Romanos 2 - Q'eqchi Bible

Eb' laj Judiiy ajwi' yo xjosq'il li Yos sa' xb'eeneb'

¹ Jo'kan utan, maak'a' k'aru taakol wi' aawib', at winq li nakatraqok aatin sa' xb'een laawas aawiitz'in, a' yaal anihat. Naq nakatraqok aatin chirix anihaq, rahilal nakab'oq chaq sa' aab'een, xb'aan naq nakatraqok aatin ut toj yookat ajwi' chi xb'aanunkil li maak a'an.

² Ch'olch'o chiqu naq li Yos taaraqoq aatin sa' tiikilal sa' xb'eeneb' li neke'b'aanunk re li k'a'aq re ru a'an.

³ K'aru nakak'oxla laa'at li nakatraqok aatin sa' xb'eeneb' li neke'b'aanunk re a'an ut yookat ajwi' chi xb'aanunkil aawe? Ma nakak'oxla naq tatkole'q chiru li xraqb'a aatin li Yos?

⁴ Malaj ut nakatz'eqtaana li xchamal xsasal li rusilal li Yos, li xnimal xkuyum ut li xq'unal xch'ool? Ma ink'a' nakanaw naq li rusilal li Yos a'in natoch'ok aawe chi xyot'b'al laach'ool ut chi xjalb'al laak'a'uxl?

⁵ Laa'at kaw laajolom ut ink'a' nakawaj xjalb'al laak'a'uxl; jo'kan naq yookat chi xtamresinkil xjosq'il li Yos sa' aab'een cho'q re xkutankil li Josq'il naq taak'utb'esiiq li raqb'a aatin tixb'aanu li Yos sa' tiikilal.

⁶ Aran taak'eemanq xq'ajkamunkil li junjunq jo' chanru li xyehom xb'aanuhom:

⁷ li Yos tixk'e junelik yu'am reheb' li ninqeb' xkuyum chi xb'aanunkil li us, jo'k'ihaleb' li neke'xsik' li loq'al, li chaab'ilal ut li yu'am ink'a' nalajk na'oso'k.

⁸ Ab'anan eb' laj q'etol aatin, eb' li ink'a' neke'xk'anjela li yaal ut a' chik li ink'a' us neke'xk'anjela, li Yos tixtaqla xjosq'il ut raaxiik' sa' xb'eeneb'.

⁹ Nimla rahilal ut yot'ik ch'oolej taachalq sa' xb'eeneb' chixjunil li neke'b'aanunk re li ink'a' us: xb'enwa sa' xb'eeneb' laj Judiiy, ab'an sa' xb'eeneb' ajwi' laj Griego.

¹⁰ A'ut chixjunileb' li neke'b'aanunk re li us: loq'al, nimaak u ut tuqtuukilal li taak'eemanq reheb'; xb'enwa eb' laj Judiiy, ut eb' ajwi' laj Griego.

¹¹ Xb'aan naq li Yos juntaq'eet narileb' chixjunil.

¹² Chixjunileb' li ke'maakob'k chi ink'a' ke'xnaw li xChaq'rab' laj Moisés, maak'a' Chaq'rab' sa' xb'eeneb' naq te'oso'q; ut chixjunileb' li ke'maakob'k rub'el xwankil li Chaq'rab', a' li Chaq'rab' taaraqmanq wi' aatin sa' xb'eeneb'.

¹³ Chiru li Yos moko tiikeb' ta xch'ool li neke'ab'ink re li Chaq'rab', a'aneb' b'an li neke'k'anjelank re: a'aneb' a'in li te'tiikob'resiiq xch'ool.

¹⁴ Naraj naxye: naq eb' li maawa'eb' aj Judiiy li maak'a'eb' xChaq'rab' neke'xb'aanu li naxye li Chaq'rab' xb'aan naq neke'reek'a sa' xch'ooleb', eb' a'an, us ta maak'a'eb' xChaq'rab', xchaq'rab'eb' rib' xjuneseb'.

¹⁵ Neke'xk'ut naq li k'aru yeeb'il xb'aan li Chaq'rab', a'an tz'iib'anb'il sa' xch'ooleb'. A' ajwi' li reek'ob'aal xch'ooleb' jo'wi' li xk'a'uxeb' nach'olob'ank re: wan naq a'an najitok reheb', wan naq a'an nakolok reheb'.

¹⁶ Chixjunil a'in taak'utunq chi us sa' li kutan taaraqoq wi' aatin li Yos sa' xk'ab'a' li Jesukriist chirix li k'aru muqmu sa' xch'ooleb' chixjunileb'. A'an a'in li Chaab'il Esilal ink'ulum laa'in.

Eb' laj Judiiy ut li Chaq'rab'

¹⁷ Ab'anan k'aru tqaye chawix laa'at li nakak'ab'a'in aj judiiy? Nakakuutu aawib' rik'in li xChaq'rab' laj Moisés ut nakanima aawib' sa' xk'ab'a' laaYos.

¹⁸ Nakanaw li rajom li Yos ut naxk'ul aawu li k'aru q'axal chaab'il xb'aan naq tzolb'ilat rik'in li Chaq'rab'.

¹⁹ Kaw aach'ool chi xk'oxlankil naq laa'at aj k'utul xb'eheb' li mutz', xkutaneb' li wankeb' sa' aak'ab',

²⁰ aj tijol reheb' li maak'a'eb' xna'leb' ut aj tzolol reheb' li q'uneb' xch'ool, xb'aan naq sa' li Chaq'rab' nakataw laana'leb' ut li yaal chi tz'aqal re ru.

²¹ Chakuy inmaak, k'a'ut naq nakatzoleb' li jalan chik ut ink'a' nakatzol aawib' laa'at? Nakach'olob' xyaalal naq ink'a' us li elq'ak, ab'anan nakat-elq'ak ajwi' laa'at.

²² Nakaye naq ink'a' us li muxuk sumlaak, ut laa'at nakatmuxuk sumlaak. Xik' nakawileb' li yal k'oxlanb'il yos, ut nakat-elq'ak sa' rochocheb'.

²³ Nakanima aawib' sa' xk'ab'a' li Chaq'rab', ab'anan nakaq'et li Chaq'rab'; ut chi jo'kan ink'a' nakawoxloq'i li Yos.

²⁴ Relik chi yaal, jo' naxye li Santil Hu, “eemaak laa'ex majewanb'il xk'ab'a' li Yos sa' xyanqeb' li junch'ol chik”.

²⁵ Relik chi yaal naq li sirkunsisyon wank xyaalal wi nakapaab' li xChaq'rab' laj Moisés; ab'anan wi nakaq'et li Chaq'rab', laa'at nakatkanaak jo' ink'a' aak'ulum li sirkunsisyon.

²⁶ Wi li ink'a' xk'ulum li sirkunsisyon naxpaab' li naxye li Chaq'rab', ma ink'a' tab'i' taak'ehe'q sa' ajl sa' xyanqeb' li xk'ulumeb' li sirkunsisyon, us ta li jun ink'a' xk'ulum?

²⁷ Ut li ink'a' uxb'il li sirkunsisyon sa' li xtz'ejwal, wi naxpaab' li Chaq'rab', taaraqoq aatin sa' aab'een, xb'aan naq wank aawik'in li Chaq'rab' chi tz'iib'anb'il ut aak'ulum li sirkunsisyon, ab'anan aj q'etolat Chaq'rab'.

²⁸ Li wank cho'q aj judiiy maawa' ka'ajwi' re xk'utb'al rib'; jo'kan ajwi' li tz'aqal sirkunsisyon maawa' li nak'utunk sa' li tz'ejwalej.

²⁹ Li tz'aqal aj judiiy ak a'an ajwi' chaq sa' li xch'ool, ut li tz'aqal sirkunsisyon a'an li na'uxk sa' li ch'oolej, a' li uxb'il xb'aan li Musiq'ej ut ink'a' yal xb'aan xpaab'ankil junaq chaq'rab'. Li tz'aqal aj judiiy a'an li nanimaak ru xb'aan li Yos ut ink'a' xb'aaneb' li tenamit.