Proverbios 7 - Q'eqchi Bible

Li xna'leb' li ixq aj yumb'eet

¹ At walal ink'ajol, paab' li waatin ut tz'iib'a sa' laawaanm laachaq'rab'inkil inb'aan.

² K'anjela ru linchaq'rab', ut taawanq aayu'am; k'uula sa' laach'ool jo' li sahil eechej.

³ Chatz'ejwali aawib' rik'in, ut maatz'eq chirix laawaanm.

⁴ K'ul li chaab'il na'leb' jo' tawi' aawanab', ut li seeb'al k'a'uxl jo' aawech'alal.

⁵ A'an taakoloq aawe chiru li ixq ink'a' us xna'leb', chiru li ixq aj b'alaq' li naraj aaluktesinkil rik'in q'unil aatin.

⁶ Sa' jun kutan yookin chi ilok sa' xb'entaanil li wochoch,

⁷ ut ke'wil jun ch'uuteb' li saaj al li maak'a'eb' xna'leb'; ut sa' xyanqeb' a'an wank jun li maak'a' xk'a'uxl.

⁸ Naq kiwulak sa' xaalib'e, kiq'axonk junpak'al ut tiik koho sa' rochoch jun li ixq ink'a' us xch'ool.

⁹ Ak yo chi ewuuk, ak ok re li q'oqyink.

¹⁰ Toja' naq li ixq ki'elk chaq chi xk'ulb'al, tiqto chaq chi chaab'il; ut na'ilok jo' junaq aj yumb'eet.

¹¹ A'an jun li ixq seeb' xch'ool chi b'alaq'ik, ut ink'a' jwal nawank sa' li rochoch;

¹² junes sa' b'e nawank, sa' li k'ayiil ut sa' xxaalatq li b'e, re royb'eninkil li taanume'q xb'enwa.

¹³ Naq li ixq kiril ru li al, kixq'alu ut kixtz'ub' ru, ut chi maak'a' xxutaan kixye re:

¹⁴ “Laa'in kinyeechi'i inmayej re wank sa' usilal rik'in li Yos, ut anaqwan ak xinmajeya li kinyeechi'i.

¹⁵ Jo'kan naq xin'elk chaq chak'ulb'al. K'ajo' naq xatinsik', ut anaqwan xatintaw!

¹⁶ Xinyiib' ru linch'aat chi chaab'il xink'e jun ch'ina'usil t'ikr li chalenaq Ejiipt;

¹⁷ xink'e ajwi' sununkil b'an chiru, yiib'anb'il rik'in miir ut kaneel.

¹⁸ Kim b'i', ut uk'aqo b'iin toj reetal taasaqewq; ut qayalaq xsahil li rahok ib'.

¹⁹ Xb'aan naq linb'eelom maa'ani sa' kab'l: xkoho chi najt ut toj taab'ayq chaq.

²⁰ Naab'al li tumin xk'am chirix, ut toj sa' xxoronik li po tol'elq sa' kab'l”.

²¹ Rik'in b'alaq'il aatin kirelaji ru li al, kixq'unb'esi ut kireechani chi junwaakaj.

²² Ut li mem aj al koho chirix li ixq: kama' junaq b'ooyx naxik chi kamsiik; jo' junaq kej xt'ane'k sa' li ch'imb'

²³ ut chi junpaat xpaynumiik li xch'ool chi simaj; jo' junaq xik'anel xul noxnaq sa' li ra'al, chi ink'a' naxnaw naq aran taasachq li xyu'am.

²⁴ Jo'kan utan, at walal ink'ajol, chinaawab'i; k'e sa' laach'ool li aatin ninye aawe.

²⁵ Maapo' laak'a'uxl xmaak li ixq a'an, ut maataaqe sa' li xmaa'usilal.

²⁶ Xb'aan naq naab'aleb' li ak xe'sachk xb'aan, ut k'ajo'eb' li xe'oso'k chi junwaakaj.

²⁷ Li xik sa' rochoch li ixq a'an, a'an li xik sa' xb'alb'a: a'an li xik sa' xna'ajeb' li kamenaq.