Zacarías 3 - Q'eqchi Bible

Li xka moy u: li xtiqib'ankil laj Josué cho'q aj tij

¹ Chirix chik a'an li Qaawa' kixk'ut chiwu sa' moy u laj Josué, li xyuwa'il aj tij, xaqxo chiru li x'ánjel li Yos. Wank ajwi' li maa'us sa' xnim uq' li ánjel re xjitb'al laj Josué.

² Toja' naq li x'ánjel li Qaawa' kixye re li maa'us: “Li Yos taxaq chich'iilanq aawe, at maa'us! A' taxaq li xsik'ok ru li tenamit Jerusalén chiq'usuq aawe! Ma ink'a' tab'i' xkole'k li winq a'in jo' junaq ru'uj si' sa' xam?”.

³ Tiqto laj Josué rik'in tz'ajn aj aq' ut xaqxo chiru li x'ánjel li Qaawa'.

⁴ Toja' naq li ánjel kixye reheb' li xaqxookeb' chiru: “Isihomaq li tz'ajn aj aq' li wank chirix ut k'ehomaq li raq'ul li ninq'ehik chirix.

⁵ K'ehomaq chi xjolom junaq chaab'il sut”. Tikto ke'xk'e raq'ul li ninq'ehik chirix laj Josué ut ke'xk'e chi xjolom li chaab'il sut. Chirix chik a'an li x'ánjel li Qaawa' li wank chi xaqxo, kixye re laj Josué: “K'e reetal naq ink'a' xink'e sa' inch'ool laamaak”, chan.

⁶ Ut kixye re laj Josué:

⁷ “Jo'ka'in naxye li Nimajwal Yos: «Wi nakak'uula linchaq'rab' sa' laach'ool ut nakapaab' li waatin, laa'at tatjolominq re li wochoch; laa'at ajwi' tat-iloq reheb' li xneb'aalil, ut laa'in tatink'e chi wank sa' xyanqeb' li wankeb' arin.

⁸ Ab'i chi us, a Josué, laa'at li xyuwa'il aj tij; che'rab'ihaq ajwi' eb' laj tij li neke'tenq'ank aawe. Ab'ihomaq chi us li tinye, xb'aan naq jo'kex li propeet, laa'ex reetalil li taak'ulmanq: Tintaqla chaq laj k'anjel chiwu, a' li Tuxm xk'ab'a'.

⁹ Xink'e chiru laj Josué jun li pek wank wuqub' pak'al ru; laa'in ajwi' tintz'iib'a ru -chan li Nimajwal Yos-, ut chiru yal jun kutan tinsach li xmaakeb' li ruuchich'och'.

¹⁰ Naq taawulaq li kutan a'an, teech'utub' eerib' chi hilank sa' xmu li kab'l sa' tuqtuukilal, chan li Nimajwal Yos»”.