Santiago 1 - Q'eqchi Bible

Xk'eeb'al sahil ch'oolej

¹ Laa'in laj Santiago, xmoos li Yos ut xmoos li Qaawa' Jesukriist, nintaqla xsahil xch'ooleb' li kab'laju teep chi tenamit xcha'cha'ihomeb' rib' yalaq b'ar.

Li xyalb'al rix li qapaab'aal

² Ex was wiitz'in, chek'ehaq cho'q xnimal xsahil eech'ool li k'iila paay chi yale'k sutsuuqex wi'.

³ Laa'ex nekenaw naq li xyalb'al rix leepaab'aal nak'amok chaq li kuyuk rahilal;

⁴ ab'anan chexkuyuq chi tz'aqal re ru, re naq tz'aqalaq eere eeru ut chaab'ilaqex, chi maak'a' majelaqex wi' sa' leepaab'aal.

⁵ Wi wank junaq eere yo chi majelo'k xna'leb', chixtz'aamaq re li Yos, ut taak'ehe'q re, xb'aan naq li Yos nak'ehok chi anchal xch'ool ut chi chaab'il reheb' chixjunileb'.

⁶ Ab'anan chixtz'aamaq rik'in xpaab'aal, chi ink'a' taach'inanq xch'ool, xb'aan naq li ani nawiib'ank xch'ool, a'an chanchan xkaw oq li palaw eek'asinb'il xb'aan li iq' ut nak'ame'k yalaq b'ar.

⁷ Junaq winq jo' a'an maak'a' truuq troyb'eni rik'in li Qaawa',

⁸ xb'aan naq nawiib'ank xch'ool ut moko ch'olch'o ta ru li xyu'am.

⁹ Ex was wiitz'in, wi wank junaq neb'a' sa' eeyanq, chisaho'q rik'in naq naterq'usiik xloq'al xb'aan li Yos;

¹⁰ ut wi wank junaq b'ihom, chisaho'q rik'in naq nakub'siik xloq'al, xb'aan naq li b'ihom, a'an chanchan li ratz'um li pim li ink'a' nawank chi junelik:

¹¹ naq na'elk chaq li saq'e chi k'ajo' xtiqwal, naxchaqihob'resi li pim, nat'ane'k li ratz'um ut na'oso'k li xch'ina'usal. Jo'kan ajwi' naq taa'oso'q li b'ihom sa'eb' li xb'aanuhom.

¹² Us xaq reheb' li neke'xkuy li yale'k! Xb'aan naq, chirix xq'axb'al ru a'an, te'xk'ul xq'ajkamunkileb', a' li yu'am yeechi'inb'il chaq xb'aan li Qaawa' reheb' li neke'rahok re.

¹³ Naq taayale'q rix junaq, mixye: “A' li Yos nayalok wix”, xb'aan naq li Yos ink'a' nayale'k rix xb'aan li ink'a' us chi moko naxyal rix anihaq.

¹⁴ Li aaleek nachalk sa' xb'een li junjunq naq naq'unb'esiik ut nak'ame'k xb'aan xrahinkil ru li maa'usilal.

¹⁵ Chirix chik a'an li xrahinkil ru li maa'usilal nasiyank ut narala li maak, ut li maak, naq ak xtz'aqlok ru, naxk'am chaq li kamk.

Chiqapaab' chi tz'aqal li Raatin li Yos

¹⁶ Ex was wiitz'in raarookex inb'aan, meeb'alaq'i eerib':

¹⁷ chixjunil li usilal k'eeb'il qe ut chixjunil li qamaatan li tz'aqal re ru, taqe'q nachalk chaq, ut nakub'e chaq rik'in li xYuwa'ileb' li chahim, li ink'a' najalaak chi moko naq'oqyino'k ru.

¹⁸ A'an sa' xch'ool x'alaak qayoob'tesinkil rik'in li Aatin re li yaal, re naq laa'ohaq jo' xb'een ru li awimq sa' li xyoob'tesihom.

¹⁹ Ex was wiitz'in raarookex inb'aan, chiwanq sa' eech'ool a'in: li junjunq seeb'aq xch'ool chi ab'ink, chixkuyaq rib' chi aatinak ut chixkuyaq rib' chi josq'o'k.

²⁰ Xb'aan naq li josq' aj winq ink'a' naxb'aanu li tiikilal li naraj li Yos.

²¹ Jo'kan utan, tz'eqtaanahomaq chixjunil li tz'ajb'eetal jo'wi' chixjunil li maa'usilal li yo chi numtaak, ut k'ulumaq sa' q'unil li Aatin awb'il eerik'in: a'an wank xwankil chekolb'al.

²² B'aanuhomaq li naxye li Aatin, ut ink'a' chik'ojlaaq eech'ool ka'ajwi' rik'in rab'inkil: yal xb'alaq'inkil eerib' nekeb'aanu chi jo'kan.

²³ Xb'aan naq li narab'i li Aatin ut ink'a' naxyu'ami, a'an chanchan jun li winq naril li ru sa' lem;

²⁴ ut naq naxik, nasachk sa' xch'ool chanru na'ilok.

²⁵ Ab'an li naxk'e xch'ool chi xk'oxlankil rix li Chaq'rab' tz'aqal re ru aj k'ehol chi wank chi ach'ab'anb'il, ut junelik kaw xch'ool chi xpaab'ankil moko jo' ta aj ab'inel li junpaat nasachk sa' xch'ool, jo' b'an tz'aqal aj b'aanuhom re li k'aru nataqlaak wi', li winq a'an osob'tesinb'ilaq rik'in xk'anjelankil.

²⁶ Wi ani naxk'oxla rib' naq tz'aqal aj paab'anel ut ink'a' naxq'us li ru'uj raq', a'an naxb'alaq'i rib' xjunes, ut li xpaab'aal maak'a' rajb'al.

²⁷ Li tz'aqal paab'ank li maak'a' reek' ut loq' chiru li Yos Yuwa'b'ej, a'an a'in: xtenq'ankileb' li maak'a'eb' chik xna' xyuwa' ut eb' li xmalka'an li wankeb' sa' rahilal, jo' ajwi' xkolb'al qib' chiru li xmaa'usilal li ruuchich'och' chi maak'a'aq qamuxul.