Proverbios 8 - Q'eqchi Bible

Li xb'oqom li choxahil na'leb'

¹ Li chaab'il na'leb' yo chi b'oqok, kaw xyaab' xkux li seeb'al k'a'uxl.

² Sa' xb'eeneb' li b'ool naxik chi b'oqok, ut naxaqlije'k sa'atqeb' li xaalib'e;

³ na'ab'imanje'k sa' rokeb'aaleb' li tenamit, ut sa'atqeb' li jalb'e japjo re chi xyeeb'al:

⁴ “Eerik'in laa'ex ok we chi aatinak, li xyaab' linkux cho'q reheb' chixjunil li poyanam.

⁵ Ex saaj al li maak'a' eena'leb' ut jipex, tzolomaq li chaab'il na'leb' ut li seeb'al k'a'uxl.

⁶ Ab'ihomaqin, xb'aan naq tin'aatinaq chi tz'aqal re ru; ok we xyeeb'al xninqaleb' ru aatin.

⁷ Li ok we xyeeb'al, a'an tz'aqal yaal; ut maajun junaq tik'ti' wank chisa'.

⁸ Tz'aqal re ru li aatin ok we xyeeb'al, ut maajun junaq b'alaq'il aatin tinye.

⁹ Ch'olch'o ru chixjunil cho'q re li seeb' xch'ool, ut tz'aqal yaal li waatin cho'q re li wank xk'a'uxl.

¹⁰ Meesik' li plaat ut li oor, sik'omaq b'an eena'leb' ut leetijb'al.

¹¹ Xb'aan naq q'axal loq' li chaab'il na'leb' chiru li ch'ina'usil pek, ut ink'a' naru xjuntaq'eetankil rik'in li b'ihomal.

¹² “Laa'in li chaab'il na'leb', ut li wochb'een a'an li seeb'al k'a'uxl. Ninnaw na'leb'ak chi chaab'il.

¹³ Roxloq'inkil ru li Yos a'an xtz'eqtaanankil li maa'usilal; laa'in xik' nawil li q'etq'etil, li nimob'resink ib', li yib'ru yu'amej ut li tik'ti'.

¹⁴ We li k'uub'ank ut li xb'aanunkil; laa'in laj k'ehol na'leb' ut li xyo'leb'aal li kawil ch'oolej.

¹⁵ Sa' ink'ab'a' neke'awab'ejink eb' li awab'ej, ut eb' laj nahonel chaq'rab' neke'raqok aatin sa' tiikilal.

¹⁶ Sa' ink'ab'a' wankeb' xwankil li xjolomileb' li tenamit, ut tiik xch'ooleb' chixjunileb' laj raqol aatin.

¹⁷ Laa'in ninraheb' li nake'rahok we; ut eb' li nikine'xsik' chi anchaleb' xch'ool, nikine'xtaw.

¹⁸ Wik'in wankeb' li b'ihomal ut li loq'al, li sahilal ut li tiikil ch'oolej.

¹⁹ Jwal chaab'il li ninyeechi'i chiru li chaab'il oor; ut li ninsi laa'in, a'an q'axal loq' wi' chik chiru li plaat.

²⁰ Laa'in ninb'eek sa' li tiikilal, ut sa' xb'ehil li tz'aqal yaal,

²¹ re xb'ihomob'resinkil eb' li neke'rahok we ut xnujob'resinkil li rochocheb' chi sahil eechej.

²² “Li Qaawa' Yos kiyoob'tesink we xb'enwa, junxilaj chiru chixjunil li xb'aanuhom.

²³ Kinxsiya chaq sa' xtiklajik, rub'elaj xyoob'tesinkil li ruuchich'och'.

²⁴ Kinxyoob'tesi chaq naq toj maak'a' chaq li palaw, junxilaj chiruheb' li yu'amha' ut eb' li nima'.

²⁵ Naq toj maji' neke'k'ojlaak sa' xna'ajeb' li tzuultaq'a, ak xyoob'tesihomin chaq li Qaawa',

²⁶ naq toj maak'a' chaq li ch'och' ut li che'k'aam, chi moko li pojtz' k'uub'k'u wi' li ruuchich'och'.

²⁷ Naq li Yos kixhel li choxa sa' xb'eeneb' li palaw, aran wankin laa'in.

²⁸ Naq kixkanab'eb' li choql chiru li choxa ut kixk'ojob' li palaw sa' xna'aj;

²⁹ naq kixraq li xna'aj li palaw re naq ink'a' taa'elq li ha'; naq kixk'e li rub'elankil li ruuchich'och',

³⁰ ak wankin chaq aran chi xk'atq li Qaawa' cho'q aj k'ehol xna'leb'. Laa'in nink'ehok chaq xsahil xch'ool rajlal kutan, junelik ninb'atz'unk chiru

³¹ sa' li ruuchich'och' yoob'tesinb'il xb'aan; ut nintaw xsahil linch'ool rik'ineb' li ralal xk'ajoleb' li poyanam.

³² “Ut anaqwan, ex walal ink'ajol, ab'ihomaq li waatin. Us xaq eere wi teetzol eerib' wik'in.

³³ Paab'omaq li waatin ut chiwanq eechaab'il na'leb'; meetz'eqtaana leetijb'al inb'aan.

³⁴ Us xaq re li na'ab'ink we, wulaj wulaj naraj wab'inkil ut ninxsik' toj sa' li wochoch.

³⁵ Xb'aan naq ani natawok we, naxtaw li yu'am, ut li Qaawa' naxk'ut li rusilal.

³⁶ Ab'an li natz'eqtaanank we, naxsach rib' xjunes; li xik' na'ilok we, naxsik' li xkamik”.