Zacarías 1 - Q'eqchi Bible

I. EB' LI MOY U (1-8) Li sutq'iik wi' chik rik'in li Qaawa'

¹ Waqxaqib' po chik re li xkab' chihab' chi awab'ejink laj Darío aran Persia, li Qaawa' kiraatina laj Sakarías li propeet, ralal laj Berekías, ri xmam laj Idó, ut kixye re chi jo'ka'in:

² “Laa'in q'axal kinjosq'o'k rik'ineb' leemama' leerixa'an.

³ Jo'kan naq ye reheb' lintenamit: «Chalqex wi' chik wik'in ut laa'in tinsutq'iiq eerik'in -chan li Nimajwal Yos-.

⁴ Meeb'aanu jo' ke'xb'aanu eb' leemama' leerixa'an, li ke'aatinaak xb'aaneb' li propeet li ke'wank junxil, re raj naq te'xkanab' xb'aanunkil li maa'usilal ut li yib' aj na'leb'; ab'an ink'a' ke'raj wab'inkil chi moko inpaab'ankil -chan li Nimajwal Yos-.

⁵ Ut anaqwan, b'ar wankeb' leemama' leerixa'an, b'ar wankeb' anaqwan? Ma yo'yooqeb' tab'i' chi junelik eb' li propeet?

⁶ Li waatin ut eb' linchaq'rab' li kinye chi xtz'uumal reheb' li propeet laj k'anjeleb' chiwu, ma ink'a' tab'i' ke'rab'i leemama' leerixa'an? Ut eb' a'an ke'xyot' xch'ool ut ke'xjal xk'a'uxl ut ke'xye: Li Nimajwal Yos xb'aanu qe jo' x'alaak sa' xch'ool, jo' chanru li qayehom ut qab'aanuhom»”.

Li xb'een moy u: eb' li wankeb' chirixeb' kawaay

⁷ Sa' li kaahib' xka'k'aal xb'e li junlaju po (Sebat xk'ab'a') re li xkab' chihab' chi awab'ejink laj Darío, li Qaawa' kiraatina wi' chik laj Sakarías, ralal laj Berekías, ri xmam laj Idó, ut a'in kixye chi jo'ka'in:

⁸ Kiwil sa' moy u chiru li q'oqyink a'in jun li winq k'ojk'o sa' xb'een jun kawaay kaq rix ut xaqxo sa' xyanqeb' li waa'uut sa' roq taq'a; ut wankeb' chik kawaay kaq rix, chaacha rixeb' ut saqikawaayeb'.

⁹ Toja' naq kinpatz' re: “Aniheb' a'an, at inqaawa'?”, chankin. Tikto li ánjel li yo chi aatinak wik'in, kixye we: “Laa'in tinye aawe aniheb' a'an”, chan.

¹⁰ Ut li winq li wank sa' xyanqeb' li waa'uut kichaq'ok ut kixye: “A'aneb' a'in li xe'taqlaak chaq xb'aan li Qaawa' re xb'eeninkil li ruuchich'och'”, chan.

¹¹ Toja' naq eb' li wankeb' chirixeb' li kawaay ke'xye re li x'ánjel li Qaawa' li wank sa' xyanqeb' li waa'uut: “Xqab'eeni chaq chixjunil li ruuchich'och' ut xqil naq chixjunil wank sa' tuqtuukilal ut sa' xyaalal”, chankeb'.

¹² Ut li x'ánjel li Qaawa' kixye: “At Nimajwal Yos, ak wank lajeeb' xkaak'aal chihab' yo laajosq'il sa' xb'een Jerusalén ut Judá. Toj jo'q'e taawuxtaana ruheb'?”.

¹³ Li Qaawa' kixsume sa' q'unil aatin li ánjel li wochb'een, re xk'ojob'ankil xch'ool.

¹⁴ Toja' naq li ánjel li yo chi aatinak wik'in kixye we: “Puktesi li esil a'in: Jo'ka'in naxye li Nimajwal Yos: «Q'axal naxamnak linch'ool chirix Jerusalén ut chirix Sión.

¹⁵ Jo'kan naq makach'in injosq'il sa' xb'eeneb' li tenamit a'an li maak'a' neke'xk'oxla, xb'aan naq k'ajo' chik li maa'usilal xe'xb'aanu re lintenamit naq yo b'a'b'ay injosq'il.

¹⁶ Jo'kan naq li Qaawa' xye chi jo'ka'in: Twuxtaana wi' chik ru Jerusalén. Tink'e wi' chik chi yiib'aak linloq'laj muheb'aal ut taawaklesiiq wi' chik chixjunil lintenamit, chan li Qaawa'»”.

¹⁷ Li ánjel kixye wi' chik we chi jo'ka'in: “Jap wi' chik aawe chi xyeeb'al: «Jo'ka'in naxye li Nimajwal Yos: Eb' lintenamit te'nujaq chi sahil eechej. Tink'ojob' wi' chik xch'ool Sión ut tinsik' wi' chik ru Jerusalén cho'q intenamit»”.

Li xkab' moy u: eb' li xukub' ut eb' laj tenol ch'iich'

¹⁸ Naq kintaqsi wi' chik li wilob'aal, kiwil sa' moy u kaahib' chi xukub'.

¹⁹ Ut kinpatz' re li ánjel li yo chi aatinak wik'in: “K'aru xyaalal li yookin chi rilb'al?”. Ut a'an kixye we: “A'an reetalileb' li tenamit ninqeb' xwankil li ke'cha'cha'ink reheb' laj Judá, eb' laj Israel ut eb' laj Jerusalén”.

²⁰ Chirix chik a'an li Qaawa' kixk'ut chiwu kaahib'eb' aj tenol ch'iich'.

²¹ Laa'in kinpatz' re: “K'aru okeb' re chi xb'aanunkil eb' a'an?”, chankin. Ut a'an kixye we: “Eb' li kaahib' chi xukub', a'an reetalileb' li kaahib' chi xninqal tenamit li ke'cha'cha'ink reheb' laj Judá toj reetal maajun chik kikuyuk sa' ruq'eb'. Ut eb' laj tenol ch'iich' a'in xe'chalk chi roksinkil xxiweb' li tenamit ut chi xjuk'b'al xwankilaleb' li jo'k'ihal ke'xcha'cha'i eb' laj Judá”.