1 Samuel 17 - Q'eqchi Bible

¹ Eb' laj Filistea ke'xch'utub'eb' laj puub' aran Sokó, sa' xteepal Judá; ke'xkawresi rib' re yalok ut ke'xyiib' li xmuheb'aaleb' aran Fesdamín, sa' xyanq Sokó rik'in Aseká.

² Jo'kan ajwi' laj Saúl ut eb' laj Israel ke'xch'utub' rib' sa' xtaq'ahil Elá, ut ke'xtzolob' rib' re yalok rik'ineb' laj Filistea.

³ Eb' a'in wankeb' sa' xb'een jun li tzuul ut eb' laj Israel wankeb' sa' xb'een li tzuul jun chik; sa' xyiheb' wank li taq'a.

Laj David ut laj Goliat

⁴ Ki'elk chaq sa' xyanqeb' laj Filistea jun li winq yo'oon chi yalok, aj Goliat xk'ab'a', Gat xtenamit, wiib' moqoj li xteram.

⁵ Laj Goliat wank chi xjolom jun punit yiib'anb'il rik'in q'anch'iich', ut jun xkoleb' re xch'ool tz'ulb'il rik'in q'anch'iich', o'k'aal chi liib'r tana li raalal.

⁶ Wank ajwi' ramleb' tzelek yiib'anb'il rik'in q'anch'iich' ut jun xnimla jutz' q'anch'iich' sa' xb'een xtel.

⁷ Li xche'ul li xjutz' ch'iich' kama' wi' li xb'atleb' noq' laj kemonel, ut li xch'iich'ul wank tana kab'laju liib'r raalal. Laj tenq' re, k'amol b'e chiru.

⁸ Laj Goliat kixaqliik ut kixjap re chi xyeeb'al reheb' laj Israel: “K'a' naq xexchalk chi tzoltzo re yalok? Laa'in aj Filistea ut laa'ex aj k'anjel chiru laj Saúl. Sik'omaq ru junaq winq sa' eeyanq li taachalq chi yalok wik'in.

⁹ Wi a'an naxnaw yalok wik'in ut tinxkamsi, laa'ohaq aj k'anjel cheru. Ab'an wi laa'in tinq'axoq ru ut tinkamsi li winq a'an, laa'exaq qamun ut texk'anjelaq chiqu.

¹⁰ Anaqwan laa'in tinchiq' chi yalok eb' laj Israel. K'ehomaq chaq we junaq winq re taayaloq wik'in”, chan laj Goliat.

¹¹ K'ajo' naq ke'chalk xxiw ut ke'ok xk'a'uxl laj Saúl ut chixjunileb' laj Israel naq ke'rab'i li raatin laj Filistea!

¹² Laj David a'an ralal jun li winq aj Efratá, Belén li xtenamit, sa' xteepal Judá. Li winq a'an, aj Jesé xk'ab'a', wank waqxaqib' chi ralal; ak tiix chi us naq laj Saúl wan chaq cho'q awab'ej.

¹³ Oxib'eb' li ralal laj Jesé ak xikenaqeb' chi yalok chirix laj Saúl. Li xk'ab'a'eb' a'an: laj Eliab li xb'een, laj Abinadab li xkab', ut laj Samá li rox.

¹⁴ Laj David a'an li iitz'inb'ej sa' xyanqeb' li waqxaqib' chi ralal. Eb' li oxib' chi asb'ej koheb' chirix laj Saúl,

¹⁵ ab'an laj David rajlal nawulak rik'in laj Saúl ut nasutq'iik wi' chik Belén chi xk'aak'alenkileb' li xkarneer li xyuwa'.

¹⁶ Chiru ka'k'aal kutan laj Goliat kixk'ut rib' eq'la ut ewu chi xchiq'b'al xjosq'ileb' laj Israel.

¹⁷ Sa' jun kutan kixye laj Jesé re laj David li ralal: “K'am li jun toqol koxtal chi k'ilinb'il triiw a'in ut eb' li lajeeb' chi wa a'in, ut ayu sa' aanil rik'ineb' laawas sa' xmuheb'aaleb' laj puub'.

¹⁸ Ut li lajeeb' chi rekesón a'in k'am cho'q re li xjolomileb' laj puub'. Ab'i chaq chanru wankeb' laawas ut k'am chaq junaq reetalil naq saheb' sa' xch'ool.

¹⁹ Laj Saúl, eb' laawas ut chixjunileb' laj Israel wankeb' aran sa' xtaq'ahil Elá, chi yalok rik'ineb' laj Filistea”.

²⁰ Sa' li kutan jun chik toj eq'la kiwakliik laj David, kixkanab'eb' li karneer rik'in jun chik aj k'aak'alenel, kixxok li k'a' re ru ut koho jo' chanru kiyehe'k re xb'aan laj Jesé. Naq kiwulak wankeb' wi' li xmuheb'aaleb' laj puub', ak xikeb' re chi yalok ut yookeb' chi xjapb'al reheb'.

²¹ Eb' laj Israel ut eb' laj Filistea ke'xtzolob' rib' re yalok, li jun sa' xjayal li jun chik.

²² Tikto laj David kixkanab' li riiq rik'in laj ilol re li k'a'aq re ru, koho sa' aanil b'ar ch'utch'uukeb' wi' laj puub' ut koxpatz' reheb' li ras chan rilb'aleb'.

²³ Toj yo chi aatinak rik'ineb', naq laj Goliat, laj puub' aj Gat re Filistea, ki'elk chaq sa' xyanqeb' laj Filistea ut kixtikib' wi' chik xhob'b'aleb' laj Israel jo' naxb'aanu rajlal kutan; ut ki'ab'iik xb'aan laj David.

²⁴ Naq eb' laj Israel ke'ril li winq a'an, k'ajo' naq ke'xiwak ut ke'elelik chiru,

²⁵ yookeb' chi xyeeb'al: “Ma xeril li winq a'an? Qahob'b'al laa'o naq yo chi k'ulunk. Li ani taakamsinq re, li awab'ej tixk'e naab'al li xb'ihomal. Tixk'e ajwi' li xrab'in, ut ink'a' chik te'patz'e'q xtoj li rech'alal sa' xyanqeb' laj Israel”.

²⁶ Toja' naq laj David kixpatz' reheb' li wankeb' chi xk'atq: “K'aru taak'ehe'q re li ani taakamsinq re laj Filistea a'an ut trisi li xutaan wank sa' xb'eeneb' laj Israel? Ani li winq a'an li maak'a' xpaab'aal? K'a'ut naq naraj xhob'b'al eb' laj puub' re li yo'yookil Yos?”.

²⁷ Ke'chaq'ok eb' li poyanam ut ke'xye re laj David jo' ajwi' ke'xye xb'enwa, chirix li ani taakamsinq re laj Filistea a'an.

²⁸ Naq laj Eliab kirab'i li yo xyeeb'al li riitz'in reheb' li winq, kichalk xjosq'il sa' xb'een laj David ut kixye re: “K'a' aj e naq xatchalk arin? Ani aj ik'in xakanab' chaq li jun ch'ina ch'uuteb' li karneer sa' li chaqich'och'? Ninnaw laaq'etq'etil ut li xlab'al laach'ool, xb'aan naq xatchalk arin yal re rilb'al li yalok”, chan.

²⁹ Kichaq'ok laj David: “K'aru li ink'a' us xinb'aanu anaqwan? Ma ink'a' tab'i' naru tin'aatinaq?”, chan.

³⁰ Tikto kixkanab' li ras ut koho chi patz'ok rik'in jalan chik winq, ut kiyehe'k wi' chik re jo' kirab'i xb'enwa.

³¹ Wankeb' li ke'ab'ink re li k'aru kixye laj David; koxe'xye resil re laj Saúl, ut a'in kixtaqla xb'oqb'al li al.

³² Toja' naq laj David kixye re laj Saúl: “Maa'ani chich'inanq xch'ool xb'aan laj Filistea a'an. Laa'in, aj k'anjel chawu, tinxik chi yalok rik'in a'an”.

³³ “Ink'a' naru tatxik chi yalok rik'in laj Filistea a'an, xb'aan naq toj saaj alat, ut a'an chalen sa' xch'ajomal yo'oon chi yalok”, chan laj Saúl.

³⁴ Kichaq'ok laj David ut kixye: “Naq laa'in laamoos wankin chaq chi xk'aak'alenkil li xketomq li xyuwa', wi junaq kaqkoj malaj tz'uqtz'un nachalk ut naxchap junaq karneer sa' xyanq li ketomq,

³⁵ laa'in ninxik chirix ut ninteni toj reetal ninmaq' li karneer chiru. Ut wi naxkut chaq rib' sa' inb'een, ninchap chi xkalam e ut ninteni toj reetal ninkamsi.

³⁶ Laamoos ak xkamsihom li kaqkoj ut li tz'uqtz'un. Ut li winq a'an aj Filistea li maak'a' xpaab'aal, jo'kan ajwi' tixk'ul, xb'aan naq xhob'eb' laj puub' re li yo'yookil Yos.

³⁷ Li Qaawa' li kikolok we sa' ruq'eb' li kaqkoj ut li tz'uqtz'un, tinxkol ajwi' sa' ruq' laj Filistea a'an”, chan. Toja' naq laj Saúl kixye re laj David: “Ayu ut li Qaawa' chiwanq aawik'in”.

³⁸ Chirix chik a'an laj Saúl kixtaqla xtiqib'ankil laj David rik'in ajwi' li raq' ch'iich'; kixk'e jun punit ch'iich' sa' xjolom ut jun xramleb' re xch'ool.

³⁹ Ab'an naq laj David kixb'ak' li xjutz' ch'iich' chiru li raq' ut kixyal b'eek, ink'a' kiruuk, xb'aan naq toj maji' k'aynaq. Tikto kixye re laj Saúl: “Ink'a' ninru chi b'eek sa' a'in. Maajun sut inb'aanuhom a'an”. Toja' naq laj David kirisi li aq'ej chirix:

⁴⁰ kixchap li xxuq', kixsik' sa' nima' oob' chi yolyookil pek ut kixk'eheb' sa' li xjelool, ut wank li xjok' sa' ruq' naq kijilok wan wi' laj Filistea.

⁴¹ Laj Goliat timil timil kinach'ok rik'in laj David, ut laj tenq' re aj k'amol b'e chiru.

⁴² Naq laj Filistea kiril laj David ut kixk'e reetal naq toj saaj al, q'anq'an rismal ut ch'ina'us na'ilok, kixtz'eqtaana

⁴³ ut kixye re: “Ma laa'in tz'i' naq xatchalk chi yalok wik'in rik'in che'?”, chan. Ut sa' xk'ab'a'eb' li xyos kixmajewa laj David

⁴⁴ ut kixye re: “Kim arin ut tink'e laatib'el reheb' li xik'anel xul re li choxa ut reheb' ajwi' li josq' aj xul wankeb' sa' k'iche'”, chan.

⁴⁵ Kichaq'ok laj David ut kixye: “Laa'at xatchalk sa' inb'een chi wan chaq aach'iich', jutz' ch'iich' ut che', a'ut laa'in ok we chi yalok aawik'in sa' xk'ab'a' li Qaawa', xYos laj Israel, a' li Nimajwal li xahob' laa'at.

⁴⁶ Anaqwan ajwi' li Qaawa' tatxq'axtesi sa' wuq', ut laa'in tatinkamsi, tinch'ot laajolom. Ut sa' li kutan a'in tink'e li xtib'eleb' laj puub' aj Filistea reheb' li xik'anel xul re li choxa ut reheb' li josq' aj xul wankeb' sa' k'iche'. Chi jo'kan chixjunil li ruuchich'och' tixnaw naq wank jun Yos re laj Israel.

⁴⁷ Ut chixjunileb' li ch'utch'uukeb' arin te'xnaw naq li Qaawa' ink'a' nakolok rik'in ch'iich' chi moko rik'in jutz' che': li Qaawa' a'an laj eechal re li yalok a'in, ut A'an taaq'axtesinq eere sa' quq' laa'o”.

⁴⁸ Kixaqliik laj Filistea ut ki'ok chi nach'ok rik'in laj David, ab'an a'in sa' junpaat koxxaqab' rib' chiru.

⁴⁹ Kixch'ik li ruq' sa' li xjelool, kirisi chaq jun li pek, kixkut chiru li xjok' ut kixket xpeekem laj Filistea: li pek kinaqk sa' xpeekem laj Filistea li kit'ane'k chi hupu chiru ch'och'.

⁵⁰ Jo'ka'in naq laj David kixq'ax ru laj Filistea rik'in jok' ut pek; kixket ut kixkamsi chi maak'a' xch'iich' sa' ruq'.

⁵¹ Toja' naq ki'aanilak laj David, koxxaqliiq chi xk'atq laj Filistea, kixchap li xch'iich', kirisi sa' rochoch ut kixkamsi chi junajwa laj Goliat. Chirix a'an kixch'ot li xjolom. Naq eb' laj Filistea ke'ril naq kamenaq chik laj k'amol xb'eheb', ke'elelik.

⁵² Toja' naq eb' laj Israel ut laj Judá japjookeb' re naq ke'raanilasiheb' laj Filistea toj sa' rokeb'aal li tenamit Gat ut Ekrón. Yalaq b'ar sa' li b'e li nachalk Saharáhin ut naxik Gat ut Ekrón wankeb' aj Filistea kamenaqeb'.

⁵³ Naq ke'raqe'k chi raanilasinkileb' chi kaw eb' laj Filistea, eb' laj Israel ke'sutq'iik chaq ut ke'xxok li k'aru wank sa' xhilob'aaleb'.

⁵⁴ Toja' naq laj David kixchap xjolom laj Filistea ut kixk'am Jerusalén; ab'an eb' li xch'iich' kixkanab'eb' sa' li xhilob'aal.

⁵⁵ Naq laj Saúl kiril chi xik laj David re yalok rik'in laj Filistea, kixpatz' re laj Abner, xjolomileb' laj puub': “Abner, ani aj alal li al a'an?”, chan. Kichaq'ok laj Abner ut kixye:

⁵⁶ “Relik chi yaal, at awab'ej, ink'a' ninnaw”. Ut li awab'ej kixye re: “Patz'i ani li xyuwa' li al a'an”.

⁵⁷ Naq laj David kisutq'iik chaq chi xkamsinkil laj Filistea, laj Abner koho chi xsik'b'al re roksinkil rik'in laj Saúl. Laj David wan chaq sa' ruq' li xjolom laj Goliat.

⁵⁸ Toja' naq laj Saúl kixpatz' re: “Ani aj alalat, a wa'?”, chan re. Kichaq'ok laj David: “Ralalin laj Jesé aj Belén, aj k'anjel chawu”, chan.