1 Juan 4 - Q'eqchi Bible

Li wiib' chi musiq'ej

¹ Ex inrahom, meepaab' chixjunil li musiq'ej; chek'ehaq b'an reetal ma rik'in li Yos chalenaq li musiq'ej, xb'aan naq naab'aleb' propeet aj b'alaq' xe'waklije'k chaq sa' ruuchich'och'.

² A'an a'in teenaw wi' naq junaq wank li xmusiq' li Yos rik'in: chixjunil li taach'olob'anq re naq li Jesukriist koltz'ejwalo'q, wank li xmusiq' li Yos rik'in;

³ a'ut chixjunil li ink'a' taach'olob'anq li yaal chirix li Jesus, a'an maak'a' li xmusiq' li Yos rik'in, na'aatinak b'an sa' xk'ab'a' laj Tz'eqtaanahom re li Kriist. Ak eerab'ihom resil chirix a'in naq tento taak'ulunq, ut anaqwan ak wank sa' ruuchich'och'.

⁴ Ex inkok'al, rehex li Yos ut ak xeq'ax ruheb' li propeet aj b'alaq', xb'aan naq Li wank eerik'in a'an q'axal nim xwankil chiru li wank sa' ruuchich'och'.

⁵ Eb' a'an reheb' li ruuchich'och'; jo'kan naq ruuchich'och'il aatin neke'xye, ut neke'ab'iik xb'aan li ruuchich'och'.

⁶ A'ut laa'o reho li Yos. Ani naxnaw ru li Yos, a'an nokoorab'i; ut li moko re ta li Yos, a'an ink'a' nokoorab'i. A'in naqanaw wi' ru li xmusiq' li yaal ut li b'alaq' aj musiq'ej.

Li rahok

⁷ Ex inrahom, chiqara qib' chiqib'il qib' xb'aan naq li rahok rik'in li Yos chalenaq, ut chixjunil li narahok, a'an yo'lajenaq rik'in li Yos ut naxnaw ru li Yos.

⁸ Ani ink'a' narahok, ink'a' xnawom ru li Yos, xb'aan naq li Yos a'an rahok.

⁹ A'in kik'utunk wi' qik'in li qaraab'al xb'aan li Yos: naq li Yos kixtaqla chaq li Ralal jun chirib'il sa' ruuchich'och' re naq wanq qayu'am sa' xk'ab'a' A'an.

¹⁰ Rik'in a'in nawank li rahok: moko rik'in ta naq laa'o xoorahok re li Yos, rik'in b'an naq A'an kirahok qe ut kixtaqla chaq li Ralal cho'q kames-mayej chirix li qamaak.

¹¹ Ex inrahom, wi jo'ka'in naq kooxra li Yos, laa'o ajwi' tento naq chiqara qib' chiqib'il qib'.

¹² Li Yos maajun sut ki'ile'k ru xb'aan anihaq. Wi laa'o naqara qib' chiqib'il qib', li Yos wank qik'in chi junelik ut li xrahom tz'aqal re ru qik'in.

¹³ A'in naqanaw wi' naq wanko rik'in li Yos ut A'an qik'in: naq koxk'e chi tz'aqonk rik'in li xMusiq'.

¹⁴ Laa'o qilom ut naqach'olob' xyaalal naq li Yuwa'b'ej kixtaqla chaq li Ralal cho'q aj Kolol re li ruuchich'och'.

¹⁵ Ani taach'olob'anq re naq li Jesus a'an li Ralal li Yos, li Yos nakanaak rik'in ut a'an nakanaak rik'in li Yos.

¹⁶ Ut laa'o qanawom ut qapaab'ahom chi tz'aqal yaal li qaraab'al xb'aan li Yos. Li Yos a'an rahok, ut ani nakanaak sa' li rahok, a'an nakanaak rik'in li Yos ut li Yos rik'in a'an.

¹⁷ Rik'in a'in tz'aqal re ru li rahok qik'in: naq kawaq qach'ool sa' xkutankil li raqb'a aatin, xb'aan naq jo' chanru li xyu'am li Jesus, jo'kano ajwi' laa'o sa' li ruuchich'och' a'in.

¹⁸ Naq wank li rahok, maak'a' li xiw. Li tz'aqal rahok narisi li xiw, xb'aan naq li xiw nachalk rik'in li tojb'amaak, ut li ani toj naxiwak naraj naxye naq maji' tz'aqal re ru sa' li rahok.

¹⁹ Laa'o nokoorahok xb'aan naq A'an kooxra xb'enwa.

²⁰ Wi junaq nayehok: “Laa'in ninra li Yos”, ab'an xik' naril li ras riitz'in, a'an aj tik'ti', xb'aan naq li ink'a' naxra li ras riitz'in li naril ru, moko naru ta tixra li Yos li ink'a' naril ru.

²¹ Ut a'an a'in li chaq'rab' qak'ulum rik'in: li narahok re li Yos chixrahaq ajwi' li ras riitz'in.