1 Corintios 3 - Q'eqchi Bible

¹ Ex was wiitz'in, laa'in ink'a' xinru cheraatinankil jo' aj paab'anel wank tz'aqal li Musiq'ej rik'ineb', xexwaatina b'an jo' li toj q'uneb' xch'ool, toj k'uula'alex chi xpaab'ankil li Kriist.

² Leech xink'e cheruk', ut ink'a' kawil tzekemq li toj maji' xexru chi xkuyb'al xtzekankil. Chi moko anaqwan ajwi' teekuy,

³ xb'aan naq toj q'un leech'ool chi paab'ank. Naq toj wanq sa' eeyanq li kaqalik ut li wech'ij ib', ma ink'a' tab'i' yaal naq toj nekexk'oxlak ut nekexk'anjelak jo'kex li winq junch'ol?

⁴ Naq naxye junaq: “Laa'in rehin laj Pablo”, ut wan wi' chik nayehok: “Laa'in rehin laj Apolo”, ma ink'a' yookex chi xb'aanunkil jo' naxye xna'leb' li ruuchich'och'?

Yal aj k'anjelo chiru li Yos

⁵ Ani laj Apolo? Ani laj Pablo? Yal aj k'anjeleb'. Sa' xk'ab'a'eb' a'an xex'ok chi paab'ank, ut li junjunq xb'aanu li xk'anjel a' yaal chanru xk'ehe'k re xb'aan li Qaawa'.

⁶ Laa'in xin'awok, laj Apolo xt'aqresink; ut li xk'iiresink, a'an li Yos.

⁷ Jo'kan naq maak'a' xwankil laj awinel chi moko laj t'aqresinel; ka'ajwi' li Yos li nak'iiresink wank xwankil.

⁸ Li na'awok ut li nat'aqresink juntaq'eeteb' xloq'al, ab'an li junjunq toxk'ul xq'ajkamunkil a' yaal chanru xk'anjelak.

⁹ Laa'o nokook'anjelak qochb'een li Yos ut cho'q re A'an; ut laa'ex xk'aleb'aalex li Yos, xkab'lahomex li Yos.

¹⁰ Jo' chanru linmaatan k'eeb'il we xb'aan li Yos, laa'in xink'e li rub'elankil li kab'l, jo' chaab'il aj jolominel re li kab'lak, ut jalan chik nakab'lak sa' xb'een. Ab'an chirilaq li junjunq chanru yo chi kab'lak,

¹¹ xb'aan naq maa'ani naru tixk'e junaq chik rub'elankil li kab'l chiru li ak wank, a' li Jesukriist.

¹² Ut wi yooko chi kab'lak sa' xb'een li ub'elanb'il a'in rik'in oor, plaat, chaq'alil ru pek, che', pim malaj k'im,

¹³ li xk'anjel li junjunq toxk'utb'esiiq sa' li xnimal kutan. Xb'aan naq sa' roso'jikeb' li kutan li xam taayaloq xchaab'ilal xk'anjel li junjunq.

¹⁴ Wi laak'anjel laa'at tkanaaq sa' xna'aj, taak'ul aaq'ajkamunkil;

¹⁵ ab'an wi li xb'aanuhom laj k'anjel a'an taa'oso'q xb'aan li xam, ra tixk'ul li poyanam a'an. Ab'anan taakole'q: chanchan taanume'q sa' xam naq taakole'q.

¹⁶ Ma ink'a' nekenaw naq laa'ex rochoch li Yos ut li xMusiq' li Yos nawank eerik'in?

¹⁷ Wi ani naxjuk' li rochoch li Yos, a' ajwi' li Yos taajuk'uq re a'an, xb'aan naq li rochoch li Yos a'an sant ut a'anex laa'ex.

¹⁸ Maa'ani chixb'alaq'i rib'! Wi wan junaq sa' eeyanq nareek'a naq wank xna'leb' sa' li ruuchich'och' a'in, chixb'aanuhaq rib' jo' li maak'a' naxnaw re naq tixtaw xna'leb'.

¹⁹ Xb'aan naq li xnimal xk'a'uxl li ruuchich'och' a'in a'an sachalil na'leb' chiru li Yos. Tz'iib'anb'il sa' li Santil Hu: “Naxchapeb' li wankeb' xna'leb' rik'in ajwi' li xseeb'aleb'”.

²⁰ Tz'iib'anb'il ajwi': “Li Qaawa' naxnaw naq maak'a' na'ok wi' li xk'a'uxeb' li wankeb' xna'leb'”.

²¹ Jo'kan utan, maa'ani chixnimob'resi rib' sa' xk'ab'a'eb' li winq, xb'aan naq chixjunil li k'a'aq re ru eere laa'ex:

²² laj Pablo, laj Apolo, laj Sefas, li ruuchich'och', li yu'am, li kamk, chixjunil li wank anaqwan ut li toj chaalel, chixjunil eere laa'ex;

²³ ut laa'ex rehex li Kriist, ut li Kriist re li Yos.