1 Timoteo 2 - Q'eqchi Bible

Li tijok sa' komonil

¹ Li xb'enwa nintz'aama a'an a'in: naq chi'uxq tijok, tz'aamank, elajink ut yoxink chirix chixjunileb' li poyanam;

² chirixeb' li awab'ej ut chixjunileb' li wankeb' sa' xwankil, re naq wanqo sa' xyaalalil ut sa' tuqtuukilal rik'in li qak'ulub' jo'wi' rik'in xpaab'ankil li Yos.

³ Chixjunil a'in chaab'il ut loq' chiru li Yos laj Kolol qe:

⁴ A'an naraj naq chixjunileb' te'kole'q ut toxe'xtaw ru k'aru li yaal.

⁵ Xb'aan naq jun ajwi' chi Yos, jun ajwi' li na'okenk ut na'aatinak chiqix chiru li Yos: a'an jun li winq, a' li Kristo Jesus

⁶ li kixq'axtesi rib' re qakolb'al chiqajunilo. A'an kich'olob'aak tz'aqal sa' xq'ehil,

⁷ ut a'in aj e naq kinxaqab'aak cho'q aj puktesinel ut apóstol (ninye li yaal, ink'a' nintik'ti'ik), re xk'utb'al li paab'aal ut li yaal chiruheb' li maawa'eb' aj Judiiy.

⁸ Nawaj naq eb' li winq che'tijoq yalaq b'ar ut che'xtaqsihaq li ruq'eb' sa' choxa chi saqaq ru, chi maak'a'aq josq'il ut wech'ij ib'.

Li ixq aj paab'anel

⁹ Jo'kanaqeb' ajwi' li ixq, tiqtooqeb' chi chaab'il, che'xtiqib'aq rib' sa' xyaalal jo' chanru xk'ulub'eb', moko chi k'oloxinb'ilaq ta li rismaleb' chi moko rik'in oor, lemtz'il q'ol malaj aq'ej q'axal terto xtz'aq,

¹⁰ rik'in b'an chaab'il b'aanuhom jo' xk'ulub'eb' li ixq neke'raj roxloq'inkil li Yos.

¹¹ Eb' li ixq sa' li ch'utam che'ab'inq chi chaab'il ut che'paab'anq chi us.

¹² Ink'a' nawaj naq eb' li ixq che'xtzoleb' li winq chi moko che'xk'e xwankil sa' xb'eeneb'; nawaj b'an naq wanqeb' sa' q'unil ch'oolej.

¹³ Xb'aan naq xb'enwa kiyoob'tesiik laj Adán ut moqon chik lix Eva.

¹⁴ Ut li kib'alaq'iik maawa' laj Adán, a' b'an li ixq li kiq'unb'esiik ut ki'ok chi q'etok aatin.

¹⁵ Ab'anan taakole'q sa' xk'ab'a' naq na'b'ej, wi junelik kawaq xch'ool sa' li xpaab'aal, sa' li rahok, santilal, ut rik'in q'unil ch'oolej.