Salmos 9 - Q'eqchi Bible

SAALM 9 (9a) Xyoxinkil li Qaawa' tiik xch'ool

¹ Re li xjolomileb' laj b'ichanel. Rik'in xolb' ut aarp. Xsaalm laj David.

² At Qaawa', chi anchal linch'ool twaj xnimankil laak'ab'a', tinpuktesi resil eb' li xninqal ru aab'aanuhom.

³ At Nimajwal Yos, twaj xyeeb'al aawe li xsahil linch'ool, twaj xb'ichankil aawu re xnimankil aaloq'al.

⁴ Eb' li xik' neke'ilok we xe'q'ajk chirixeb', xe't'ane'k ut xlaje'oso'k chawu.

⁵ Xb'aan naq xinaakol sa' li raqb'a aatin, xachunub' aawib' sa' laak'ojarib'aal, laa'at li nakatraqok aatin sa' tiikilal.

⁶ Xaq'useb' li tenamit ut xasach ru li ink'a' useb' xch'ool; xasacheb' xk'ab'a' chi junajwa.

⁷ Eb' li xik' neke'ilok aawe xlaje'oso'k: maak'a' chik xpatz'b'aleb' anaqwan; xajuk' xwankileb' li xtenamit, ut xe'kanaak chi po'lemil chi junajwa.

⁸ Li Qaawa' na'awab'ejink chi junelik, naxk'uub' li xk'ojarib'aal re li raqb'a aatin.

⁹ Naraqok aatin sa' tiikilal sa' xb'een li ruuchich'och', sa' xyaalalil naxb'eresiheb' li tenamit.

¹⁰ Li Qaawa' naxk'aak'ale li rahob'tesinb'ileb', a'an li nak'aak'alenk reheb' sa' xq'ehil li rahilal.

¹¹ Aawik'in taxaq kawaqeb' xch'ool chixjunil li neke'nawok laak'ab'a', xb'aan naq ink'a' nakakanab'eb' xjunes li neke'sik'ok aawe, at Qaawa'.

¹² B'ichahomaq xloq'al li Qaawa' li nak'ojlaak aran Sión, puktesihomaq resil li xninqal ru xb'aanuhom sa'atqeb' li tenamit.

¹³ Xb'aan naq jultik re li neke'kamsink ras riitz'in, ut ink'a' nasachk sa' xch'ool li xyaab' xkuxeb' li toq'ob'eb' ru.

¹⁴ At Qaawa', chawuxtaana wu, chawil taxaq li rahilal wankin wi' xb'aaneb' li xik' neke'ilok we; chinaawisi taxaq rub'el xwankil li kamk,

¹⁵ re naq tinpuktesi resil laawusilal sa' rokeb'aal li tenamit Jerusalén, ut tinninq'ehi naq laa'at xinaakol.

¹⁶ Eb' li tenamit xe'sub'e'k sa' li jul ke'xyiib', ut eb' li roq xe't'il sa' li ra'al ke'xmuq.

¹⁷ Li Qaawa' xk'ut rib' ut xraqok aatin: xb'ach'le rib' laj maak sa' li xb'aanuhom li ruq'.

¹⁸ Xikaqeb' sa' xb'alb'a li ink'a' useb' xna'leb', chixjunileb' li tenamit li kisachk li Yos sa' xch'ooleb'!

¹⁹ Xb'aan naq A'an ink'a' nasachk li neb'a' sa' xch'ool chi junelik; maajoq'e taakanaaq chi maak'a' rajb'al li royb'enihomeb' li toq'ob'eb' ru.

²⁰ Waklin, at Qaawa', ut minumtaak li winq sa' aab'een, chiraqmanq aatin sa' xb'eeneb' li tenamit chawu laa'at.

²¹ Oksiheb' xxiw, at Qaawa'; che'xtawaq ru chixjunileb' li poyanam naq yal winqeb' ut maak'a'eb' xwankil.