1 Samuel 24 - Q'eqchi Bible

Laj David kixkuy xmaak laj Saúl

¹ Naq kiraqe'k chi yalok rik'ineb' laj Filistea, kiyehe'k resil re laj Saúl naq laj David wank sa' li chaqich'och' re En-gadi.

² Toja' naq laj Saúl kixk'ameb' lajeek'aal xwaqxaq o'q'ob' (3,000) chi winq sik'b'ileb' ru sa' xyanqeb' chixjunileb' laj Israel ut koho chi xsik'b'al laj David jo'wi' li wankeb' rochb'een, sa' xyanqeb' li saqoonak li neke'wank wi' li yuk.

³ Naq kiwulak sa' jun li na'ajej neke'ch'utlaak wi' eb' li karneer chire li b'e, laj Saúl kixk'e reetal naq aran wank jun li ochoch pek, ut ki'ok aran chi b'ehib'k. Laj David ut eb' li rochb'een wankeb' chaq toj chisa' li ochoch pek.

⁴ Toja' naq eb' li rochb'een ke'xye re laj David: “K'e reetal, a'an a'in li kutan kixye resil aawe li Qaawa': «Tink'e sa' aawuq' li xik' na'ilok aawe; b'aanu re li k'aru taawaj»”. Kixaqliik laj David ut timil timil kixset kach'in li raq' laj Saúl.

⁵ Ab'an moqon chik kiraho'k xch'ool naq kixset kach'in li raq' laj Saúl:

⁶ “Li Qaawa' taxaq chikoloq we chi xb'aanunkil rahilal re li awab'ej, a' li sik'b'il ru xb'aan li Qaawa'. Maajoq'e tintaqsi wuq' sa' xb'een, xb'aan naq a'an yulb'il xb'aan li Qaawa'”, chan reheb' laj puub'.

⁷ Jo'ka'in naq laj David kixq'useb' chi kaw li wankeb' rochb'een naq me'xik sa' xb'een laj Saúl. A'in ki'elk sa' li ochoch pek ut kixchap wi' chik xb'e.

⁸ Tikto ki'elk ajwi' laj David sa' li ochoch pek ut kixjap re chi xyeeb'al re laj Saúl: “At awab'ej, at aj eechal we!”, chan. Naq laj Saúl ki'ilok chirix, laj David kixk'utzub' rib' chiru ch'och', kixb'uchub' rib'

⁹ ut kixye re laj Saúl: “K'a'ut naq nakapaab' eb' li poyanam li neke'yehok: «Laj David yo chi xsik'b'al aasachb'al»?

¹⁰ Anaqwan ajwi' xak'e reetal naq li Qaawa' xatxk'e sa' wuq' sa' li ochoch pek. Wankeb' li xe'xye we naq tatinkamsi, ab'anan xinkuy aamaak xb'aan naq xinye sa' inch'ool: «Ink'a' tintaqsi wuq' sa' xb'een laj eechal we, xb'aan naq a'an yulb'il xb'aan li Qaawa'».

¹¹ K'e reetal, at inyuwa'; il li xmaril laawaq' sa' wuq'. Xinset li xmaril laawaq' ut ink'a' xatinkamsi! Jo'kan naq taak'e reetal naq maak'a' lab'al sa' li waanm ut maak'a' maa'usilal wik'in. Laa'in ink'a' xinmaakob'k chawu, a'ut laa'at yookat xsik'b'al inkamsinkil.

¹² A' taxaq li Qaawa' chiraqoq aatin sa' qayanq ut chi'eeqajunq aawe inb'aan; ab'an laa'in maajaruj tintaqsi wuq' sa' aab'een.

¹³ Wank jun li aatin ke'xye li qaxe'toonil yuwa': «Eb' li ink'a' useb' xch'ool, a'aneb' li neke'b'aanunk maa'usilal», chankeb'. Jo'kan naq laa'in maajoq'e tintaqsi wuq' sa' aab'een.

¹⁴ Jun chik. Ani sa' aj b'een xchalk li awab'ej re Israel? Sa' inb'een laa'in. Ani taawaj xkamsinkil? Laa'in li chanchanin junaq kamenaq tz'i' ut junaq k'aq.

¹⁵ A' taxaq li Qaawa' chiraqoq aatin sa' qayanq. A'an chi'iloq ut chitenq'anq we rik'in inkolb'al sa' laawuq'”.

¹⁶ Naq laj David kiraqe'k chi xyeeb'al a'in, laj Saúl kixye: “At David, at walal, ma laa'at li yookat chi aatinak?”, chan. Ut chi kaw xyaab' xkux kixchaj re chi yaab'ak

¹⁷ ut kixye re laj David: “Yaal ajwi' li nakaye; laa'in wank inmaak. Laa'at usilal nakab'aanu we, a'ut laa'in ink'a' us nink'e cho'q reeqaj.

¹⁸ Sa' li kutan a'in xak'ut chiwu laachaab'ilal, xb'aan naq li Qaawa' xinxk'e sa' laawuq', ab'an laa'at ink'a' xinaakamsi.

¹⁹ Wi junaq winq naxtaw li xik' na'ilok re, maajoq'e tixkanab' chi xik sa' tuqtuukilal. Li Qaawa' chiq'ajkamunq aawe sa' xk'ab'a' li usilal xab'aanu we sa' li kutan a'in.

²⁰ Anaqwan ch'olch'o chiwu naq tat-ok cho'q awab'ej ut sa' aak'ab'a' laa'at xaqxooq chi kaw xwankil li tenamit Israel.

²¹ Ka'ajwi' nintz'aama chawu, ye we sa' jurament sa' xk'ab'a' li Qaawa' naq chirix linkamik ink'a' taasacheb' ru li walal ink'ajol ut ink'a' taasache'q link'ab'a' sa' xyanqeb' li xjunkab'al linyuwa'”.

²² Ut laj David kixye li raatin chiru laj Saúl naq ink'a' tixkamsi eb' li ralal xk'ajol chi moko tixsach li xk'ab'a'. Chirix chik a'an laj Saúl koho sa' rochoch, ut laj David rochb'eeneb' laj puub' koheb' wi' chik chi xmuqb'al rib'eb'.