Zacarías 10 - Q'eqchi Bible

Li Qaawa' trosob'tesi eb' li ralal xk'ajol

¹ Patz'omaq li hab' re li Qaawa' sa' xq'ehil, ut li Qaawa', li naxk'e li kaaq, tixk'e li hab' chi yo'oon, ut taaraxo'q wi' chik li pim sa' leena'aj chejunilex.

² Eb' li yal k'oxlanb'il yos neke'b'alaq'ik, ut eb' laj q'e tik'ti' li neke'ril. Moko yaal ta neke'xye eb' li neke'xtaw ru li matk', yal re b'an k'ojob'ank ch'oolej naq neke'aatinak. Jo'kan naq li tenamit neke'cha'chotk jo'eb' li karneer, ut wankeb' chi yalaq chanru xb'aan naq maak'a' laj k'aak'alehom reheb'.

³ Xyehom li Qaawa': “K'ajo' injosq'il sa' xb'eeneb' laj k'aak'alehom re lintenamit: tinrahob'tesiheb' li q'etq'et aj k'amol b'e. Naq li Nimajwal Yos tolrula'ani eb' li xkarneer, a'eb' li ralal xk'ajol laj Judá, tixkawresiheb' chi us ut tixk'eheb' xkawilal: jo'aqeb' chik li kawaay jwal kaweb' rib' re yalok.

⁴ Sa' xyanqeb' a'an te'elq laj jolominel, laj k'amol b'e ut li ninqeb' xwankil; sa' xyanqeb' a'an te'elq ajwi' chixjunileb' laj k'amol b'e.

⁵ Jo'kaqeb' laj puub' li neke'xyeq'i li sulul sa' li yalok; te'yaloq xb'aan naq li Qaawa' na'ochb'eenink reheb', ut te'xkanab' sa' xutaan eb' li neke'b'eek chirix kawaay.

⁶ “Laa'in tink'e xkawub' xch'ooleb' laj Judá ut tintenq'aheb' li ralal xk'ajol laj José. Tink'ameb' chaq wi' chik sa' li xtenamiteb' xb'aan naq nawil xtoq'ob'aal ruheb'; chanchan naq maajun sut xintz'eqtaanaheb', xb'aan naq laa'in li Qaawa' li xYoseb' ut nink'ul li xtijeb'.

⁷ Eb' laj Efraín kama'aqeb' li kaweb' rib' chi yalok. Q'axal te'saho'q sa' xch'ool jo'aqeb' li xe'uk'ak b'iin; ut naq te'ril a'an, te'saho'q ajwi' xch'ool eb' li ralal xk'ajol. K'ajo' naq te'yoxinq chiru li Qaawa'.

⁸ “Rik'in jun xuxb' teb'inb'oq ut teb'inch'utub' xb'aan naq laa'in xinkolok reheb'; ut q'axal te'tamq wi' chik jo' naq xe'wank chaq junxil.

⁹ Laa'in xincha'cha'iheb' sa' chixjunileb' li tenamit, ab'an us ta wanqeb' chaq chi najt, tinjultiko'q chaq reheb'; ut sa' jun kutan te'sutq'iiq chaq rochb'eeneb' li ralal xk'ajoleb'.

¹⁰ Twisiheb' chaq Ejiipt, ut tink'ameb' chaq li wankeb' Asiria; tinch'utub'eb' sa' xteepal Galahad ut Líbano, ut k'ajo'aq xk'ihaleb' toj reetal ink'a' taatz'aqloq li xna'ajeb'.

¹¹ Toja' naq te'nume'q wi' chik junpak'al li palaw re Ejiipt, te'xpaynumi chaq li xkawil oq li palaw ut tinchaqihob'resi li ha' re Nilo toj sa' xchamal. Tinsach li xq'etq'etil eb' laj Asiria ut tinjuk' li xwankilal eb' laj Ejiipt.

¹² Tinkawub'resi xch'ooleb' lintenamit ut te'b'eeq sa' ink'ab'a'. Laa'in, li Qaawa', xinyehok re a'in”.