1 Samuel 4 - Q'eqchi Bible

¹ Laj Samuel kixye reheb' chixjunil laj Israel jo'nimal kiyehe'k re xb'aan li Qaawa'. Sa'eb' li kutan a'an koheb' laj Israel chi yalok rik'ineb' laj Filistea ut koxe'hilanq chi xk'atq Ebén-Eser, ab'anan eb' laj Filistea ke'xyiib' xmuheb'aaleb' aran Afek

Eb' laj Filistea ke'xchap li xLoq'laj Kaaxil li Sumwank

² ut ke'xkawresi rib' chi yalok. Ki'uxk jun xnimal yalok, ut eb' laj Israel ke'q'axe'k ru xb'aaneb' laj Filistea li ke'xkamsi lajeeb' o'q'ob' (4,000) chi winq sa' li yalok.

³ Naq eb' laj puub' ke'sutq'iik chaq sa' li xmuheb'aaleb', li xcheekelaleb' laj Israel ke'xye chi jo'ka'in: “K'a'ut naq li Qaawa' xooxk'e sa' ruq'eb' laj Filistea anaqwan? Yo'qeb' Siló chi xk'amb'al chaq li xLoq'laj Kaaxil li xSumwank li Qaawa', re naq twanq sa' qayanq ut tooxkol chiruheb' li xik' neke'ilok qe”, chankeb'.

⁴ Toja' naq eb' li tenamit ke'xtaqlaheb' aj k'amonel aran Siló ut ke'xxok chaq li xLoq'laj Kaaxil li xSumwank li Nimajwal Yos, li nahilank sa' xb'eeneb' li kerubín. Eb' li ke'ochb'eenink re li xLoq'laj Kaaxil li xSumwank li Yos, a'aneb' laj Ofní ut laj Pinjás, li wiib' chi ralal laj Elí.

⁵ Naq li xLoq'laj Kaaxil li xSumwank li Qaawa' kiwulak wankeb' wi' eb' laj Israel, k'ajo' naq ke'saho'k sa' xch'ool chixjunileb'! Ke'xchaj reheb' chi kaw ut ki'eek'ank li ch'och' xb'aaneb'.

⁶ Naq eb' laj Filistea ke'rab'i li japok e, ke'xpatz': “K'a'ut naq yookeb' chi xjapb'al reheb' laj Hebreo sa' li xmuheb'aaleb'?”, chankeb'. Ab'anan naq ke'rab'i resil naq li xLoq'laj Kaax li Qaawa' wank sa' li xmuheb'aaleb',

⁷ ke'ok xxiweb' ut ke'xye: “Li Yos wank sa' xyanqeb'. Toq'ob' qu! Maajun sut kik'ulmank jo' a'in.

⁸ Toq'ob' qu! Ani taakoloq qe sa' ruq' li Yos li q'axal nim xwankil? A'an a'in li kirahob'tesink reheb' laj Ejiipt rik'in xninqal rahilal sa' li chaqich'och'!

⁹ Kawaq eech'ool, ex aj Filistea, ut yalomaq chi kaw, re naq ink'a' texkanaaq rub'el xwankileb' laj Hebreo, jo' naq ke'wank eb' a'an rub'el qawankil laa'o. Winqaqex ut yalomaq!”.

¹⁰ Toja' naq eb' laj Filistea ke'ok chi yalok ut ke'xq'ax ruheb' laj Israel li ke'elelik chiruheb' ut koheb' sa' li xmuheb'aaleb'. K'ajo'eb' li ke'kamk! Lajeeb' xka'k'aal mileb' li ke'kamk sa' xyanqeb' laj Israel li neke'xik chi roqeb'.

¹¹ Kichapmank ajwi' li xLoq'laj Kaax li Yos, ut ke'kamk laj Jofní ut laj Pinjás, li wiib' chi ralal laj Elí.

¹² Ab'an jun li winq aj Benjamín ki'elelik chiruheb' laj Filistea, koho sa' aanil, ut sa' ajwi' li kutan a'an kiwulak Siló, kok' q'ich li raq' ut nujenaq chi pojtz' sa' xjolom.

¹³ Sa' li honal a'an chunchu laj Elí sa' li xtem, chi xk'atq li okeb'aal, chire li b'e, yo xk'a'uxl chirix li xLoq'laj Kaax li Yos. Naq kik'ulunk li winq a'an ut kixye reheb' li poyanam k'aru kik'ulmank chaq, chixjunileb' ke'ok chi xchajb'al reheb'.

¹⁴ Laj Elí kirab'i li chajok e ut kixpatz': “K'a' chi poqoqij ib' a'an?”, chan. Toja' naq li winq koho sa' aanil rik'in laj Elí ut kixye re k'aru kik'ulmank:

^15-16 “Xinchalk sa' li xna'aj li yalok, xin'elelik chaq”. Waqxaqlaju ro'k'aal (98) chihab' wank re laj Elí; ink'a' chik na'eek'ank xsa' li ru ut ink'a' chik na'ilok. “K'aru xk'ulmank, at walal?”, chan.

¹⁷ “Eb' laj Israel ke'elelik chiruheb' laj Filistea. Xiikileb' li xe'kamsiik! Xe'kamsiik ajwi' xkab'ichaleb' laawalal, ut a'atq li xLoq'laj Kaax li Yos xchapmank!”, chan li winq.

¹⁸ Naq kipatz'e'k li xLoq'laj Kaax li Yos, t'anaamil laj Elí sa' li tem chunchu wi', chire li okeb'aal: kitoqe'k li xkux ut kikamk xb'aan naq ak tiix chi us ut nim xtib'el. Ka'k'aal chihab' kiwank cho'q aj k'amol xb'eheb' laj Israel.

¹⁹ Li ralib', a' li rixaqil laj Pinjás, wank sa' yu'am ut ak xkutankil li alank. Naq kirab'i resil naq kichape'k li xLoq'laj Kaax li Yos ut kamenaqeb' chik li xb'eelom ut laj Elí, kitiklaak li xrahilal, kixk'ol rib' ut ki'alank.

²⁰ Eb' li ixq li yookeb' chi ilok re ke'xk'e reetal naq kamk re, jo'kan naq ke'xye: “Matxiwak, xyo'laak jun aak'uula'al teelom”, chankeb'. Ab'an li na'b'ej ink'a' kichaq'ok chi moko kirab'i.

^21-22 Aj Ikabod kixk'e cho'q xk'ab'a' li k'uula'al, xb'aan naq kixye: “Li xloq'al li Yos ki'isiik sa' xyanqeb' laj Israel, xb'aan naq kichapmank li Loq'laj Kaax”. Kixye chi jo'kan xb'aan naq kichapmank li xLoq'laj Kaax li Yos ut kamenaqeb' chik li xb'eelom ut laj Elí.