1 Corintios 11 - Q'eqchi Bible

¹ K'amomaq eere wik'in jo' laa'in nink'am we rik'in li Kriist.

Chirix xtz'apb'al xjolomeb' li ixq

² Ninnima eeru xb'aan naq ninjultiko'k eere chi junelik ut nekek'uula sa' eech'ool leetzolb'al jo' naq xink'ut cheru.

³ Ab'anan twaj teenaw naq li xjolomil chixjunileb' li winq a'an li Kriist, ut li xjolomil li ixq a'an li winq, ut li xjolomil li Kriist a'an li Yos.

⁴ Wi junaq winq natijok malaj na'aatinak jo' propeet chi lanlo li xjolom, naxk'ut xxutaan li xjolom.

⁵ Ut wi junaq ixq natijok malaj na'aatinak jo' propeet chi ink'a' lanlo li xjolom, naxk'ut xxutaan li xjolom; chanchan wi' b'esb'il rismal xjolom.

⁶ Jo'kan utan, wi junaq ixq ink'a' naxlan li xjolom, chixb'esaq rismal li xjolom. Ut wi xutaanal cho'q re li ixq naq b'esb'ilaq malaj joob'ilaq li xjolom, chixlanaq li xjolom!

⁷ Ink'a' us naq li winq tixlan li xjolom, xb'aan naq a'an xjalam u ut xrepom xloq'al li Yos; ab'an li ixq a'an xloq'al li winq.

⁸ Relik chi yaal naq moko a' ta li winq nachalk rik'in li ixq, a' b'an li ixq nachalk rik'in li winq.

⁹ Chi moko li winq kiyoob'tesiik sa' xk'ab'a' li ixq, a' b'an li ixq kiyoob'tesiik sa' xk'ab'a' li winq.

¹⁰ Aran nachalk naq sa' xk'ab'a'eb' li ánjel tento naq li ixq twanq sa' xjolom junaq reetalil naq li winq wank xwankil sa' xb'een.

¹¹ Chirix chik a'an, chiru li Qaawa' moko wank ta li ixq chi maak'a'aq ta li winq, chi moko wank ta li winq chi maak'a'aq ta li ixq.

¹² Xb'aan naq wi li ixq nachalk rik'in li winq, li winq nayo'laak rik'in li ixq, ut chixjunil nachalk rik'in li Yos.

¹³ K'aru nekek'oxla laa'ex? Ma us naq li ixq taatijoq chiru li Yos chi ink'a' lanlooq li xjolom?

¹⁴ Ma ink'a' a' ajwi' leek'a'uxl nak'utuk cheru naq xutaanal cho'q re li winq naq tixk'e chi chamo'k li rismal?

¹⁵ Ab'anan li ixq naxtaw xloq'al naq cham li rismal. Relik chi yaal naq li rismal k'eeb'il re jo' ruuchil xt'ikrul li xjolom.

¹⁶ Ut wi wank junaq naraj wech'ink chirix a'in, chixnawaq naq laa'o jo' ajwi' eb' li x'Iklees li Yos k'aynaqo chi xb'aanunkil chi jo'kan yalaq b'ar.

Li xloq'laj Wa li Qaawa'

¹⁷ Nawaj ajwi' xyeeb'al eere naq ink'a' nasaho'k linch'ool chirix leech'utam, xb'aan naq aran k'ajo' chik li ink'a' us yookex chi roksinkil chiru li us.

¹⁸ Li xb'een ninye eere a'an a'in: xwab'i resil naq wank jachok ib' sa' eeyanq naq nekech'utub' eerib' sa' leeloq'laj ch'utam. Laa'in nink'oxla naq yaal ajwi' b'ayaq chixjunil a'in.

¹⁹ Tento ajwi' twanq wech'ij ib' sa' eeyanq re naq chik'utunq aniheb' li tz'aqal aj paab'aneleb' sa' eeyanq.

²⁰ Naq nekech'utub' eerib' sa' komonil, maawa' chik xtzekankil li xloq'laj wa li Qaawa' nekeb'aanu,

²¹ xb'aan naq li junjunq naxseeb'a rib' chi xtzekankil li xwa; ut wan taatz'okaaq wan taakalaaq.

²² Ma maak'a' eerochoch texwa'aq tex'uk'aq wi'? K'a'ut naq neketz'eqtaana li x'Iklees li Yos ut nekeraj xk'utb'al xxutaan eb' li maak'a' wank reheb'? K'aru tinye eere? Ma tinye eere naq us yookex chi xb'aanunkil? Rik'in a'an tinye naq ink'a' us yookex.

²³ Xb'aan naq li xink'ul laa'in rik'in li Qaawa', a'an ajwi' li xink'ut cheru: naq li Qaawa' Jesus, chiru li q'oqyink yo wi' chi q'axtesiik, kixchap li wa,

²⁴ ut naq ak xyoxink chiru li Yos, kixjachi ut kixye: “A'an a'in lintz'ejwal q'axtesinb'il sa' eek'ab'a'. Cheb'aanu a'in re xnimankil injultikankil”.

²⁵ Jo'kan ajwi' kixb'aanu rik'in li uk'leb'-sek' naq ak xraqe'k chi wa'ak: “Li sek' a'in a'an li Ak' Sumwank sa' xk'ab'a' linkik'el -chan-. Jar wa teeruk' xsa', cheb'aanu a'in re xnimankil injultikankil”.

²⁶ K'ehomaq reetal: jar wa neketzeka li wa a'in ut nekeruk' xsa' li sek' a'in, li xkamik li Qaawa' nekepuktesi resil, toj reetal taak'ulunq wi' chik.

²⁷ Jo'kan naq ani tixtzeka li xwa li Qaawa' malaj taaruk' xsa' li xsek' chi ink'a' xk'ulub', wanq xmaak chiru li xtz'ejwal xkik'el li Qaawa'.

²⁸ Chireek'ahaq b'i' rib' li junjunq; toja' naq tixtzeka li wa a'in ut taaruk' xsa' li sek'.

²⁹ Xb'aan naq ani nawa'ak na'uk'ak chi ink'a' naxk'e xloq'al li xtz'ejwal li Qaawa', nawa'ak ut na'uk'ak cho'q re li xtojb'amaak.

³⁰ A'in xyaalal naq wankeb' naab'al li yaj ut li lub'lub'eb' sa' eeyanq, ut xiikileb' ajwi' ak xe'kamk.

³¹ Wi ta naqeek'a qib' chiqajunjunqal, ink'a' raj tqak'ul li ra.

³² Ut naq naraqmank aatin sa' qab'een xb'aan li Qaawa', nokootije'k xb'aan, re naq ink'a' took'ehe'q sa' tojb'amaak qochb'een li ruuchich'och'.

³³ Jo'kan utan, ex was wiitz'in, naq teech'utub' eerib' chi wa'ak, cheroyb'enihaq eerib' cherib'il eerib'.

³⁴ Wi wank junaq taatz'okaaq, chiwa'aq chaq sa' rochoch, re naq ink'a' teeb'oq raqb'a aatin sa' eeb'een, naq teech'utub' eerib'. Ut li toj maji' xinye eere, toxinch'olob' ut toxink'uub' naq tinwulaq eerik'in.