1 Samuel 29 - Q'eqchi Bible

Laj David kisutq'isiik xb'aaneb' laj Filistea

¹ Eb' laj Filistea ke'xch'utub' chixjunileb' laj puub' aran Afek, ut eb' laj Israel ke'xk'ojob' li xmuheb'aaleb' chi xk'atq li yo'leb'aal ha' li wank Jisrehel.

² Eb' li xjolomileb' laj Filistea aj k'amol b'eheb' chiruheb' li ch'uutal aj o'k'aal (100) ut aj lajeek'aal rox o'q'ob' (1,000) aj puub'; ab'an laj David ut eb' li wankeb' rochb'een yookeb' chi xik chi ixb'ej, rochb'eeneb' laj Akis.

³ Toja' naq eb' li xjolomileb' laj Filistea ke'xye: “K'aru yookeb' arin eb' laj Hebreo a'in?”. Laj Akis kixsumeheb': “A'an laj David, laj k'anjel chiru laj Saúl, awab'ej re Israel. Jun malaj wiib' chihab' rokik wik'in, ut maak'a' k'aru ink'a' us xintaw rik'in chalen sa' rokik wik'in toj anaqwan”, chan.

⁴ Ab'anan eb' li xjolomileb' laj Filistea ke'josq'o'k rik'in laj Akis ut ke'xye re: “Taqla chi sutq'iik li winq a'an sa' li na'ajej li xak'e re. Mixik chiqix chi yalok. Mare anchal xik' tooril naq yooqo chi yalok. Xb'aan naq li jwal us re naq taa'ok wi' chik sa' rusilal laj Saúl, a'an li xk'utb'al li xjolomeb' laj puub' a'in.

⁵ Ma maawa' tab'i' a'an laj David li ke'xb'icha ru naq yookeb' chi xajok: «Laj Saúl xkamsi jun mileb' chi poyanam, ab'an laj David xkamsiheb' lajeeb' mil»?”.

⁶ Toja' naq laj Akis kixb'oq laj David ut kixye re: “Sa' xk'ab'a' li yo'yookil Yos ninye aawe naq tiik aach'ool ut xwaj naq xkohat raj chiwix chi yalok, xb'aan naq maak'a' k'aru ink'a' us xintaw aawik'in chalen aawokik wik'in toj anaqwan. Ab'anan moko sa ta ilb'ilat xb'aaneb' li xjolomileb' laj Filistea.

⁷ Jo'kan naq nintz'aama chawu naq tatsutq'iiq wi' chik sa' laana'aj. Ayu sa' tuqtuukilal re naq maak'a' taab'aanu li taapo'q wi' xch'ool eb' li xjolomileb' laj Filistea”.

⁸ Kichaq'ok laj David: “K'aru xinb'aanu? K'aru inmaak chawu chalen sa' li wokik aawik'in toj anaqwan, naq ink'a' truuq tinxik chawix chi yalok rik'ineb' li xik' neke'ilok re li awab'ej, laj eechal we?”, chan.

⁹ Ut laj Akis kixye re: “Ninnaw chi us naq chaab'ilat jo' jun x'ánjel li Yos. Ab'anan eb' li xjolomileb' laj Filistea xe'xye naq ink'a' truuq tatxik chirixeb' chi yalok.

¹⁰ Jo'kan utan wulaj eq'la waklin aawochb'eeneb' laj k'anjel chiru laj Saúl li wankeb' aawik'in, ut ayuqex sa' li na'ajej ink'ehom eere. Waklinqex eq'la ut xikaqex naq taakutano'q”.

¹¹ Wulajaq chik naq toj eq'la, laj David ut eb' li winq wankeb' rochb'een ke'wakliik re sutq'iik sa' xteepaleb' laj Filistea. Ut eb' laj Filistea koheb' Jisrehel.