1 Ts 3 - Q'eqchi Bible

Laj Timoteo kitaqlaak aran Tesalónika

¹ Jo'kan naq laa'o ink'a' chik xqakuy: xk'ul qach'ool kanaak qajunes Atenas

² ut xqataqla eerik'in laj Timoteo, li qiitz'in ut aj k'anjel chiru li Yos sa' li xChaab'il Esil li Kriist. A'an a'in li qajom: xk'eeb'al eena'leb' ut xkawub' eech'ool sa' leepaab'aal

³ re naq maa'ani chich'inanq xch'ool xb'aaneb' li rahilal a'in. Ak ch'olch'o cheru naq tento tqak'ul a'an.

⁴ Naq toj wanko chaq sa' eeyanq, xqaye resil eere naq took'uluq rahilal, ut a'an tz'aqal li xk'ulmank, jo' ch'olch'o cheru.

⁵ Jo'kan naq laa'in ajwi' ink'a' chik xinkuy, ut xintaqla laj Timoteo re rab'inkil resil leepaab'aal: mare anchal xex'aaleek xb'aan laj aalenel ut li qak'anjel xkanaak chi maak'a' rajb'al.

Yoxink chirix li esilal kirab'i laj Pablo

⁶ Toja' xsutq'iik chaq laj Timoteo eerik'in, ut chaab'il resil leepaab'aal ut leerahom xk'am chaq; xolxye ajwi' naq junelik nokoojultiko'k eere ut nekeraj rilb'al qu, jo' ajwi' naq laa'o naqaj rilb'al eeru.

⁷ Jo'kan utan, ex qas qiitz'in, sa' chixjunil li raaxiik' ut li qarahilal, xqak'ul xk'ojob'ankil qach'ool eeb'aan sa' xk'ab'a' leepaab'aal.

⁸ Anaqwan yaal naq yo'yooko: xb'aan naq naqanaw naq kaw xaqxookex rik'in li Qaawa'.

⁹ Ut chan tawi' ru tooyoxinq chiru li Yos cherix laa'ex rik'in chixjunil li xsahil qach'ool naqeek'a chiru li qaYos sa' eek'ab'a'?

¹⁰ Chi q'eq chi kutanko chi tz'aamank chi elajink chi kaw re rilb'al eeru jo'wi' re xtz'aqob'resinkil jo'nimal chik naraj leepaab'aal.

¹¹ A' taxaq li Yos li qaYuwa' ut li Qaawa' Jesus chituqub'anq li qab'e re xik eerik'in.

¹² Ut li Qaawa' chixk'e taxaq eere naq chik'iiq ut chinumtaaq li rahok eerik'in cherib'il eerib' ut rik'in chixjunileb' leeras eeriitz'in, jo' ajwi' naq nekexqara laa'o,

¹³ re naq kawub'resinb'ilaq chi us leech'ool sa' santilal chi maak'a'aq eeq'usb'al chiru li Yos li qaYuwa', sa' xk'ulunik li Qaawa' Jesukriist, rochb'een chixjunil li xsantil tenamit.