Zacarías 13 - Q'eqchi Bible

¹ “Sa' li kutan a'an taawanq jun yu'amha', cho'q reheb' li ralal xk'ajol laj David ut cho'q reheb' li wankeb' Jerusalén, re naq te'xch'aj li xmaakeb' ut li xmaa'usilaleb'.

² “Sa' li kutan a'an tinsachi li xk'ab'a'eb' li jalanil yos, sa' xteepal Judá, re naq maajun chik taajultikanq reheb'. Tinsacheb' ajwi' li propeet aj b'alaq' ut eb' li maa'us aj musiq'ej -chan li Nimajwal Yos-.

³ Ut wi wank junaq li toj na'aatinak jo' propeet, taayehe'q re xb'aaneb' li xna' xyuwa': «Laa'at tatkamq, xb'aan naq tik'ti' li yookat xyeeb'al sa' xk'ab'a' li Qaawa'». Ut eb' li xna' xyuwa' te'xkamsi chi ch'iich' naq yooq chi aatinak jo' propeet aj b'alaq'.

⁴ “Sa' li kutan a'an eb' li propeet te'xutaanaq chik chirix li te'ril sa' moy u, ut ink'a' chik te'b'alaq'inq rik'in xk'eeb'al li mutzuk ru aq'ej chirixeb'.

⁵ Li junjunq tixye: «Moko laa'in ta propeet, laa'in b'an aj k'alom winq. Chalen chaq sa' linkach'inal, sa' k'aleb'aal wankin».

⁶ Ut wi ani taapatz'oq re: «B'ar xatiq' xsa' laawuq'?», a'an tixye: «Sa' rochoch li wamiiw xe'xb'aanu we»”.

“Li Qaawa' a'an li qaYos”

⁷ Li Nimajwal Yos naxye chi jo'ka'in: “Ajsi aawu, at q'esnal ch'iich', re xkamsinkil laj k'aak'alenel, ut kamsi li natenq'ank we. Kamsi laj ilol ketomq, ut eb' li karneer te'xcha'cha'i rib'eb'; ut laa'in ink'a' tintoq'ob'a ruheb' li kok' karneer.

⁸ Sa' chixjunil li na'ajej a'in, ka'jachaleb' li poyanam te'kamq; ka'aj chik jun jachal te'kole'q.

⁹ Ut li jun jachal a'in tinnumsiheb' sa' xam, tinch'ajob'resiheb' jo' na'uxk re li plaat, tinpuuxi ruheb' jo' na'uxk re li oor. Toja' naq te'xyaab'a link'ab'a', ut laa'in tinsumeheb' chaq: «Intenamitex laa'ex», cha'qin reheb'; ut eb' a'an te'xye: «Li Qaawa' a'an li qaYos», cha'qeb'”.