1 Corintios 5 - Q'eqchi Bible

Xq'usb'al li jo'maajo'il na'leb'

¹ Yalaq b'ar na'ab'imank resil naq wank li jo'maajo'il na'leb' sa' eeyanq, k'ajo' xyib'al ru a'an. Chi moko sa' xyanqeb' li maak'a'eb' xpaab'aal na'uxmank chi jo'kan! Wank jun sa' eeyanq li wank cho'q rixaqil li xkab' xna'!

² Ut laa'ex toj nekeq'etq'eti eerib'! Ma ink'a' us naq xraho'k raj leech'ool ut xerisi raj sa' eeyanq li xb'aanunk re a'an?

³ Us ta maa'anihin sa' eeyanq chi tz'ejwalejil, ab'anan wankin eerik'in rik'in linmusiq'. Us b'i', chanchan wi' wankin sa' eeyanq, ak xinraqok aatin sa' xb'een li xb'aanu chi jo'kan:

⁴ sa' xk'ab'a' li Qaawa' Jesus, jo'q'e ch'utch'uuqex ut linmusiq' wanq eerochb'een, rik'in xnimal xwankil li Qaawa' Jesus,

⁵ q'axtesimanq li winq a'an sa' ruq' laj tza re naq taasachq li xtz'ejwal, ab'an chikole'q li xmusiq' sa' xkutankil li Qaawa'.

⁶ Maak'a' xyaalal li xnimob'resinkil eerib'! Ma ink'a' nekenaw naq kach'inaq xyu li q'em naxsipob'resi chixjunil?

⁷ Isihomaq sa' eeyanq li najter ch'amal q'em re naq laa'exaq ak'il q'em, xb'aan naq laa'ex li wa maak'a' xch'amal. Li Kriist, a' li qakarneer re li Paswa, kimayejaak.

⁸ Jo'kan utan, ninq'ehiqo ink'a' rik'in najter ch'amal q'em chi moko rik'in xch'amal li lab'al malaj li maa'usilal, rik'inaq b'an li wa maak'a' xch'amal, naraj naxye chi saqaq ru li qach'ool ut sa' xyaalal.

⁹ Xintz'iib'a sa' linhu naq meejunaji eerib' rik'ineb' laj ko'b'eet ut laj yumb'eet.

¹⁰ Ab'anan ink'a' xinye: Tik ink'a' texwanq sa' xyanqeb' laj ko'b'eet ut eb' laj yumb'eet li wankatqeb' sa' li ruuchich'och' a'in malaj rik'ineb' laj rahinel ru b'ihomal, rik'ineb' laj elq', laj loq'oninel li yal k'oxlanb'il yos. Wi ta jo'kan, tento raj tex'elq sa' ruuchich'och'!

¹¹ Ink'a'! Li xintz'iib'a a'an a'in: Meejunaji eerib' rik'ineb' li “qas qiitz'in” neke'xk'ab'a'in, ut a'aneb' aj ko'b'eet, aj rahinel ru b'ihomal, aj loq'oninel li yal k'oxlanb'il yos, aj majewanel, aj kalajenaq malaj aj elq'. Chi moko chexwa'aq rik'ineb' a'an!

^12-13 K'a' tab'i' naq tinraqoq aatin chirixeb' li moko aj paab'aneleb' ta? A' li Yos taaraqoq aatin sa' xb'eeneb'. Ab'an laa'ex tento xraqb'al aatin sa' xb'eeneb' leerech aj paab'anelil. Jo'kan naq “isihomaq sa' eeyanq li ink'a' us xch'ool”, chan li Santil Hu.