1 Reyes 22 - Q'eqchi Bible

Laj Mikeas kixye resil chi junxilaj naq laj Ajab taaq'axe'q ru

¹ Chiru oxib' chihab' eb' laj Aram ut eb' laj Israel ink'a' ke'yalok chirib'ileb' rib'.

² Ab'an sa' rox li chihab' laj Josafat, awab'ej re Judá, kikub'eek chi rula'aninkil li awab'ej re Israel.

³ Ut li awab'ej re Israel kixye reheb' laj k'anjel chiru: “Laa'ex nekenaw chi us naq li tenamit Ramot, li wank sa' xteepal Galahad, a'an qe laa'o. Ab'anan maak'a' yooko re risinkil rub'el xwankil li awab'ej re Aram”.

⁴ Ut kixpatz' re laj Josafat: “Ma tinaatenq'a chi yalok rik'ineb' li wankeb' Ramot sa' xteepal Galahad?”. Kichaq'ok laj Josafat: “Laa'in ut laa'at, lintenamit ut laatenamit, eb' linkawaay ut eb' laakawaay, junajeb' ajwi' chirib'il.

⁵ Ab'anan b'aanu usilal, rub'elaj li xik chi yalok patz'on re li Qaawa'”.

⁶ Toja' naq li awab'ej re Israel kixch'utub'eb' jun o'q'ob'eb' (400) chi propeet ut kixye reheb': “Ma naru tinxik chi yalok rik'ineb' laj Ramot, sa' xteepal Galahad, malaj ut ink'a'?”. Ke'chaq'ok: “Ayu, xb'aan naq li Qaawa' tixq'axtesi li tenamit Ramot sa' laawuq' laa'at”, chankeb'.

⁷ Ab'anan laj Josafat kixpatz': “Ma maak'a' chik junaq propeet arin re patz'ok rik'in li Qaawa'?”.

⁸ Ut li awab'ej re Israel kixye re laj Josafat: “Toj wank jun chik winq li naru nokoopatz'ok wi' k'aru naxye li Qaawa'. Ab'an q'axal xik' nawil, xb'aan naq maajun wa naxye li us cho'q we, junes b'an rahilal naxye we. A'an laj Mikeas, ralal laj Imlá”, chan. Kichaq'ok laj Josafat ut kixye: “Mat-aatinak chi jo'ka'in, at awab'ej”.

⁹ Tikto li awab'ej re Israel kixb'oq jun aj ilol re li rochoch, ut kixye re: “B'oq chaq laj Mikeas, li ralal laj Imlá”.

¹⁰ Li awab'ej re Israel ut laj Josafat, awab'ej re Judá, k'ojk'ookeb' sa' xk'ojarib'aaleb' chixjunqaleb', sa' rokeb'aal li tenamit Samaria, ut tiqtookeb' chi chaab'il; ut chixjunileb' li propeet yookeb' chi aatinak jo' propeet chiruheb' li awab'ej.

¹¹ Laj Sedesías, ralal laj Kenahaná, kixyiib' jun sumal xxukub' ch'iich', yo chi xyeeb'al: “Jo'ka'in xye li Qaawa': «Rik'ineb' li xukub' a'in taaxeq' eb' laj Aram toj reetal taasacheb' ru»”.

¹² Jo'kan ajwi' ke'xye chixjunileb' li propeet; ke'xye re li awab'ej: “Ayu chi yalok rik'in Ramot sa' xteepal Galahad ut taasach ru, xb'aan naq li Qaawa' tixq'axtesi sa' laawuq' li tenamit a'an”.

¹³ Li winq li kitaqlaak chi xb'oqb'al laj Mikeas, kixye re: “Chixjunileb' li propeet yookeb' xyeeb'al naq li awab'ej us taaxik chi yalok. Nintz'aama usilal chawu: jo'kanaq ta ajwi' laawaatin. Taaye naq us taa'elq li awab'ej”.

¹⁴ Ab'an laj Mikeas kixsume: “Ninye jurament sa' xk'ab'a' li Qaawa' naq ka'ajwi' li k'aru tixye we A'an, a'an li tinye!”, chan.

¹⁵ Chirix chik a'an kiwulak wan wi' li awab'ej, ut a'in kixpatz' re: “A Mikeas, ma naru tooxik chi yalok rik'ineb' laj Ramot sa' xteepal Galahad, malaj ut ink'a' tooxik?”. Kichaq'ok laj Mikeas: “Ayu xb'aan naq us tat-elq. Li Qaawa' tixq'axtesi sa' laawuq' li tenamit a'an”, chan.

¹⁶ Ab'an li awab'ej kixye re: “Jar wa inyehom naq ka'ajwi' li yaal taaye we sa' xk'ab'a' li Qaawa'?”.

¹⁷ Toja' naq laj Mikeas kixye: “Nake'wil chixjunileb' laj Israel neke'cha'chotk chiruheb' li tzuultaq'a, chanchaneb' li ketomq maak'a' aj ilol reheb'. Ut li Qaawa' xye: «Maak'a' aj eechaleb' re; li junjunq chisutq'iiq sa' rochoch sa' tuqtuukilal»”.

¹⁸ Li awab'ej re Israel kixye re laj Josafat: “Ma ink'a' tab'i' xinye aawe naq li winq a'in maajun wa naxye we li us, junes b'an rahilal naxye?”.

¹⁹ Toja' naq kixye laj Mikeas: “K'e reetal, ab'i li naxye li Qaawa'. Xwil li Qaawa' k'ojk'o sa' li xk'ojarib'aal, rochb'een chixjunileb' laj k'anjel chiru sa' li choxa, xaqxookeb' sa' xnim ut sa' xtz'e uq'.

²⁰ Ut li Qaawa' kixpatz': «Ani taab'alaq'inq re laj Ajab re naq taaxik chi yalok aran Ramot, sa' xteepal Galahad, ut aran taakamq?», chan. Ut jalan jalanq ke'xye li junjunq.

²¹ Toja' naq jun li musiq'ej kixxaqab' rib' chiru li Qaawa' ut kixye: «Laa'in tinb'alaq'inq re», chan. Ut li Qaawa' kixpatz' re: «Chanru taab'aanu?».

²² Kichaq'ok li musiq'ej: «Tinxik ut toxink'e li tik'ti' chi xtz'uumal reheb' chixjunileb' li propeet». Toja' naq li Qaawa' kixye re: «Us, ayu ut b'alaq'i laj Ajab. Ut taa'uxmanq jo' xaye», chan.

²³ Anaqwan ak nakanaw naq li Qaawa' xk'ehok li tik'ti' chi xtz'uumal reheb' chixjunileb' laapropeet, xb'aan naq ak k'uub'k'u naq taachalq li rahilal sa' aab'een”, chan laj Mikeas.

²⁴ Toja' naq laj Sedesías, ralal laj Kenahaná, kijilok ut kixtz'aj chi ruq' chi xko laj Mikeas, ut kixye re: “B'ar x'elk we li xmusiq' li Qaawa', re aawaatinankil laa'at?”.

²⁵ Kichaq'ok laj Mikeas: “Taawil rik'in laawu sa' li kutan naq yooqat chi xmuqlenkil aawib' sa'atqeb' li ochoch”, chan.

²⁶ Toja' naq li awab'ej re Israel kixye: “Chapomaq laj Mikeas ut q'axtesihomaq sa' ruq' laj Amón, xjolomil li tenamit, ut rik'in laj Johás, ralal li awab'ej.

²⁷ Ut taaye reheb': «Jo'ka'in xye chaq li awab'ej: Tz'apomaq sa' tz'alam li winq a'in ut kach'in ajwi' xwa ut xha' teek'e, toj reetal tinsutq'iiq chaq chi sa sa' inch'ool»”.

²⁸ Kichaq'ok laj Mikeas: “Wi tatsutq'iiq chaq chi yo'yo, a'an reetalil naq maawa' li Qaawa' x'aatinak chi xtz'uumal we”.

²⁹ Jo'kan naq li awab'ej re Israel ut laj Josafat, awab'ej re Judá, koheb' chi yalok rik'ineb' laj Ramot, sa' xteepal Galahad.

³⁰ Ut li awab'ej re Israel kixye re laj Josafat: “Laa'in tinjal li waq' re tinxik chi yalok; a'ut laa'at a' ajwi' laawaq' twanq chawix”. Jo'kan naq li awab'ej re Israel kixjal li raq' ut koho chi yalok.

³¹ Ab'an li awab'ej re Aram ak kixchaq'rab'iheb' chi us li xjolomileb' laj b'eresinel b'eleb'aal ch'iich' chi jo'ka'in: “Ink'a' texyaloq rik'ineb' li xjolomil chi moko rik'ineb' li yal aj puub', ka'aj b'an wi' teesik' li awab'ej re Israel”.

³² Naq eb' li xjolomileb' laj b'eresinel b'eleb'aal ch'iich' ke'ril laj Josafat, ke'xye sa' xch'ooleb': “Ch'olch'o naq a'in li awab'ej re Israel”. Ut tikto ke'xsut rix re xkamsinkil. Toja' naq laj Josafat kixjap re chi xpatz'b'al xtenq'ankil,

³³ ut naq eb' li xjolomileb' laj b'eresinel b'eleb'aal ch'iich' ke'xk'e reetal naq a'an maawa' li awab'ej re Israel, ke'xkanab' raanilasinkil.

³⁴ Ab'anan jun li winq kixkut li xsimaj yal chi q'ehinb'il ut koxtiq' li awab'ej re Israel: li simaj ki'ok sa' li naxk'ul wi' rib' li xkolb'al rib': “Sutq'isi li b'eleb'aal ch'iich' ut isihin sa' li yalok, xb'aan naq kamk we”, chan li awab'ej re laj b'eresinel b'eleb'aal ch'iich'.

³⁵ Chiru li kutan a'an q'axal kikawuuk li yalok; chalen toj ewu li awab'ej re Israel yal chapcho aj chik sa' li xb'eleb'aal ch'iich' chiruheb' laj Aram, yo chi hoye'k li xkik'el sa' li b'eleb'aal ch'iich', toj reetal kikamk.

³⁶ Naq ki'ok li aak'ab', ki'ab'iik xyeeb'al sa' xyanqeb' laj puub': “Li junjunq chisutq'iiq sa' li xtenamit ut sa' li rochoch,

³⁷ xb'aan naq xkamk li awab'ej!”. Chirix chik a'an ke'xk'am li awab'ej sa' li tenamit Samaria ut aran ke'xmuq.

³⁸ Ke'xch'aj li b'eleb'aal ch'iich' sa' li kumb' re Samaria, b'arwi' neke'atink eb' laj yumb'eet. Ut eb' li tz'i' ke'xreq' li xkik'el laj Ajab, jo' tz'aqal yeeb'il xb'aan li Qaawa'.

³⁹ Chixjunil li xyehom xb'aanuhom laj Ajab, li ochoch yiib'anb'il rik'in marfil ut chixjunileb' li tenamit kixyiib', tz'iib'anb'ileb' sa' xHuhil li xyehom xb'aanuhomeb' li awab'ej re Israel.

⁴⁰ Laj Ajab kiq'ajk kisutq'iik rik'ineb' li xxe'toonil yuwa', ut a' chik laj Okosías li ralal ki'ok chi awab'ejink sa' xna'aj.

Laj Josafat, awab'ej re Judá

⁴¹ Ak kaahib' chihab' chik rokik laj Ajab cho'q awab'ej re Israel, naq laj Josafat, ralal laj Asá, kixtikib' taqlank sa' xb'een Judá.

⁴² O'laju xka'k'aal chihab' wank re laj Josafat naq ki'ok cho'q awab'ej, ut oob' xka'k'aal chihab' kiwank sa' xwankil aran Jerusalén. X'Asubá xk'ab'a' li xna', xrab'in laj Siljí.

^43a Laj Josafat kixb'aanu chixjunil li nawulak chiru li Qaawa', jo' tz'aqal kiwank laj Asá li xyuwa'. Maajun sut kixkanab' xb'aanunkil.

^43b Ab'anan ink'a' ke'juk'mank eb' li tijob'aal chi xjolomeb' li tzuul, xb'aan naq toj ki'uxk li mayejak ut li k'atok pom aran.

⁴⁴ Laj Josafat ut li awab'ej re Israel ke'wank sa' tuqtuukilal.

⁴⁵ Li xyehom ut xb'aanuhom laj Josafat ut chixjunil li yalok kixb'aanu, tz'iib'anb'ileb' sa' xHuhil li xyehom xb'aanuhomeb' li awab'ej re Judá.

⁴⁶ A'an ajwi' ki'aanilasink reheb' li ke'oksink li ko'b'eetak ut yumb'eetak chiru li artal, a'eb' li toj ke'kanaak sa' li tenamit sa' xyu'amil laj Asá li xyuwa'.

⁴⁷ Chiruheb' li kutan a'an, eb' laj Edom toj maak'a' junaq awab'ej, yal jun aj jolominel tenamit nawank cho'q aj k'amol b'e sa' li na'ajej a'an.

⁴⁸ Laj Josafat kixyiib' ajwi' xjukub'eb' jo' li ke'wank aran Tarsis, re raj xik sa' li na'ajej Ofir chi k'amok oor, ab'an ink'a' kiwulak aran xb'aan naq eb' li xjukub' ke'juk'e'k aran Esión-Kéber.

⁴⁹ Toja' naq laj Okosías, ralal laj Ajab, kixye re laj Josafat: “Xikaqeb' laj k'anjel chiwu chirixeb' laj k'anjel chawu sa' xjukub'eb'”, chan re. Ab'an laj Josafat ink'a' kiraj.

⁵⁰ Naq laj Josafat kiq'ajk kisutq'iik rik'ineb' li xxe'toonil yuwa', kimuqe'k sa' xtenamit laj David li xyuwa', ut a' chik laj Jorán li ralal kikanaak chi awab'ejink sa' xna'aj.

Laj Okosías, awab'ej re Israel

⁵¹ Ak wuqlaju chihab' rokik laj Josafat cho'q awab'ej re Judá, naq laj Okosías, ralal laj Ajab, kixtikib' taqlank sa' xb'eeneb' laj Israel, aran Samaria. Wiib' chihab' ajwi' kitaqlank sa' xb'eeneb' laj Israel.

⁵² Ab'an kixb'aanu li ink'a' nawulak chiru li Qaawa' ut kixtaaqe xb'e li xna' li xyuwa', jo' kixb'aanu ajwi' laj Jerobohán, ralal laj Nebat, a' li kik'amok xb'eheb' laj Israel chi maakob'k.

⁵³ Kixloq'oni ru laj Bahal, kixwiq'ib' rib' chiru ut kixchiq' xjosq'il li Qaawa', xYos laj Israel, jo' tz'aqal kixb'aanu li xyuwa'.