1 Reyes 21 - Q'eqchi Bible

Li awimq uub' re laj Nabot

¹ Jun li winq aj Jisrehel, aj Nabot xk'ab'a', wank jun awimq uub', chi xk'atq rochoch laj Ajab, awab'ej re Samaria.

² Sa' jun kutan laj Ajab kixye re laj Nabot: “K'e we laawawimq uub', xb'aan naq wank chi xk'atq li wochoch. Twaj rawb'al li wawimq aran. Cho'q reeqaj tink'e aawe junaq chaab'il ch'och'; malaj ut tintoj chawu rik'in tumin”, chan.

³ Ab'an laj Nabot kixye re laj Ajab: “Ramro chiwu xb'aan li Qaawa' xk'ayinkil aawe li xweechani rik'in linyuwa'”.

⁴ K'ajo' xrahil xch'ool laj Ajab naq koho sa' rochoch, yo xjosq'il xb'aan naq laj Nabot aj Jisrehel kixye re naq ink'a' tixk'e li na'ajej kireechani rik'in li xyuwa'. Kixsotob' rib' sa' li xch'aat, kixb'alq'usi rib' chiru li tz'ak ut maak'a' kiraj xtzekankil.

⁵ Toja' naq lix Jesabel li rixaqil kiwulak rik'in ut kixpatz' re: “K'a'ut naq ra sa' aach'ool ut maak'a' nakawaj xtzekankil?”, chan.

⁶ Kichaq'ok laj Ajab ut kixye: “Xin'aatinak rik'in laj Nabot aj Jisrehel, naq tixk'e raj we li rawimq uub', chi loq'b'il malaj tink'e junaq chik chaab'il ch'och' cho'q reeqaj, ab'an xye we: «Ink'a' nawaj xk'eeb'al», chan”.

⁷ Toja' naq li rixaqil kixye re: “Ak xq'ehil xk'utb'al naq laa'at wank aawankil sa' xb'een Israel! Waklin, wa'in ut chisaho'q sa' laach'ool! Laa'in tink'ehoq aawe li rawimq uub' laj Nabot aj Jisrehel”.

⁸ Tikto lix Jesabel kitz'iib'ank hu sa' xk'ab'a' laj Ajab, kixkaaxti rik'in li xmatq'ab' ut kixtaqla rik'ineb' li cheekal winqeb' ut eb' li wankeb' xwankil, rech tenamitul laj Nabot.

⁹ Sa'eb' li hu kixtz'iib'a a'in: “Yehomaq resil naq taawanq kuyuk sa'. Chirix a'an teechunub' laj Nabot chiruheb' li tenamit.

¹⁰ Sik'omaq wiib'aqeb' li winq ink'a' useb' xna'leb' li te'jitoq re ut te'xye chi jo'ka'in: «Xamajewa li Qaawa' ut li awab'ej». Toja' naq teerisi laj Nabot chirix li tenamit ut teeteni chi pek toj reetal taakamq”.

¹¹ Eb' li cheekel winq, eb' laj jolominel jo'wi' li rech tenamitul laj Nabot ke'xb'aanu jo' tz'aqal kixye lix Jesabel sa' li hu kixtaqla reheb'.

¹² Ke'xye resil li kuyuk sa' ut ke'xchunub' laj Nabot chiruheb' li tenamit.

¹³ Toja' naq li wiib'eb' li ink'a' useb' xna'leb' ke'xchunub' rib' chiru laj Nabot re xjitb'al ut ke'xye chi jo'ka'in: “Laj Nabot xmajewa li Qaawa' ut li awab'ej”, chankeb'. Tikto ke'risi laj Nabot chirix li tenamit ut ke'xteni chi pek toj reetal kikamk.

¹⁴ Chirix chik a'an ke'xtaqla xyeeb'al re lix Jesabel: “Laj Nabot xteniik chi pek ut xkamk”.

¹⁵ Ka'ajwi' kirab'i naq laj Nabot xteniik chi pek ut xkamk, kixye lix Jesabel re laj Ajab: “Xaqlin ut eechani li xch'och' laj Nabot aj Jisrehel, li ink'a' xraj xk'ayinkil aawe rik'in plaat. Ak xkamk chikan”.

¹⁶ Naq laj Ajab kirab'i naq ak xkamk laj Nabot, kixaqliik ut kikub'eek re reechaninkil li xch'och' laj Nabot.

¹⁷ Toja' naq li raatin li Qaawa' kichalk rik'in laj Elías aj Tisbé ut kixye re:

¹⁸ “Xaqlin ut kub'en chi xk'ulb'al laj Ajab, awab'ej re Israel li wank Samaria. Anaqwan wank sa' li xch'och' laj Nabot re reechaninkil.

¹⁹ Taawaatina chi kama'an: «Jo'ka'in xye li Qaawa': Laa'at xakamsi laj Nabot ut xamaq' li xch'och'. Jo'kan naq sa' li na'ajej xe'xreq' wi' li xkik'el laj Nabot eb' li tz'i', aran ajwi' te'xreq' laakik'el laa'at»”.

²⁰ Naq laj Elías kiwulak aran, laj Ajab kixye: “Ma xolinaataw laa'at li xik' nakat-ilok we?”, chan. Kixye laj Elías: “Xolatintaw. Laa'at xak'ayi aawib' chi xb'aanunkil li ink'a' nawulak chiru li Qaawa';

²¹ jo'kan naq laa'in tink'amoq chaq rahilal sa' aab'een. Tinsach ruheb' chi junajwa eb' laawalal aak'ajol, ut tinkamsiheb' chixjunileb' li winq li wankeb' sa' laawochoch, a' yaal ma muneb' malaj ink'a', jo'k'ihaleb' li wanqeb' sa' xsutam Israel.

²² Tinsacheb' ru eb' laawalal aak'ajol jo' naq kinsacheb' ru li ralal xk'ajol laj Jerobohán, ralal laj Nebat. Te'xk'ul jo' kixk'ul li xjunkab'al laj Basá, ralal laj Ajías, xb'aan naq xachiq' injosq'il ut xak'ameb' xb'e eb' laj Israel chi maakob'k.

²³ X'aatinak ajwi' li Qaawa' chirix lix Jesabel ut xye: «Lix Jesabel taatiwe'q xb'aaneb' li tz'i' sa' xteepal Jisrehel».

²⁴ Ut eb' li ralal xk'ajol laj Ajab li te'kamq sa' li tenamit, te'tiwe'q xb'aaneb' li tz'i'; ut eb' li te'kamq sa' k'aleb'aal, te'k'uxe'q xb'aaneb' li so'sol”.

²⁵ Relik chi yaal naq maajun chik kiwank jo' laj Ajab, li k'ajo' li maa'usilal kixb'aanu chiru li Qaawa', takchi'inb'il xb'aan lix Jesabel li rixaqil.

²⁶ Kixb'aanu li tz'i'b'eetalil naq kixloq'oniheb' li yiib'anb'il yos, jo' ke'xb'aanu eb' laj Amor li ke'sache'k ruheb' xb'aan li Qaawa' chiruheb' laj Israel.

²⁷ Naq laj Ajab kirab'i a'in, kixq'ich li raq', kixlan rib' sa' saak ut ink'a' chik kiwa'ak. Nawark chi wank li saak chirix ut naxulnak aj chik nab'eek.

²⁸ Toja' naq li Qaawa' kiraatina laj Elías aj Tisbé ut kixye re:

²⁹ “Ma xawil naq laj Ajab xkub'si rib' chiwu? Jo'kan naq ink'a' tintaqla li rahilal naq toj yo'yooq; toj chiru b'an chik xyu'am li ralal tink'e li rahilal sa' xb'een li xjunkab'al”.