1 Samuel 23 - Q'eqchi Bible

Laj David kixkol li tenamit Kehilá

¹ Sa' jun kutan kiyehe'k resil re laj David naq eb' laj Filistea yookeb' chi yalok rik'ineb' laj Kehilá ut ke'relq'a xsa' chixjunil li na'ajej k'uulanb'il wi' li triiw.

² Toja' naq laj David kipatz'ok re li Qaawa': “Ma tinxik chi yalok rik'ineb' laj Filistea a'an?”, chan. Kisumeek xb'aan li Qaawa': “Ayu chi yalok rik'ineb' laj Filistea ut taakol li tenamit Kehilá”.

³ Ab'anan eb' li winq li wankeb' rochb'een laj David ke'xye re: “K'e reetal, arin Judá yo qaxiw. Ma toja' ta chik naq tooxik Kehilá chi yalok rik'ineb' laj Filistea?”.

⁴ Jo'kan naq laj David koho wi' chik chi patz'ok rik'in li Qaawa', ut A'an kichaq'ok: “Xaqlin, ayu chi yalok chirixeb' laj Kehilá, xb'aan naq xinq'axtesiheb' laj Filistea sa' laawuq'”.

⁵ Laj David rochb'eeneb' laj puub' koheb' Kehilá, ke'yalok rik'ineb' laj Filistea, ke'xq'ax ruheb' ut ke'reechani li xketomqeb'. Jo'ka'in naq laj David kixkoleb' laj Kehilá.

⁶ Naq laj Abiatar, ralal laj Ajimélek, koho eelel wan wi' laj David, kikub'eek aran Kehilá chi wank li efod sa' ruq'.

⁷ Kiyehe'k resil re laj Saúl naq okenaq laj David sa' li tenamit Kehilá. Toja' naq kixye sa' xch'ool: “Li Yos xq'axtesi sa' wuq' laj David, xb'aan naq xjunes xtz'ap rib' sa' jun tenamit li wank xtz'apb'al rokeb'aal ut wank xlaawil”.

⁸ Tikto laj Saúl kixb'oq chixjunileb' li poyanam chi xik Kehilá re yalok ut xsutb'al laj David rochb'eeneb' laj puub'.

⁹ Ab'an laj David naq kixnaw naq laj Saúl yo chi xk'uub'ankil li xkamik, kixye re laj Abiatar laj tij: “K'am chaq li efod”;

¹⁰ ut kitijok chi kama'in: “At Qaawa', xYos laj Israel, xwab'i naq laj Saúl taaraj chalk arin Kehilá chi xsachb'al li tenamit sa' ink'ab'a'.

¹¹ Ma relik chi yaal naq taakub'eeq chaq laj Saúl, jo' xwab'i? Ma tine'xq'axtesi sa' ruq'eb' laj Kehilá? At Qaawa', xYos laj Israel, nintz'aama chawu naq taasume lintij”. Ut li Qaawa' kixsume: “Taakub'eeq chaq”, chan.

¹² Toja' naq laj David kixpatz': “Ma tine'xq'axtesi eb' laj Kehilá sa' ruq' laj Saúl, laa'in ut eb' laj puub'?”. Kichaq'ok li Qaawa' ut kixye: “Texq'axtesiheb'”, chan.

¹³ Toja' naq koheb' laj David ut eb' laj puub' (wankeb' tana lajeek'aal xkab' o'q'ob' chi winq), ke'elk Kehilá ut ke'xb'eeni rib'eb'. Ut naq laj Saúl kirab'i resil li relik laj David sa' li tenamit Kehilá, kixjal xk'a'uxl ut ink'a' chik koho Kehilá.

Laj David sa' li chaqich'och'

¹⁴ Laj David kikanaak chi wank chi muqmu sa' li chaqich'och', sa'eb' li tzuul re li chaqich'och' re Sif. Ut us ta laj Saúl ink'a' naxkanab' xsik'b'al, li Yos ink'a' kixq'axtesi sa' ruq'.

¹⁵ Yo xxiw laj David, xb'aan naq laj Saúl ki'elk chi xsik'b'al re xkamsinkil. Jo'kan naq junes nawank aran Jorsa, sa' li chaqich'och' re Sif.

¹⁶ Sa' jun kutan laj Jonatán, ralal laj Saúl, kixchap xb'e ut koho wan wi' laj David aran Jorsa re xk'ojob'ankil xch'ool sa' xk'ab'a' li Qaawa'.

¹⁷ Kixye re: “Matxiwak, xb'aan naq laj Saúl linyuwa' ink'a' truuq tatxtaw. Laa'at tat-ok cho'q awab'ej re Israel ut laa'inaq li xkab'il chi taqlank. A' ajwi' linyuwa' naxnaw a'an”.

¹⁸ Ut xkab'ichaleb' ke'xk'uub' jun sumwank chiru li Qaawa'. Chirix chik a'an laj David kikanaak Jorsa ut laj Jonatán kisutq'iik sa' rochoch.

¹⁹ Ab'an eb' laj Sif koheb' Kibehá wan wi' laj Saúl chi xyeeb'al re: “Laj David muqmu sa' li qana'aj, sa'eb' li saqoonak re Jorsa, sa' li tzuul Jakilá li wank sa' xjayal rokeb'l iq' re li chaqich'och'.

²⁰ At awab'ej, laa'o naqanaw naq nakawaj chi anchal aach'ool chalk sa' qayanq chi xchapb'al. Jo'kan b'i', chalqat ut laa'o tooq'axtesinq re sa' laawuq'”.

²¹ Kichaq'ok laj Saúl ut kixye: “Li Qaawa' chi'osob'tesinq eere xb'aan naq xetoq'ob'a wu.

²² Ayuqex, tz'ilomaq rix ut chek'e reetal chi us b'ar wank ut ani x'ilok re aran, xb'aan naq xwab'i resil naq q'axal seeb' xch'ool.

²³ Ilomaq ut k'ehomaq reetal chixjunileb' li na'ajej b'arwi' naru tixmuq rib', ut naq akaq xch'olaak chixjunil cheru, toleeye we ut laa'in tinxik cherix. Ut wi relik chi yaal wanq aran, tinsik'i chi us sa' chixjunileb' li xjunkab'aleb' laj Judá”.

²⁴ Eb' laj Sif ke'xchap xb'eheb' ut koheb' Sif, aj k'amol b'eheb' chiru laj Saúl. Laj David ut eb' li rochb'een wankeb' sa' li chaqich'och' re Mahón, sa' li taq'a ru, sa' xjayal rokeb'l iq' re li chaqich'och'.

²⁵ Koheb' laj Saúl ut eb' li wankeb' rochb'een chi xsik'b'al laj David, ab'anan kiyehe'k resil re laj David ut a'in kikub'eek sa' li saqoonak li wank sa' li chaqich'och' re Mahón.

²⁶ Laj Saúl ut eb' laj puub' wankeb' junpak'al li tzuul, ut laj David ut eb' li wankeb' rochb'een yookeb' chi xik sa' li pak'al jun chik, neke'rumb'ak chi elelik chiru laj Saúl. Naq laj Saúl ut eb' laj puub' ak ke'xsut laj David ut eb' li winq rochb'een re xchapb'aleb',

²⁷ kiwulak jun aj esil chi xyeeb'al re laj Saúl: “Seeb'a aawib', kim chi junpaat, xb'aan naq eb' laj Filistea xe'ok sa' li qatenamit!”, chan.

²⁸ Toja' naq laj Saúl kixkanab' xsik'b'al laj David ut koho chi yalok rik'ineb' laj Filistea. Jo'kan naq li na'ajej a'an “Xsaqoonakil li chaq'rab'ik” naxk'ab'a'in.

²⁹ Ut laj David ki'elk sa' li na'ajej a'an ut koxna'ajunq chi muqmu aran En-gadi.