Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Reyes 3 - Q'eqchi Bible


Xsumlajik laj Salomón rik'in li xrab'in laj Parahón

1 Laj Salomón kik'amok rik'in laj Parahón, awab'ej re Ejiipt. Kisumlaak rik'in li xrab'in laj Parahón ut kixk'am sa' xtenamit laj David, naq toj yookeb' chi xchoyb'al xyiib'ankil li rochoch, jo'wi' li rochoch li Qaawa' ut li suttz'ak chi xsutam Jerusalén.

2 Chiruheb' li kutan a'an eb' li tenamit toj yookeb' chaq chi mayejak sa'eb' li xninqal tzuul, xb'aan naq toj maji'aq nachoymank xyiib'ankil rochoch li Qaawa'.

3 Laj Salomón naxra li Qaawa' ut naxpaab' li chaq'rab' k'eeb'il re xb'aan laj David li xyuwa'. Ab'anan toj namayejak ajwi' sa'eb' li xninqal tzuul ut nak'atok chaq pom aran.


Laj Salomón kixtz'aama chiru li Yos naq tixk'e xchoxahil na'leb'
( 2 Kr 1,1-13 )

4 Koho li awab'ej aran Gabahón chi mayejak, xb'aan naq li na'ajej a'an najt xteram ut jwal loq'. Kiwulak aran laj Salomón ut kixyeechi'i k'iila o'q'ob' chi mayej sa' xb'een li artal.

5 Ut aran Gabahón li Qaawa' kixk'ut rib' chiru laj Salomón sa' xmatk' chiru q'oqyink, ut kixye re: “Tz'aama chiwu li k'aru taawaj ut laa'in tink'e aawe”.

6 Kichaq'ok laj Salomón ut kixye: “Laa'at q'axal xara laj David linyuwa', laj k'anjel chawu, xb'aan naq tiik xch'ool chawix, tuqtuuk xna'leb' ut xk'anjelak chi chaab'il chawe chawu. Jo'kan naq laa'at q'axal xawusila ru ut xak'e re jun ralal li tento taak'ojlaaq sa' xk'ojarib'aal, jo' xk'ulmank chiru li kutan a'in.

7 At Qaawa', at inYos, laa'at xatxaqab'ank we chi awab'ejink sa' xk'ojarib'aal laj David linyuwa'. Ab'anan toj saajin ut toj maak'a' inna'leb'.

8 Wankin sa' xyanq laatenamit, jun tenamit sik'b'il ru aab'aan, k'ajo' xk'ihal, li ink'a' naru rajlankileb'.

9 Nintz'aama b'i' chawu naq taak'e taxaq inna'leb' re xb'eresinkil laatenamit ut re xnawb'al b'ar wank li us ut li ink'a' us. Xb'aan naq ani taaruhanq chi xk'amb'al xb'e li tenamit a'in li k'ajo' xk'ihaleb'?”.

10 Li Qaawa' kiwulak chiru li k'aru kixpatz' laj Salomón.

11 Toja' naq li Qaawa' kixye re: “Xb'aan naq ink'a' xatz'aama chiwu xnajtil roq laayu'am, chi moko aab'ihomal chi moko xkamikeb' li xik' neke'ilok aawe, xatz'aama b'an aachaab'il na'leb' re ab'ink ut awab'ejink sa' tiikil ch'oolej,

12 jo'kan naq tinb'aanu jo' xapatz' we: tink'e aachoxahil na'leb' ut xtiikilal laach'ool, jo' maajun wanjenaq chawu chi moko toxwanq chik moqon jo' laa'at.

13 Tink'e ajwi' li ink'a' xatz'aama chiwu: aab'ihomal ut aaloq'al, chi q'axal nim wi' chik chiru junaq chik awab'ej jo' najtil yo'yooqat sa' ruuchich'och'.

14 Wi tatwanq sa' tiikilal ut taapaab' linchaq'rab' ut eb' li waatin jo' kixb'aanu laj David laayuwa', laa'in tinnajtob'resi roq laayu'am”.

15 Naq ki'ajk ru laj Salomón, kixk'e reetal naq a'an yal jun matk'! Toja' naq kiwakliik ut koho Jerusalén. Koxxaqab' rib' chiru li xLoq'laj Kaaxil li xSumwank li Qaawa', kixyeechi'i xk'atb'il mayej ut kimayejak ajwi' chirix li k'amok ib' sa' usilal rik'in li Yos; chirix chik a'an kixk'uub' jun ninq'e cho'q reheb' chixjunileb' laj k'anjel chiru.


Li xnimal xk'a'uxl laj Salomón sa' li raqok aatin

16 Sa'eb' li kutan a'an wiib'eb' aj yumb'eet ke'wulak rik'in laj Salomón li awab'ej ut koxe'xxaqab' rib' chiru.

17 Jun reheb' a'an kixye: “Chakuy inmaak, at awab'ej. Li ixq a'in ut laa'in wanko sa' jun chi ochoch. Kiyo'laak jun link'uula'al, ch'ina teelom, naq wochb'een li ixq a'in sa' li kab'l.

18 Oxib' kutan chik xnumik a'an, kiyo'laak ajwi' li xk'uula'al li ixq a'in. Qajunes wanko sa' li kab'l; maajun chik wank aran.

19 Ab'anan sa' jun q'oqyink kikamk li xk'uula'al li ixq a'in, xb'aan naq kiwark sa' xb'een.

20 Toja' naq kiwakliik tuqtu q'oqyink ut, naq yookin chi wark, kixxok link'uula'al chink'atq ut kixk'am rik'in, ut li xk'uula'al a'an li ak kamenaq chik, kixk'e chink'atq.

21 Ak saqewk re naq kinwakliik laa'in chi xk'eeb'al xtu' link'uula'al, ut kamenaq chik! Ab'anan naq ak kutan chik, kiwil chi us ut kink'e reetal naq maawa' link'uula'al”, chan li ixq.

22 Toja' naq li ixq jun chik kixye: “Moko yaal ta a'an: link'uula'al laa'in a'an li yo'yo, ut laawe laa'at a'an li kamenaq”, chan. A'ut li xb'een kixye: “Moko jo'kan ta: li k'uula'al kamenaq a'an laawe, ut li yo'yo a'an we laa'in”, chan. Chi jo'kan ke'xwech'i rib' chiru li awab'ej.

23 Kichaq'ok laj Salomón ut kixye: “Li xb'een naxye: «Link'uula'al laa'in yo'yo»; ut li xkab' naxye: «Moko yaal ta a'an; laak'uula'al laa'at kamenaq ut link'uula'al yo'yo»”.

24 Toja' naq li awab'ej kixye: “K'amomaq chaq jun q'esnal ch'iich'”. Tikto ke'xk'am chaq jun q'esnal ch'iich' rik'in li awab'ej:

25 “Yok'omaq sa' wiib' jachal li k'uula'al yo'yo ut q'axtesihomaq jun jachal re li junjunq chi ixq”, chan li awab'ej.

26 Ab'anan li xna' li k'uula'al yo'yo kimayok xch'ool chirix li xk'uula'al, ut kixtz'aama chiru li awab'ej: “B'aanu usilal, at awab'ej, chik'eemanq li k'uula'al yo'yo re li ixq a'an, ab'an meekamsi!”. A'ut li ixq jun chik yo xyeeb'al: “Chi moko we chi moko aawehaq! Xjachaqeb' sa' xyi!”, chan.

27 Toja' naq li awab'ej kixye: “Q'axtesihomaq li k'uula'al yo'yo re li ixq x'aatinak xb'enwa. Meekamsi, xb'aan naq a'an tz'aqal li xna'”.

28 Naq chixjunileb' laj Israel ke'rab'i li raqok aatin kixb'aanu li awab'ej, chixjunileb' ke'xxiwa ru laj Salomón, xb'aan naq ke'xk'e reetal naq relik chi yaal wank xchoxahil na'leb' chi raqok aatin.

Q'eqchi DC Bible © Bible Society in Guatemala, 2005.

Bible Society in Guatemala
ကြှနျုပျတို့နောကျလိုကျပါ:



ကြော်ငြာတွေ