1 Corintios 14 - Q'eqchi Bible

Li aatinak jo' propeet ut sa' jalanil aatin

¹ Cheyal eeq'e chi wank sa' li rahok ib', ab'an cheq'axtesi ajwi' leech'ool chi xsik'b'al leemaatan naxk'e li Musiq'ej, ut xb'enwa li aatinak jo' propeet.

² Xb'aan naq ani na'aatinak sa' jalanil aatin ink'a' naraatinaheb' li tenamit, rik'in b'an li Yos na'aatinak. Maa'ani natawok ru: yo chi xyeeb'al li muqmuukil na'leb' rik'in xwankil li Musiq'ej.

³ Ab'an li na'aatinak jo' propeet naraatinaheb' li tenamit re xkab'lankil li komonil, re xwaklesinkil ut xk'ojob'ankil xch'ooleb'.

⁴ Ani na'aatinak sa' jalanil aatin naxk'uub' xch'ool xjunes rib'; ut li na'aatinak jo' propeet naxk'uub' ru chixjunil li komonil.

⁵ Nawaj raj naq chejunilex wanq eemaatan re aatinak sa' jalanil aatin, ab'an q'axal chik us naq tex'aatinaq jo' propeet. Xb'aan naq li na'aatinak jo' propeet naxq'ax ru li na'aatinak sa' jalanil aatin wi a'in ink'a' naxch'olob' xyaalal li raatin, re naq taakab'laaq li komonil.

⁶ Ex was wiitz'in, qayehaq naq laa'in tinwulaq eerik'in, yooqin chi aatinak sa' jalanil aatin li ink'a' neketaw ru: k'a' raj ru teera chirix linwulajik, wi li waatin maak'a' tixk'utb'esi cheru, chi moko tixk'e eechaab'il k'a'uxl, chi moko tixnumsi xyehom li Yos malaj eetzolb'al?

⁷ Jo'ka'in nak'ulmank rik'ineb' li wajb' jo' li xolb' ut li aarp. Wi ta ink'a' jalan jalanq li xyaab'eb', chan raj ru naq taanawmanq li na'elk sa' li xolb' ut li na'elk sa' li aarp?

⁸ Ut wi ta li tronpeet ink'a' saqenk taa'eek'anq, ani tixkawresi rib' re xik chi yalok?

⁹ Jo'kanaqex ajwi' laa'ex naq yooqex chi aatinak sa' jalanil aatin: wi ink'a' ch'olch'o ru tex'aatinaq, chanru naq taatawmanq xyaalal li k'aru xeye? Jo'qex li yal sa' iq' na'aatinak.

¹⁰ K'ajo' xk'ihaleb' li aatinob'aal wank sa' ruuchich'och'! Ink'a' ninnaw jar paay, ut li junjunq wank xyaalal.

¹¹ Ab'anan wi laa'in ink'a' nintaw xyaalal li aatin, chanchanaqin aj jalanil tenamit chiru li na'aatinak wik'in; ut li na'aatinak wik'in, aj jalan tenamit cho'q we laa'in.

¹² Jo'kan utan, laa'ex li nekek'e eech'ool chi xsik'b'al li maatan naxk'e li Musiq'ej cheyalaq eeq'e chi xsik'b'al chi yo'oon li maatan nakab'lank li komonil.

¹³ Li na'aatinak sa' jalanil aatin li ink'a' natawmank ru, xtz'aamahaq chiru li Yos re naq truuq tixye xyaalal li raatin.

¹⁴ Xb'aan naq wi nintijok sa' jalanil aatin li ink'a' natawmank ru, relik chi yaal naq linmusiq' natijok, ab'anan link'a'uxl maak'a' naruuchin.

¹⁵ K'a' put ru tento tinb'aanu? Tento tintijoq rik'in linmusiq', ab'an tento tintijoq ajwi' rik'in link'a'uxl. Tento tinb'ichanq rik'in linmusiq', ab'an tinb'ichanq ajwi' rik'in link'a'uxl.

¹⁶ Xb'aan naq wi yooqat chi xnimankil ru li Yos ka'ajwi' rik'in laamusiq', chan put ru naq li yal aj ab'inel tixye: “Jo'kan taxaq”? Ink'a' naxnaw k'aru yookat chi xyeeb'al sa' li yoxink nakab'aanu.

¹⁷ Yaal naq nakatyoxink chi chaab'il, ab'an li jun chik ink'a' natoch'e'k xch'ool.

¹⁸ Ninb'anyoxi chiru li Yos naq q'axal chik ninnaw aatinak sa' jalanil aatin cheru chejunilex;

¹⁹ ab'an sa' xch'utameb' laj paab'anel nink'oxla naq q'axal us raj naq tinye oob'aq aatin li te'xtaw ru re naq teb'intzol ajwi' li junch'ol, chiru naq tinye lajeeb'aq mil sa' jalanil aatin ut ink'a' te'xtaw ru li ninye.

²⁰ Ex was wiitz'in, meek'uula'ali eerib' rik'in leena'leb'; k'uula'alaqex b'an chiru li maa'usilal, ut cheekel winqaqex rik'in leena'leb'.

²¹ Tz'iib'anb'il sa' li Chaq'rab': “Twaatinaheb' li tenamit a'in sa' jalanil aatinob'aal ut chi xtz'uumal reheb' laj ab'l tenamit. Ab'an chi moko chi jo'kan tine'rab'i, chan li Qaawa'”.

²² Jo'kan naq li maatan re aatinak sa' jalanil aatin a'an eetalil cho'q reheb' li maak'a' neke'xpaab' ut ink'a' cho'q reheb' laj paab'anel. A'ut li maatan re aatinak jo' propeet a'an maatan reheb' laj paab'anel ut ink'a' reheb' li maak'a' neke'xpaab'.

²³ Wi taach'utlaaq chixjunil li komonil, ut chixjunileb' te'aatinaq sa' jalanil aatin, ut te'ok aran eb' li yal aj ab'ineleb' malaj li maak'a' neke'xpaab', ma ink'a' tab'i' te'xye naq wax eeru?

²⁴ Ab'anan wi chixjunileb' te'aatinaq jo' propeet ut taa'ok aran junaq li maak'a' naxpaab' malaj yal aj ab'inel, li jun a'an taatoch'e'q xch'ool xb'aan chixjunileb' ut taaraqmanq aatin sa' xb'een xb'aan chixjunileb'.

²⁵ Taakutanob'resimanq li muqmu sa' xch'ool; toja' naq toxhupub' rib' chi xloq'oninkil ru li Yos ut tixch'olob' naq relik chi yaal li Yos wank sa' eeyanq.

²⁶ Ex was wiitz'in, a'an a'in li nawaj xyeeb'al eere: naq teech'utub' eerib', li junjunq truuq tixb'icha junaq saalm; truuq ajwi' taak'ehoq na'leb', tixye li k'aru xk'utb'esiik chiru, taa'aatinaq sa' jalanil aatin malaj tixch'olob' xyaalal eb' li aatin a'in. Ab'anan tento naq chixjunil taa'uxmanq re xkab'lankil li komonil.

²⁷ Wi wan te'aatinaq sa' jalanil aatin, che'aatinaq wiib' oxib'aq, ab'an chixjunqaleb'; ut chiwanq junaq aj jaltesinel ru aatin.

²⁸ Wi maak'a' junaq aj jaltesinel ru aatin, mik'a' eeye sa' li ch'utub'aj ib': yal sa' xch'ool chi'aatinaq li junjunq jo' ajwi' rik'in li Yos.

²⁹ A'an ajwi' tento xb'aanunkil rik'ineb' li propeet: che'aatinaq wiib' oxib'aq ut eb' li junch'ol che'raqoq aatin chirix li xe'xye.

³⁰ Ut wi wan k'aru taak'ute'q xb'aan li Yos chiru junaq k'ojk'o aran, chikanab'aaq chi aatinak xb'aan li jun chik.

³¹ Xb'aan naq chejunilex truuq tex'aatinaq jo' propeet chejunjunqal re naq te'tzole'q ut tkawuuq xch'ool chixjunileb'.

³² Li maatan re aatinak jo' propeet wank rub'el xwankil eb' li propeet,

³³ xb'aan naq li Yos moko Yos ta re po'ok ch'oolej, xYos b'an li tuqtuukilal. Jo' na'uxk sa' chixjunileb' li x'Iklees eb' laj santil paab'anel,

³⁴ me'aatinak li ixq sa' li ch'utam. Maak'a'aq xna'ajeb' chi aatinak, us b'an te'xkub'si rib' jo' ajwi' naxye xChaq'rab' laj Moisés.

³⁵ Wi wank k'aru te'raj xnawb'al, che'xpatz'aq sa' rochocheb' re li xb'eelomeb', xb'aan naq moko us ta naq li ixq taa'aatinaq sa' li ch'utam.

³⁶ Ma eerik'in tab'i' laa'ex elenaq chaq li Raatin li Yos? Malaj ka'ajwi' laa'ex xexk'uluk re?

³⁷ Wi wan junaq naxk'oxla rib' naq a'an propeet malaj musiq'anb'il xb'aan li Musiq'ej, chixnawaq naq li k'aru yookin chi xtz'iib'ankil eerik'in, a'an xchaq'rab' li Qaawa'.

³⁸ Ut wi ink'a' naxnaw a'in, moko nawb'ilaq ta ajwi' ru xb'aan li Yos.

³⁹ Jo'kan utan, ex was wiitz'in, cheq'axtesi leech'ool chi xsik'b'al li maatan re aatinak jo' propeet, ut meeram li aatinak sa' jalanil aatin.

⁴⁰ Ab'anan chi'uxmanq chixjunil sa' chaab'ilal ut chi tustu ru.