1 Samuel 22 - Q'eqchi Bible

¹ Laj David ki'elk aran ut koxmuq rib' sa' li ochoch pek wan chaq Adulán. Naq eb' li ras riitz'in jo'wi' chixjunileb' li rech'alal ke'xnaw a'an, koheb' rik'in.

² Chixjunileb' li rahob'tesinb'ileb', li wankeb' xk'as ut jo'k'ihaleb' wankeb' sa' rahilal ke'xjunaji rib' rik'in laj David, ut a'in kikanaak cho'q aj k'amol xb'eheb'. Jun o'q'ob' (400) tana chi winq li wankeb' rochb'een.

³ Chirix chik a'an laj David ki'elk aran ut koho Mispé, sa' xteepal Mohab, ut kixye re li awab'ej re Mohab: “Chakuy inmaak, nintz'aama usilal naq chakanab'eb' chi wank linna' linyuwa' eerik'in; tojo' yaal naq tinnaw k'aru tixb'aanu li Yos wik'in”.

⁴ Ut laj David kixk'am li xna' xyuwa' rik'in li awab'ej re Mohab, ut ke'kanaak aran jo' najtil kiwank laj David chi muqmu.

⁵ Toja' naq laj Gad li propeet kixye re laj David: “Maamuq chik aawib'. Elen arin ut ayu sa' xteepal Judá”, chan. Jo'kan naq laj David koho ut kiwulak sa' li k'iche' re Jéret.

Naq ke'kamsiik eb' laj tij wankeb' Nob

⁶ Laj Saúl wan chaq Kibehá, taqe'q, rub'el jun toon chi tamarisko, chi wank li xjutz' che' sa' ruq' ut sutsu xb'aaneb' chixjunileb' laj k'anjel chiru.

⁷ Kixye laj Saúl reheb' chixjunileb' laj k'anjel chiru li wankeb' rochb'een: “Ex aj Benjamín, chineerab'ihaq. Ma nekek'oxla naq li ralal laj Jesé tixk'e eech'och' ut eerawimq chejunilex, ut texxaqab' cho'q xjolomileb' laj puub'?

⁸ Chejunilex xek'amchi'i eerib' chiwix, ut maajun eere xyehok we naq li walal xk'ojob' jun sumwank rik'in li ralal laj Jesé. Maajun eere xtoq'ob'ank wu ut xye ta we naq li walal xtakchi'i' laj k'anjel chiwu re naq tinxkamsi, jo' yo chi xb'aanunkil anaqwan”.

⁹ Toja' naq laj Dohek aj Edom, li wank sa' xyanqeb' laj k'anjel chiru laj Saúl, kixsume: “Laa'in xwil li ralal laj Jesé chi wulak Nob, wan wi' laj Ajimélek, ralal laj Ajitub.

¹⁰ Ut laj Ajimélek kipatz'ok re li Qaawa' chirix laj David; kixk'e xtzekemq ut kixk'e ajwi' li xch'iich' laj Goliat aj Filistea”, chan.

¹¹ Toja' naq li awab'ej kixtaqla xb'oqb'al laj Ajimélek, ralal laj Ajitub, jo'wi' chixjunileb' li rech'alal li wankeb' cho'q aj tij aran Nob. Ut chixjunileb' ke'k'ulunk rik'in li awab'ej.

¹² “Ab'i, ralal laj Ajitub”, chan laj Saúl. Ut laj Ajimélek kixye: “We'kin, at awab'ej”.

¹³ Laj Saúl kixye re: “K'a'ut naq yookex chi xk'amchi'inkil eerib' sa' inb'een, laa'at ut li ralal laj Jesé? Laa'at xak'e xwa; xak'e ajwi' xch'iich' re yalok, ut xapatz' re li Qaawa' k'aru tixb'aanu, re naq xik' tinril ut tinxkamsi. Ut a'an ajwi' yo chi xb'aanunkil anaqwan”.

¹⁴ Kichaq'ok laj Ajimélek ut kixye: “Ani sa' xyanqeb' chixjunileb' laj k'anjel chawu jwal chaab'il chiru laj David, xhi' li awab'ej, xjolomileb' laj k'aak'alehom aawe, ut oxloq'inb'il sa' laawochoch?

¹⁵ Ma toj anaqwan tab'i' xintikib' patz'ok chirix chiru li Yos? Ink'a'. At awab'ej, maajit laj k'anjel chawu chi moko eb' li wech'alal, xb'aan naq laj k'anjel chawu tik maak'a' naxnaw chirix li na'leb' a'in”.

¹⁶ Ab'an li awab'ej kixye wi' chik: “At Ajimélek, ch'olch'o naq tatkamq laa'at jo'wi' chixjunileb' laawech'alal”.

¹⁷ Tikto li awab'ej kixye reheb' laj k'aak'alehom re li wankeb' chi xk'atq: “Ayuqex chi xkamsinkileb' laj tij chiru li Qaawa'. Eb' a'an ajwi' neke'okenk chirix laj David, xb'aan naq, us ta neke'xnaw naq yo chi elelik, ink'a' xe'xye we”. Ab'an eb' laj k'anjel chiru li awab'ej ink'a' ke'raj xkamsinkileb' laj tij chiru li Qaawa'.

¹⁸ Jo'kan naq li awab'ej kixye re laj Dohek: “Jilon laa'at ut kamsiheb' laj tij”. Tikto laj Dohek aj Edom kixkut rib' sa' xb'eeneb' laj tij ut, sa' li kutan a'an, kixkamsiheb' oob' ro'k'aal chi winq li neke'roksi li efod liin.

¹⁹ Sa' li tenamit Nob, xtenamiteb' laj tij, laj Saúl kixkamsi chixjunileb' chi ch'iich': winq, ixq, kok'al ut k'uula'al li toj neke'tu'uk, b'ooyx, b'uur ut karneer.

²⁰ Ka'ajwi' jun ralal laj Ajimélek, ralal laj Ajitub, aj Abiatar xk'ab'a', kiruhank chi elelik ut koho eelel wan wi' laj David.

²¹ Ut naq kixye re laj David naq laj Saúl kixkamsiheb' laj tij chiru li Qaawa',

²² kisumeek: “Sa' li kutan naq xwil ru laj Dohek aj Edom, tikto xink'oxla naq a'an tixye resil re laj Saúl. Laa'in wank we naq xe'kamsiik chixjunileb' li xkomoneb' laayuwa'.

²³ Ab'anan kanaaqat wik'in; matxiwak. Ani taa'ajoq aakamsinkil, traj ajwi' inkamsinkil laa'in. Matk'oxlak: wik'in laa'in ilb'ilaqat chi us”.