Proverbios 5 - Q'eqchi Bible

Li ixq ink'a' us xna'leb' naxsachb'esi li winq

¹ At walal ink'ajol, paab' linchaab'il na'leb'; k'uula sa' laach'ool li xseeb'al ink'a'uxl.

² Chi jo'kan taak'oxla rix li taaye, ut tat-aatinaq chi wank aana'leb'.

³ Xb'aan naq li ixq li ink'a' us xch'ool na'aatinak rik'in q'unil aatin, chanchan xki'al li xya'al kab'; a'an naxnaw q'unb'esink kama' wi' xsahil li aseeyt.

⁴ Ab'an q'axal ra noxraqe'q wi', jo' li b'aqche' malaj li xyok'om junaq ch'iich' ka'pak'al xq'esnal.

⁵ Xtaaqenkil li ixq a'an, a'an re kamk; ut li xb'e tiik naxik sa' li xb'alb'a.

⁶ Li ixq a'an maak'a' naraj wi' li xb'ehil li yu'am, chi moko naxk'e reetal naq yo chi sachk.

⁷ Jo'kan b'i', at walal, paab' li waatin ut misachk sa' laach'ool li ninye aawe.

⁸ Matxik chirix li ixq ink'a' us xna'leb', chi moko chatjiloq chire li rochoch.

⁹ Maaq'axtesi laayu'am chi moko laakawilal sa' ruq'eb' li josq' aj winq, k'ajo' naq tate'xrahob'tesi;

¹⁰ re naq maajun aj ab'l poyanam tixyal xsahil laajunkab'lal chi moko sa' ruq' jalan chik tox'oso'q li xakamsi wi' aawib' chi k'anjelak.

¹¹ Mare anchal ra taaweek'a moqon naq yooqat chi oso'k ut maak'a'aq chik xkawilal laawoq laawuq'.

¹² Ut taaye: “K'a'ut naq ink'a' xinpaab' linq'usb'al? K'a'ut naq xintz'eqtaana lintzolb'al?

¹³ Ink'a' xwaj xpaab'ankil laj tzolonel we, chi moko xink'ulub'a xna'leb'eb' li xe'q'usuk we.

¹⁴ Ut anaqwan ka'aj chik maa xin'oso'k xb'aan li rahilal chiru chixjunileb' linkomonil”.

Chara laawixaqil

¹⁵ K'ojob' aach'ool rik'in laawixaqil, ut yal xsahil li rahok ka'ajwi' sa' laawochoch.

¹⁶ Maab'atz'unle laayu'am sa' b'e, chi moko chara jalan chik li ixq.

¹⁷ Aawehaq aajunes laawixaqil, ut maawotz xsahil li sumlaak rik'in jalan chik.

¹⁸ Osob'tesinb'ilaq taxaq laasum'aatin, ut sahaq aach'ool rik'in laawixaqil li xatsumlaak wi' sa' laasaajilal!

¹⁹ A'an q'un ut chaab'il xch'ool kama' jun li ch'ina'usil kej. Chik'ojlaaq taxaq aach'ool chi wank rik'in, ut a'anaq xnimal xsahil laawaanm chi junelik.

²⁰ At walal ink'ajol, k'a'ut naq taak'e aach'ool chirix li ab'li ixq? K'a'ut naq taaq'axtesi aawib' re li maawa' aawixaqil?

²¹ Li Qaawa' naril li xna'leb' li junjunq ut naxk'e reetal li xb'aanuhom.

²² Li ink'a' us xch'ool nat'ane'k sa' li xmaa'usilal; a' ajwi' li xmaak nasachok re.

²³ Li xmaak'a'il xna'leb' taakamsinq re, ut li xmemil ut li xjipil taasachoq re.