Zacarías 9 - Q'eqchi Bible

II. LI X'AWAB'EJIHOM LI SIK'B'IL RU XB'AAN LI YOS (9-14) Raqb'a aatin sa' xb'eeneb' li ink'a' neke'xpaab' li Yos

¹ A'aneb' a'in li aatin kixye li Qaawa' chirix li tenamit Hadrak ut chirix Damaask, xb'aan naq eb' laj Aram jo'wi' eb' li xteepal laj Israel, a'aneb' re li Qaawa'.

² Jo'kan ajwi' Jamat li wank chi nach', ut li tenamit Tiro ut Sidón, li nayeemank naq wank xna'leb'eb':

³ “Tiro xwaklesi jun xkawub'resinb'il ochoch, ut xtuub' naab'al li plaat jo' li pojtz'; xtuub' ajwi' naab'al li oor jo' xsululil li b'e.

⁴ Ab'anan li Qaawa' taamaq'oq chiru chixjunil, tixkut li xb'ihomal chi roq palaw ut tixk'at li tenamit sa' li xam chi junwaakaj.

⁵ “Naq eb' laj Askalón te'ril a'an, te'xiwaq; eb' laj Gasa k'ajo' naq te'yot'e'q xch'ool, ut eb' laj Ekrón maak'a' chik te'royb'eni. Taakamsiiq li awab'ej re Gasa ut maajunaq chik poyanam sa' li tenamit Askalón.

⁶ Eb' li jalan chik xtenamiteb' te'wanq Esdod. Tinjuk' li xq'etq'etileb' laj Filistea,

⁷ twisi sa' reheb' li tib' toj wank xkik'el, ut tinmaq' chiruheb' li tz'i'b'eetalil tzekemq. Sa' xyanqeb' a'an te'kanaaq ajwi' jun rela' cho'q re li qaNimajwal Yos, chanchanaq xkomoneb' laj Judá; ut eb' laj Akrón wanqeb' jo'eb' laj Jebús.

⁸ Toja' naq laa'in tink'aak'ale lintenamit, re xkolb'al chiru li yalaq ani taachalq malaj taaxik; ut maajoq'e chik taarahob'tesiiq, xb'aan naq rik'in chik wu nink'aak'ale”, chan li Yos.

Li awab'ej sik'b'il ru xb'aan li Yos

⁹ Jap aawe xb'aan xsahil aach'ool, at Sión, b'ichan chi anchal laawaanm, at Jerusalén. Xb'aan naq we' chaq laarey, tiik xch'ool ut aj q'axol u, tuulan ut wan chaq chirix jun ch'ina b'uur, ral li xul na'iiqank.

¹⁰ A'an tixjuk'eb' chixjunil li k'anjelob'aal li nayalok wi' laj Efraín ut eb' li kawaay re Jerusalén; tixtoqi eb' li simaj na'uxk wi' yalok ut tixpuktesi resilal li tuqtuukilal reheb' li tenamit. Li xwankilal taawulaq chire jun palaw toj chire li jun chik, ut chalen chire li nima' Éwfrates toj sa' xmaril li ruuchich'och'.

Xxaqab'ankil wi' chik xwankil laj Israel

¹¹ At Jerusalén, sa' xk'ab'a' li sumwank xinb'aanu aawik'in rik'in kik' twisiheb' chaq sa' li jul maak'a' ha' chisa' jo'k'ihaleb' li wankeb' chaq chi preexil.

¹² Sutq'inqex chaq sa' leetenamit, laa'ex li preex li toj wank eeroyb'enihom. Anaqwan ajwi' tinye resil naq ka'sut chik texwosob'tesi xb'aan li rahilal xek'ul.

¹³ Ex aj Judá, xexinkawresi jo' li simaj, ut eb' laj Efraín jo' li ral simaj xinkawresiheb' wi'. Laa'ex aj Sión, tinchiq' eejosq'il re xsachb'al ruheb' laj Grecia, chanchanaqex li q'esnal ch'iich' sa' ruq' li jwal kaw rib'.

¹⁴ Li Qaawa' tixtenq'a li xtenamit ut jo'kaq li raq'kaaq naq tixkuti li ral xsimaj; A' li Yos taayaab'asinq li pur ut taaxik chi yalok sa' xyanq li kaqsut-iq' nachalk sa' li chaqich'och'.

¹⁵ Li Nimajwal Yos tixkoleb' li ralal xk'ajol, ut eb' a'an te'xputz'i eb' li neke'jok'i'b'k; te'xsach ruheb' li xik' neke'ilok reheb', te'ruk' li xkik'eleb' jo' li b'iin toj reetal te'k'ojlaaq xch'ool, jo' naq nanujak chi kik' li xsek'ul li mayej sa' xb'een li artal.

¹⁶ Sa' li kutan a'an li Qaawa', li xYoseb', tixb'eresi li xtenamit jo'eb' li karneer; chanchanaqeb' li saqpotz'inkil pek re junaq koroon naq te'k'eemanq xloq'al sa' li xna'ajeb'.

¹⁷ K'ajo'aq xch'ina'usal ut xchaab'ilal li na'ajej! Li triiw taak'iiresinq reheb' li saaj winq ut li b'iin taasahob'resinq xch'ooleb' li tuq'ixq.