta taaxamnaq sa' li waanm?

³⁰ Wi tento tinnima wib', rik'in xmajelal inmetz'ew tinnima wib'.

³¹ Naxnaw li Yos, li xYuwa' li Qaawa' Jesus (usilaatinanb'ilaq taxaq chi junelik), naq ink'a' nintik'ti'ik.

³² Aran Damaask li ruuchil li awab'ej Aretas xtaqla xk'aak'alenkil li tenamit re inchapb'al.

³³ Ut sa' jun li okeb'aal xine'xnumsi, sa' jun nimla chakach xine'xkub'si chirix xtz'akul li tenamit: jo'kan naq xinkole'k sa' ruq' li ruuchil li awab'ej.