1 Samuel 28 - Q'eqchi Bible

¹ Sa'eb' li kutan a'an eb' laj Filistea ke'xch'utub' eb' laj puub' re yalok rik'ineb' laj Israel, ut laj Akis kixye re laj David: “Ch'olch'o naq laa'at ut eb' li winq wankeb' aawochb'een tento texxik chiwix chi yalok”.

² Kichaq'ok laj David: “Us, matk'oxlak. Laa'in aj k'anjel chawu. Anaqwan taanaw k'aru tinb'aanu”, chan. Kixye laj Akis: “Tatinxaqab' chi junajwa cho'q aj k'aak'alehom we”.

Laj Saúl ut li ixq aj aatinanel rik'in kamenaq

³ Ak kamenaq chik laj Samuel, ut chixjunileb' laj Israel ke'yaab'ak chirix ut ke'xmuq aran Ramá, sa' li xtenamit. Laj Saúl ak kirisiheb' sa' xyanqeb' laj Israel chixjunileb' laj q'e ut eb' laj aatinanel rik'in kamenaq.

⁴ Ke'xch'utub' chaq rib' eb' laj Filistea ut kole'hilanq aran Sunén, ut laj Saúl kixch'utub' chixjunileb' laj Israel ut koxhilanq Jelbohé.

⁵ Naq laj Saúl kiril li xmuheb'aaleb' laj Filistea, k'ajo' naq kixiwak ut ki'ok xk'a'uxl.

⁶ Kipatz'ok rik'in li Qaawa', ab'an ink'a' kisumeek xb'aan a'an, chi moko sa' xmatk', chi moko chi b'uulinb'il, chi moko rik'in propeet.

⁷ Toja' naq laj Saúl kixye reheb' laj k'anjel chiru: “Sik'omaq we junaq ixq aj aatinanel rik'in kamenaq re naq tinxik chi patz'ok rik'in”. Kisumeek: “Arin Endor wank jun li ixq aj aatinanel rik'in kamenaq”.

⁸ Laj Saúl jalan li raq' kixk'e chirix, re naq ink'a' taanawe'q ru, ut koho rochb'een wiib' aj k'anjel chiru. Chi q'eq kiwulak rik'in li ixq ut kixye re: “Patz'on re junaq kamenaq ut b'oq chaq li xmusiq' li winq tinye aawe”, chan.

⁹ Kichaq'ok li ixq: “Laa'at nakanaw k'aru kixb'aanu laj Saúl sa' li tenamit a'in, chanru naq kirisiheb' laj q'e ut eb' laj aatinanel rik'in kamenaq. K'a' naq taawaj inra'lenkil re inkamsinkil?”, chan.

¹⁰ Ab'an laj Saúl kixye li raatin sa' xk'ab'a' li Qaawa': “Sa' xk'ab'a' li yo'yookil Yos -chan- ninye aawe naq maak'a' rahilal taachalq sa' aab'een wi taab'aanu a'an”.

¹¹ Kixye li ixq: “Ani tinpatz'oq wi' chawix?”. Kichaq'ok laj Saúl: “Patz'on re laj Samuel”, chan.

¹² Naq li ixq kiril laj Samuel, kixjap re xb'aan xxiw ut kixye re laj Saúl: “K'a'ut naq xinaab'alaq'i? Laa'at aj Saúl!”.

¹³ Ab'an li awab'ej kixye re: “Matxiwak. K'aru xawil?”. Kichaq'ok li ixq: “Jun musiq'ej li yo chaq chi elk sa' xchamal li ch'och'”, chan.

¹⁴ “Chan na'ilok?”, chan laj Saúl. Kisumeek: “A'an jun cheekel winq li yo chaq chi taqe'k chi b'atb'o chaq sa' xt'ikr”. Tikto laj Saúl kixtaw ru naq a'an laj Samuel, kiwiq'laak chiru ch'och' ut kixhupub' rib'.

¹⁵ Toja' naq laj Samuel kixye re laj Saúl: “K'a' naq nikinaach'i'ch'i'i ut nikinaapatz'?”. Kichaq'ok laj Saúl: “Wankin sa' jun nimla ch'a'ajkilal: eb' laj Filistea yookeb' chi yalok wik'in ut li Yos xinxkanab'. Ink'a' chik nikinxsume chi moko rik'ineb' propeet, chi moko sa' inmatk'. Jo'kan naq xatinb'oq chaq re naq taaye we k'aru tinb'aanu”.

¹⁶ Kixye laj Samuel: “K'a' naq nakatpatz'ok we wi xatxkanab' li Qaawa' ut xik' chik nakatril?

¹⁷ Li Qaawa' xb'aanu aawe jo' chanru yeeb'il chi xtz'uumal we: xmaq' laa'awab'ejihom ut re jalan chik xq'axtesi. Kixxaqab' xwankil laj David

¹⁸ xb'aan naq ink'a' xawab'i xyaab' xkux li Qaawa' ut ink'a' xapaab' laataqlankil xb'aan: ink'a' xasach ruheb' laj Amalek. Jo'kan naq li Qaawa' kixb'aanu a'in aawe,

¹⁹ ut tatxq'axtesi laa'at jo'wi' chixjunileb' laj Israel sa' ruq'eb' laj Filistea. Wulaj laa'at ut eb' laawalal texkamq ut wanqex wik'in. Li Qaawa' xq'axtesi ajwi' eb' laj puub' aj Israel sa' ruq'eb' laj Filistea”.

²⁰ T'anaamil laj Saúl chiru ch'och', ut jwal nim roq. Sachso xch'ool xb'aan li raatin laj Samuel, jo'wi' anchal lub'lu aj chik xb'aan naq toj maak'a' naxtzeka chalen chiru jun kutan ut li q'oqyink.

²¹ Naq li ixq kiril naq sachso xch'ool laj Saúl, kijilok chi xk'atq ut kixye re: “At awab'ej, chakuy inmaak. Xwab'i xyaab' aakux ut kach'in chik maa xsachk li xyu'am xb'aan xpaab'ankil laawaatin.

²² Nintz'aama b'i' chawu naq laa'at ajwi' taawab'i xyaab' inkux: tink'e kach'inaq aatzekemq re naq tk'ulunq aach'ool ut taachap wi' chik aab'e”.

²³ Laj Saúl ink'a' kiraj ut kixye: “Ink'a' nawaj wa'ak”, chan. Ab'an eb' laj k'anjel chiru rochb'een li ixq ke'relaji ru toj reetal kixk'ulub'an xch'ool. Kixaqliik ut kichunlaak sa' li warib'.

²⁴ Li ixq wank jun saaj wakax, ch'oolaninb'il chi us: kixkamsi ut kixk'uub'. Kixchap ajwi' xk'aj, kixyoq' ut kixyiib' wa ink'a' yuub'il.

²⁵ Chirix chik a'an kixk'e chixjunil re laj Saúl ut reheb' laj k'anjel chiru, li ke'wa'ak, ke'xaqliik ut koheb' sa' ajwi' li q'oqyink a'an.