Romanos 9 - Q'eqchi Bible

Li Yos ut eb' laj Israel

¹ Ninye li yaal sa' xk'ab'a' li Kriist, ink'a' nintik'ti'ik; naweek'a sa' linch'ool naq yaal li ninye ut li Santil Musiq'ej namusiq'ank we.

² K'ajo' xrahil linch'ool, junelik namayok li waanm.

³ Nawaj raj naq maa'usilanb'ilaqin ta ut jachjooqin raj rik'in li Kriist xb'aan xraab'aleb' li was wiitz'in, eb' li wech tenamitul li wech kik'elil.

⁴ A'aneb' laj Israel. Li Yos kixsik'eb' ru cho'q ralal xk'ajol ut kixk'ut li xnimal xloq'al, kixk'ojob' li Sumwank rik'ineb', kixk'e reheb' li Chaq'rab' jo'wi' li xloq'laj yeechi'om, ut kixtzoleb' chirix li loq'onink.

⁵ Eb' a'an ralal xk'ajoleb' li qaxe' qatoon; sa' xyanqeb' a'an kitz'ejwalo'k li Kriist li kiyo'laak chaq sa' riyajileb'. A'in wank xwankil sa' xb'een chixjunil, Yos usilaatinanb'il chi junelik q'e kutan. Jo'kan taxaq.

Li Yos naxsik'eb' ru li naraj xch'ool

⁶ Moko yookin ta chi xyeeb'al naq li xyeechi'om li Yos ink'a' kitz'aqlok ru. Moko chixjunileb' ta li ralal xk'ajol laj Isael a'aneb' li xtz'aqal tenamiteb' laj Israel,

⁷ chi moko chixjunileb' li yo'lajenaqeb' sa' riyajil laj Abrahán a'aneb' tz'aqal ralal xk'ajoleb'. Kixye li Yos re laj Abrahán: “Sa' xk'ab'a' laj Isahak te'wanq aawalal aak'ajol li te'k'amoq re laak'ab'a'”.

⁸ Naraj naxye: maawa'eb' ralal xk'ajol li Yos eb' li yal tz'ejwalej ke'yo'laak wi'; ka'ajwi' li yo'lajenaqeb' sa' xk'ab'a' li xyeechi'om li Yos, a'aneb' tz'aqal li k'eeb'ileb' sa' ajl cho'q ralal xk'ajol laj Abrahán.

⁹ A'an a'in li kixyeechi'i chaq li Yos: “Sa'eb' li kutan a'in tolin'elq wi' chik aawik'in, ut lix Sara taawanq jun xk'uula'al”, chan.

¹⁰ Jun chik: lix Rebeka kiwank ajwi' xk'uula'aleb' xb'aan jun chi winq, a' li qayuwa' laj Isahak.

¹¹ Us b'i', k'ehomaq reetal: re naq xaqxooq xwankil li xnimal xk'a'uxl li Yos li nasik'ok u moko sa' xk'ab'a' ta li xb'aanuhomeb' li winq, sa' xk'ab'a' b'an naq A'an nab'oqok, rub'elaj chaq li xyo'lajikeb' li wiib' chi k'uula'al naq toj maji' xb'aanuhomeb' junaq li us malaj junaq li ink'a' us,

¹² kiyehe'k re lix Rebeka: “Li asb'ej taak'anjelaq chiru li iitz'inb'ej”,

¹³ jo' tz'iib'anb'il sa' li Santil Hu: “Q'axal xinra laj Jakob, chiru laj Esaú”.

¹⁴ K'a' put ru tqaye? Ma tqaye naq li Yos ink'a' tiik xch'ool? Maajoq'e b'i'an!

¹⁵ Xb'aan naq li Yos kixye re laj Moisés: “Twuxtaana ru li ani twuxtaana ru; tintoq'ob'a ru li ani tintoq'ob'a ru”.

¹⁶ Chi jo'kan li xb'oqom li Yos moko nachalk ta sa' xk'ab'a' naq jun na'ajok re, chi moko xb'aan xyalb'al xq'e, sa' xk'ab'a' b'an xnimal ruxtaan li Yos.

¹⁷ Yeeb'il chaq re laj Parahón sa' li Santil Hu: “A'in tz'aqal xatinxaqab' wi' cho'q awab'ej, re xk'utb'al aawik'in linwankil jo'wi' re naq chisutunq li wesil yalaq b'ar sa' ruuchich'och'”.

¹⁸ Jo'kan utan, li Yos naruxtaana ru li ani naraj ruxtaanankil ru, ut naxjipob'resi xch'ool li ani naraj xjipob'resinkil.

Li Yos a'an aj uxtaan

¹⁹ “Ab'anan k'aru najosq'o'k wi'?”, cha'qat raj tana we. “Ani truuq taaramoq chiru li k'aru naraj?”.

²⁰ At winq, k'a' aawu laa'at re xwech'b'al rix li Yos? Ma tixye tab'i' li pak'b'il sek' re laj pak'ol re: “K'a' naq xinaapak' chi jo'ka'in?”.

²¹ Ma maak'a' tab'i' xwankil laj pak'onel re xpak'b'al rik'in li yoq'lenb'il seb' junaq sek' chaab'il xk'anjel ut junaq chik li ink'a' us xk'anjel?

²² Li Yos q'axal kixkuy eb' li xk'ulub'eb' raj li tojb'amaak ut li sachk. Rik'in a'an kiraj xk'utb'al li xtiikilal xch'ool ut li xwankil.

²³ Kixk'e ajwi' chi nawe'k li xchamal xsasal li xloq'al qik'in laa'o, xb'aan naq kiruxtaana qu ut kooxkawresi chi junxilaj re tz'aqonk sa' li xloq'al.

²⁴ Jo'ka'in naq kooxb'oq chaq li Yos: moko ka'aj ta wi' sa' xyanqeb' laj Judiiy, sa' xyanqeb' aj b'an wi' li junch'ol chik.

²⁵ Jo' naxye li Yos sa' xhu laj Oseas: “Li maawa' chaq intenamit, intenamit chik tinye re; ut li maawa' chaq inrahom, inrahom chik tinye re.

²⁶ Jo' naq kiyeemank reheb': «Maawa'ex intenamit», jo'kan ajwi' te'xk'ab'a'in: «Ralal xk'ajoleb' li yo'yookil Yos»”.

²⁷ Laj Isaías ajwi' kixjap re chi xyeeb'al chirixeb' laj Israel: “Us ta naab'aleb' li ralal xk'ajol laj Israel jo' ta xk'ihal li samahib' chire li palaw, ab'anan ka'ajwi' li rela'eb' taakole'q.

²⁸ Xb'aan naq relik chi yaal naq li Qaawa' tixb'aanu chi seeb' sa' chixjunil li ruuchich'och' li yeeb'il chaq xb'aan li raatin”.

²⁹ Jo' ajwi' yeeb'il chaq chi junxilaj xb'aan laj Isaías: “Wi li Qaawa' nim xwankil ink'a' ta kixkanab' junaq iyaj cho'q qe, kookanaak raj kama' Sodoom, chanchano raj Gomoor naq koo'oso'k”.

Eb' laj Israel ink'a' ke'xpaab' li Jesus

³⁰ K'aru tqaye chi jo'kanan? Tqaye naq eb' li maak'a'eb' xpaab'aal li ink'a' ke'xsik' li tiikilal, ke'xtaw xtiikilal xch'ooleb', a' li tiikil ch'oolej li wank sa' xk'ab'a' li paab'aal;

³¹ ut eb' laj Israel li ke'xsik' li tiikilal sa' xk'ab'a' li Chaq'rab', ink'a' ke'xtaw tz'aqal xpaab'ankil li Chaq'rab'.

³² K'a'ut? Xb'aan naq eb' laj Israel yookeb' chaq chi xsik'b'al li tiikilal rik'in li xb'aanuhomeb', ut ink'a' sa' xk'ab'a' li paab'aal. Ke'tichk'ok chiru li tichk'ob'aal pek,

³³ jo' naxye li Santil Hu: “K'ehomaq reetal, tink'e aran Sión jun li pek re tichk'ob'aal, taawanq aran jun li luktesib'aal ch'oolej. Li ani taapaab'anq re a'an, ink'a' taakaqo'q xb'aan xxutaan”.