1 Reyes 4 - Q'eqchi Bible

Li xnimal xwankil laj Salomón

¹ Laj Salomón ki'awab'ejink sa' xb'eeneb' chixjunileb' laj Israel.

² A'aneb' a'in xk'ab'a'eb' li ke'tenq'ank re: laj Asarías, ralal laj Sadok laj tij;

³ laj Eliaf ut laj Ajías, ralaleb' laj Seraías, aj tz'iib'eb'; laj Josafat, ralal laj Ajilud, aj k'ehol xna'leb' li awab'ej;

⁴ laj Benaías, ralal laj Johadá, xjolomileb' laj puub'; laj Sadok ut laj Abiatar, aj tijeb';

⁵ laj Asarías, ralal laj Natán, xjolomileb' li ruuchil awab'ej; laj Sabud, ralal laj Natán, ramiiw li awab'ej;

⁶ laj Ajisar, aj ilol re li rochoch li awab'ej; laj Eliab, ralal laj Johab, xjolomileb' laj puub'; laj Adonirán, ralal laj Abdá, aj ilol re li minb'il k'anjel na'uxmank.

⁷ Laj Salomón wankeb' kab'laju ruuchil sa' chixjunil Israel. Eb' a'in neke'xch'oolani li awab'ej ut li xjunkab'al. Chixjunqaleb' tento neke'xch'oolani li awab'ej junq po chiru junq chihab'.

⁸ Li xk'ab'a'eb' a'aneb' a'in: laj Ben-Hur, kiwank sa' xtzuulul Efraín;

⁹ laj Ben-Deker, kiwank sa' xteepal Mahás, Sahalbín, Bet-Semes, Ayalón ut Bet-Janán;

¹⁰ laj Ben-Jesed, kiwank Arubot, Sokó ut sa' xsutam Jéfer;

¹¹ laj Ben-Abinadab kiwank sa' chixjunil xteepal Dor (li rixaqil a'an xTabahat, xrab'in laj Salomón);

¹² laj Bahaná, ralal laj Ajilud, kiwank sa' xteepal Tanak, Mejido ut sa' chixjunil Betsán, li wank chi xk'atq Sartán, toj sa' xtaq'ahil Jesrehel, chalen Betsán toj Abel-Mejolá ut toj junpak'al Yoknehán;

¹³ laj Ben-Jéber kiwank Ramot sa' xteepal Galahad (kiwank ajwi' sa' xk'aleb'aaleb' laj Yaír, ralal laj Manasés, sa' xteepal Galahad, jo'wi' sa' xteepal Argob re Basán: oxk'aaleb' xninqal tenamit wankeb' xsuttz'ak ut q'anch'iich' sa'eb' li okeb'aal);

¹⁴ laj Ajinadab, ralal laj Idó, kiwank Majanáhin;

¹⁵ laj Ajimás kiwank sa' xteepal Neftalí (a'in ajwi' kisumlaak rik'in jun xrab'in laj Salomón, lix Basmat xk'ab'a');

¹⁶ laj Bahaná, ralal laj Jusay, kiwank sa' xteepal Aser ut Alot;

¹⁷ laj Josafat, ralal laj Paruhaj, kiwank sa' xteepal Isakar;

¹⁸ laj Semehí, ralal laj Elá, kiwank sa' xteepal Benjamín;

¹⁹ laj Eber, ralal laj Urí, kiwank sa' xteepal Galahad, xna'aj laj Sijón, awab'ej re Amor, ut sa' xteepal laj Og, awab'ej re Basán. Kiwank ajwi' jun ruuchil li awab'ej sa' chixjunil li na'ajej a'an.

²⁰ Eb' laj Judá ut eb' laj Israel k'ajo' xk'ihaleb', jo'eb' li samahib' chire li palaw; chixjunileb' neke'wa'ak neke'uk'ak ut q'axal saheb' sa' xch'ool.

²¹ Laj Salomón wank xwankil sa' xb'een chixjunileb' li awab'ejihom, chalen chaq chire li nima' Éwfrates toj sa' xtenamiteb' laj Filistea ut toj chi xnub'ajlil Ejiipt. Chixjunileb' a'an neke'xk'e xtoj ut neke'k'anjelak chiru laj Salomón jo' najtil kiyo'yook.

²² A'an a'in xk'ihal li k'a'aq re ru li nak'anjelak chiru laj Salomón rajlal kutan: lajeeb' xka'k'aal kintal chi chaab'il k'aj, oxk'aal chi yal k'aj,

²³ lajeeb' xninqal b'ooyx, junmay li junes ichaj neke'xwa' ut o'k'aal li karneer, chi ink'a' k'eeb'ileb' sa' ajl li kej, li yuk, ut eb' li ak'ach ut li kaxlan ninqeb' xtib'el.

²⁴ Xb'aan naq laj Salomón kiwank xwankil sa' xb'een chixjunil li ch'och' wan chaq junpak'al li nima' Éwfrates, chalen Tafsaj toj Gasa, ut sa' xb'eeneb' chixjunileb' li awab'ej li wankeb' chaq aran. Kiwank sa' tuqtuukilal rik'ineb' li wankeb' sa' xsutam.

²⁵ Chiru chixjunil li xyu'am laj Salomón eb' laj Judá ut eb' laj Israel ke'wank chaq sa' tuqtuukilal ut ke'hilank chi saheb' sa' xch'ool sa' xmu li rochocheb', chalen chaq Dan toj Berseba.

²⁶ Laj Salomón kiwank ajwi' lajeeb' o'q'ob' (4,000) xkawaay cho'q reheb' li xb'eleb'aal ch'iich' ut kab'laju mileb' (12,000) li winq neke'b'eek chirix kawaay.

²⁷ Eb' li kab'laju xaqab'anb'ileb' chi taqlank neke'xch'oolani laj Salomón li awab'ej jo'wi' chixjunileb' li neke'tzekank rochb'een, junq po nawulak wi' li junjunq, ut neke'ril naq maak'a' chilajq chiru li awab'ej.

²⁸ Jo' chanru neke'tz'aqonk, neke'xtaqla ajwi' li seb'aad ut li k'im cho'q reheb' li kawaay ut eb' li xul neke'iiqank, sa' li na'ajej nayeemank reheb'.

²⁹ Li Yos kixk'e re laj Salomón xnimal xchoxahil na'leb' ut xseeb'al xch'ool, jo' ajwi' jwal nim xchaab'ilal jo' li samahib' chire li palaw.

³⁰ Li xchoxahil na'leb' laj Salomón q'axal nim wi' chik chiru li xna'leb'eb' laj Ejiipt ut li xna'leb'eb' jo'k'ihaleb' wankeb' chaq sa' xjayal releb'l saq'e.

³¹ Q'axal kiwank xchoxahil na'leb' chiru chixjunileb' li winq. Kixq'ax ru laj Etán, aj Esrahi xtenamit, laj Hemán, laj Kalkol ut laj Dardá, ralaleb' laj Majol. Laj Salomón q'axal nawno ru sa' chixjunil li tenamit wankeb' chi xsutam.

³² Lajeek'aal xwaqxaq o'q'ob' (3,000) chi jaljookil ru aatin ut oob' xjunlajuk'aal rox o'q'ob' (1,005) chi b'ich ke'tz'iib'aak xb'aan laj Salomón.

³³ Ki'aatinak ajwi' chirixeb' li che', chalen chirix li yaw li wank Líbano toj chirixeb' li neke'yo'laak chiruheb' li tz'ak. Ki'aatinak chirixeb' li xul, eb' li xik'anel xul, eb' li neke'xjukuki rib' chiru ch'och' ut chirixeb' li kar.

³⁴ Sa' chixjunileb' li tenamit wankeb' ke'chalk chi rab'inkil li raatin laj Salomón; ut eb' li awab'ej toj b'arwi' ke'rab'i resil li xchoxahil na'leb', ke'xtaqla chaq ruuchileb' ut xsimaatan.