1 Corintios 16 - Q'eqchi Bible

Xraqik li hu

¹ Chirix li tenq'aal cho'q reheb' laj santil paab'anel cheb'aanuhaq ajwi' laa'ex li xinchaq'rab'iheb' wi' eb' li Iklees wankeb' Galacia.

² Rajlal domiing li junjunq sa' eeyanq chixk'uulahaq sa' rochoch jo'ch'inal jo'nimal xruhank xxokb'al, re naq ink'a' yooqex chi kub'sink naq toxin'elq laa'in.

³ Akaq xinwulak eerik'in, tintaqlaheb' Jerusalén eb' li sik'b'ileb' ru eeb'aan, chi wanq xhuheb', re naq toxe'xq'axtesi li tenq'aal x'alaak sa' leech'ool.

⁴ Ut wi us naq tinxik ajwi' laa'in, wochb'eeneb' naq tooxik.

⁵ Tinwulaq eerik'in naq akaq xinnume'k Macedonia, xb'aan naq Macedonia toxinnume'q.

⁶ Mare toxinkanaaq jun k'amokaq sa' eeyanq; mare toj tinnumsi li hab'alq'e eerik'in, re naq laa'ex tineerochb'eeni kach'inaq toja' yaal tana b'ar tinxik.

⁷ Xb'aan naq ink'a' nawaj naq yal tinnume'q eerik'in, twaj b'an tinwanq jarub'aq kutan sa' eeyanq, wi jo'kan naraj li Qaawa'.

⁸ Aran Éfeso tinkanaaq toj sa' li Pentekostés,

⁹ xb'aan naq xteemank chiwu jun nimla okeb'aal re naq taa'uuchinq aran link'anjel, us ta naab'aleb' li xik' neke'ilok we.

¹⁰ Wi taawulaq laj Timoteo, cherilaq re naq twanq sa' eeyanq chi maak'a'aq xxiw, xb'aan naq wech aj k'anjelil sa' xk'anjel li Qaawa'.

¹¹ Maa'ani chitz'eqtaananq re, chechaq'rab'i b'an sa' tuqtuukil usilal re naq taak'ulunq wi' chik wik'in, xb'aan naq yookin chi royb'eninkil wochb'eeneb' li was wiitz'in.

¹² Naab'al sut xwelaji ru laj Apolo, li wiitz'in, re taaxik eerik'in rochb'eeneb' laj paab'anel; ab'an maak'a' xch'ool chi xik anaqwan. Jo'q'e tana tixk'e rib' chiru, toja' naq taaxik.

¹³ Chexyo'leq, kaw xaqxooqex sa' li paab'ank, chexk'anjelaq jo' tz'aqal winq, kawaqex.

¹⁴ Cheb'aanu chixjunil rik'in rahok.

¹⁵ Nekenaw chi us naq li xjunkab'al laj Estéfanas a'aneb' xb'een chi paab'ank sa' xsutam Akaya ut xe'xq'axtesi rib' chi k'anjelak chiruheb' laj santil paab'anel.

¹⁶ Nintz'aama cheru naq chexpaab'anq chiruheb', jo' ajwi' chiru chixjunileb' li neke'okenk chi k'anjelak rochb'eeneb'.

¹⁷ Nasaho'k linch'ool rik'in xk'ulunik laj Estéfanas, laj Fortunato ut laj Akaiko: eb' a'an xe'wank cho'q eeruuchil naq maa'anihex.

¹⁸ Xe'xk'ojob' inch'ool jo'wi' leech'ool laa'ex. Chenawaq b'i' roxloq'inkileb' li winq a'an.

¹⁹ Neke'xtaqla xsahil eech'ool eb' li Iklees re Asia. Neke'xtaqla naab'al xsahil eech'ool, sa' xk'ab'a' li Qaawa', laj Akila ut lix Priska, rochb'eeneb' li Iklees li nach'utlaak sa' rochocheb'.

²⁰ Chixjunileb' laj paab'anel neke'xtaqla xsahil eech'ool. Chek'ehaq xsahil eech'ool cherib'il eerib' rik'in li santil utz'uk u.

²¹ Laa'in laj Pablo nintz'iib'a xsahil eech'ool rik'in wuq'.

²² Ani ink'a' naxra li Qaawa', tz'eqtaananb'ilaq chi junajwa! Maraná tha.

²³ Li rusilal li Qaawa' Jesus chiwanq taxaq eerik'in!

²⁴ Nekexinra chejunilex sa' xk'ab'a' li Kristo Jesus.