1 Samuel 13 - Q'eqchi Bible

Laj Saúl kiyalok rik'ineb' laj Filistea

¹ Ak wank xchihab' laj Saúl naq kixtikib' awab'ejink, ut chiru ka'k'aal chihab' kitaqlank sa' xb'eeneb' laj Israel.

² Toja' naq kixsik' ruheb' lajeek'aal xwaqxaq o'q'ob' (3,000) chi aj Israel cho'q aj puub': oob' o'q'ob' (2,000) wankeb' chaq rik'in laj Saúl aran Mikmás ut sa' li tzuul Betel, ut lajeek'aal rox o'q'ob' (1,000) wankeb' rik'in laj Jonatán aran Kibehá re Benjamín, ut li rela'eb' li tenamit laj Saúl kixsutq'isiheb' sa' rochocheb'.

³ Laj Jonatán kixkamsi jun ch'uuteb' aj Filistea li wankeb' aran Kibehá, ut eb' laj Filistea ke'rab'i resil. Toja' naq laj Saúl kixye naq chiyaab'asiiq li tronpeet sa' chixjunil li na'ajej, ut kixye: “Ab'ihomaq, ex aj Hebreo!

⁴ Laj Saúl kixkamsi jun ch'uuteb' aj Filistea, ut eb' laj Israel xik' te'ile'q xb'aaneb' laj Filistea”, chan. Jo'kan naq eb' laj puub' ke'xch'utub' rib'eb' rik'in laj Saúl aran Kilkal;

⁵ ut eb' laj Filistea ke'ch'utlaak re yalok rik'ineb' laj Israel: lajeeb' xka'k'aal mil (30,000) chi b'eleb'aal ch'iich', o'laju o'q'ob' (6,000) chi kawaay ut k'ajo'eb' xk'ihal laj puub' jo' tana xk'ihal li samahib' chire li palaw. Koheb' ut ke'xyiib' xmuheb'aaleb' Mikmás, sa' xjayal releb'l saq'e re Bet-Abén.

⁶ Naq eb' laj Israel ke'ril li ch'a'ajkilal wankeb' wi' ut li nimla rahilal yo chi chalk sa' xb'eeneb', koxe'xmuq rib' sa'eb' li ochoch pek, sa'atqeb' li xhopolal ut x'atz'alaleb' li saqoonak, rub'elatq ch'och' ut sa'eb' li kumb'-ha'.

⁷ Wankeb' ajwi' aj Hebreo ke'q'axonk junpak'al li nima' Jordán, sa' xteepal Gad ut Galahad. Ab'an laj Saúl kikanaak Kilkal, ut chixjunileb' li tenamit neke'siksotk chi xk'atq.

⁸ Aran laj Saúl kiroyb'eni wuqub' kutan, jo' kiyehe'k re xb'aan laj Samuel; ab'an laj Samuel ink'a' kiwulak Kilkal ut eb' laj puub' ke'xcha'cha'i rib'eb'.

⁹ Toja' naq kixye laj Saúl: “K'amomaq chaq eb' li k'atb'il mayej ut li yeechi'om re k'amok ib' sa' usilal rik'in li Yos”, chan. Ut kixyeechi'i li k'atb'il mayej.

¹⁰ Tojo' traqe'q chi xyeechi'inkil li k'atb'il mayej naq kiwulak laj Samuel, ut laj Saúl koho chi xk'ulb'al ut chi xk'eeb'al xsahil li xch'ool.

¹¹ “K'aru xab'aanu?”, chan laj Samuel. Kichaq'ok laj Saúl ut kixye: “Xwil naq eb' laj puub' yookeb' chinkanab'ankil ut laa'at ink'a' ajwi' nakatk'ulunk sa' xq'ehil jo' xaye we, ut ak ch'utch'uukeb' laj Filistea aran Mikmás.

¹² Jo'kan naq xinye sa' inch'ool: Anaqwan kub'eekeb' chaq re laj Filistea re yalok wik'in arin Kilkal ut maji' nintz'aama rusilal li Qaawa' sa' inb'een. Jo'kan naq tento xinyeechi'i li k'atb'il mayej”, chan.

¹³ Kixye laj Samuel re laj Saúl: “Aamemil xab'aanu wi' a'in. Ink'a' xapaab' laataqlankil xb'aan li Qaawa' laaYos. Wi ta xab'aanu li xye aawe, li Qaawa' xxaqab' raj laawankil sa' xb'eeneb' laj Israel chi junelik.

¹⁴ A'ut anaqwan laa'awab'ejihom ink'a' taawanq chi junelik. Li Qaawa' ak xsik' ru jun li winq jo' naraj li xch'ool, re naq a'anaq chik aj k'amol xb'e li xtenamit, xb'aan naq ink'a' xapaab' laataqlankil xb'aan li Qaawa'”.

¹⁵ Tikto laj Samuel ki'elk Kilkal ut koho sa' li xb'e. Li rela'eb' laj puub' koheb' chirix laj Saúl re yalok: ke'xkanab' Kilkal ut ke'wulak Kibehá re Benjamín. Aran laj Saúl kirajlaheb' laj puub' li wankeb' rochb'een: wankeb' tana lajeek'aal xkab' o'q'ob' (600) chi winq.

¹⁶ Laj Saúl, laj Jonatán li ralal ut eb' laj puub' li wankeb' rochb'eeneb' ke'kanaak Kibehá re Benjamín, ut eb' laj Filistea wankeb' aran Mikmás.

¹⁷ Toja' naq oxib' ch'uuteb' aj Filistea ke'elk chaq sa' li xna'ajeb': jun ch'uut koheb' sa' xjayal Ofrá, xteepal Súal;

¹⁸ li jun chik koheb' sa' xjayal Bet-Jorón, ut li rox ch'uut koheb' sa' xjayal li xnub'ajlil li taq'a re Seboín, sa' xjayal li chaqich'och'.

¹⁹ Maak'a'eb' aj tenol ch'iich' sa' chixjunil xsutam Israel, xb'aan naq eb' laj Filistea ink'a' neke'raj naq eb' laj Hebreo te'xyiib' ch'iich' re yalok.

²⁰ Jo'kan naq chixjunileb' laj Israel tento neke'xik rik'ineb' laj Filistea chi xq'esnankileb' li xpikleb' ch'och', li xch'iich'eb', li xmaal malaj li xk'onoch ch'iich' wank reheb'.

²¹ Li xtz'aq li xq'esnankil junaq pikleb' ch'och' malaj k'onoch ch'iich', a'an wiib' kok' tumin plaat; ut li xtz'aq li xq'esnankil junaq maal malaj ch'iich', a'an jun tumin plaat.

²² Xb'aan a'an, naq kiwulak xq'ehil li yalok, maajun reheb' laj puub' li wankeb' rochb'een laj Saúl ut laj Jonatán wank xch'iich' re yalok. Ka'ajwi' laj Saúl ut laj Jonatán li ralal wankeb' xch'iich' sa' ruq'eb'.

²³ Jun ch'ina ch'uuteb' aj Filistea koheb' chi xk'aak'alenkil li tzuul re Mikmás.