1 Samuel 21 - Q'eqchi Bible

Laj David ki'elelik chiru laj Saúl

¹ Laj David kiwulak Nob, b'arwi' wank laj Ajimélek laj tij. A'in kisachk xch'ool chi rilb'al laj David ut kixpatz' re: “K'a'ut naq aajunes xatchalk, chi maajun na'ochb'eenink aawe?”, chan.

² Laj David kixsume laj Ajimélek laj tij: “Li awab'ej xk'e chaq jun intaqlankil ut xye ajwi' naq maa'ani chinawoq re li k'aru chaq'rab'inb'ilin ut taqlanb'ilin wi'. Ut eb' laj k'anjel chiwu xinb'oqeb' sa' jun li na'ajej.

³ Ab'anan, chakuy inmaak, k'aru wank aawe? K'e oob'aq inwa malaj li k'aru wank sa' laawochoch”.

⁴ Kichaq'ok laj tij ut kixye re laj David: “Junes mayejanb'il wa wank anaqwan; maak'a' yal wa wik'in. Ab'anan tink'e aawe wi eb' laj k'anjel chawu ink'a' xe'wank rik'in ixq”.

⁵ Kisumeek xb'aan laj David: “Rajlal naq nokooxik chi yalok, ink'a' nokooch'e'ok ixq. Eb' laj k'anjel chiwu xe'xra rib' naq xoo'elk, us ta li qataqlankil a'in maak'a' xloq'al. Anaqwan saq ru li xtz'ejwaleb'”.

⁶ Toja' naq laj tij kixk'e li mayejanb'il wa re laj David, xb'aan naq aran ka'ajwi' li wa a'an wank, a' li q'axtesinb'il re li Qaawa' ut xokb'il sa' li kutan nak'eemank wi' li ak' wa cho'q reeqaj, sa' li artal.

⁷ Sa' li kutan a'an wank aran jun aj k'anjel chiru laj Saúl; kikanaak aran chi xb'aanunkil jun li xtaqlankil chiru li Qaawa'. Li winq a'an aj Dohek xk'ab'a', aj Edom, xjolomileb' laj k'aak'alenel xketomq laj Saúl.

⁸ Kixye laj David re laj Ajimélek: “Ma maak'a' arin aawik'in junaq jutz' che' malaj jutz' ch'iich'? Li awab'ej xinxtaqla chi junpaat; jo'kan naq ink'a' xink'am chaq linjutz' ch'iich' chi moko junaq ink'anjelob'aal re yalok”.

⁹ Kichaq'ok laj tij: “Wank arin li xjutz' ch'iich' laj Goliat, a' laj Filistea li xakamsi laa'at sa' xtaq'ahil Elá. Lanlo sa' t'ikr chirix li efod. Wi taawaj, xok. Maak'a' chik junaq ch'iich' chirix a'an”, chan. Kixye laj David: “K'e we a'an. Maak'a' chik ch'iich' q'axal chaab'il jo' a'an”.

¹⁰ Sa' li kutan a'an ki'elelik laj David chiru laj Saúl ut koxk'ut rib' chiru laj Akis, awab'ej re Gat.

¹¹ Ut eb' laj k'anjel chiru laj Akis ke'xye: “Ma maawa' tab'i' a'in laj David, li awab'ej re li na'ajej a'in? Ma maawa' a'in li ke'xb'icha ru naq yookeb' chi xajok: «Laj Saúl xkamsi jun mileb' chi poyanam, ab'an laj David xkamsiheb' lajeeb' mil»?”.

¹² Laj David kixk'uula sa' xch'ool li aatin a'in ut k'ajo' naq ki'ok xxiw chiru laj Akis, awab'ej re Gat.

¹³ Kixb'aanu rib' naq ink'a' tuqtu xjolom, kixk'e rib' jo' kaan ru chiruheb': na'okje'k chi xt'okt'okinkil re li kab'l ut nat'aynakje'k xya'al re sa' li xmach.

¹⁴ Toja' naq laj Akis kixye reheb' laj k'anjel chiru: “Ilomaq li winq a'in kaan ru. K'a' aj e naq xek'am chaq wik'in?

¹⁵ Ma xmajeleb' kaan ru sa' li na'ajej a'in naq xek'am chaq a'in re tixb'aanu xmemil chiwu? Maajoq'e taa'ok sa' li wochoch”.