1 Samuel 27 - Q'eqchi Bible

Laj David sa' xyanqeb' laj Filistea

¹ Laj David kixye sa' xch'ool: “Taawulaq xq'ehil naq laj Saúl tinxkamsi. Jwal us naq tinxik sa' xteepal Filistea re naq laj Saúl tixkanab' insik'b'al sa' chixjunil Israel ut tinkole'q chiru”.

² Jo'kan naq laj David kixchap xb'e ut, rochb'een li lajeek'aal xkab' o'q'ob' (600) chi winq, koho wan wi' laj Akis, ralal laj Mahok, awab'ej re Gat.

³ Rochb'een chixjunileb' laj puub', kina'ajunk aran Gat, wan wi' laj Akis; li junjunq kikanaak aran rochb'een li xjunkab'al. Laj David wank xkab'ichaleb' li rixaqil rik'in: a' lix Ajinohán aj Jisrehel ut lix Abigahil, li kiwank cho'q rixaqil laj Nabal aj Karmeel.

⁴ Naq laj Saúl kirab'i resil naq laj David xikenaq eelel aran Gat, kixkanab' xsik'b'al.

⁵ Sa' jun kutan laj David kixye re laj Akis: “Wi usilal xintaw chawu, nintz'aama naq taak'e inna'aj sa' jun reheb' laatenamit re naq aran chik tinwanq, xb'aan naq moko us ta naq laj k'anjel chawu taawanq chak'atq sa' li xnimal ru aatenamit”, chan.

⁶ Sa' ajwi' li kutan a'an laj Akis kixk'e Siklak cho'q xna'aj ut chalen toj anaqwan Siklak kikanaak cho'q reheb' li awab'ej re Judá.

⁷ Jun chihab' rik'in kaahib' po kiwank laj David sa' xteepal Filistea,

⁸ ut rochb'eeneb' laj puub' naxikje'k chi yalok rik'ineb' laj Jesur, eb' laj Késer ut rik'ineb' laj Amalek (a'ineb' li wankeb' sa' li na'ajej a'an, chalen chaq Telán toj Sur ut sa' xnub'ajlil Ejiipt).

⁹ Laj David nasachok sa' li tenamit nawulak wi', ut maak'a' winq chi moko ixq naxkanab' chi yo'yo. Nareechaniheb' li karneer ut eb' li b'ooyx, eb' li b'uur, li kameey ut eb' li aq'ej, ut chirix a'an nasutq'iik wi' chik rik'in laj Akis.

¹⁰ Ut laj Akis naxpatz' reheb': “B'ar xexwulak chi sachok sa' li kutan a'in?”, chan; ut laj David naxsume: “Xoowulak Nejeb re Judá”, malaj: “Xoowulak Nejeb re Jerajmehel”, malaj: “Xoowulak Nejeb reheb' laj Ken”, chan.

¹¹ Maajun winq ut maajun ixq naxkanab'eb' chi yo'yo re naq ink'a' te'xik Gat chi jitok ut xyeeb'al resil li k'aru xb'aanu. Jo'ka'in kixb'aanu laj David jo' najtil kiwank sa' xteepal Filistea.

¹² K'ojk'o xch'ool laj Akis rik'in laj David; naxk'oxla: “Ch'olch'o naq laj David xik' chik na'ile'k xb'aaneb' laj Israel li rech tenamitul, ut a'anaq aj k'anjel chiwu chi junelik”, chan sa' xch'ool.