Proverbios 4 - Q'eqchi Bible

Xsik'b'al ru ut xk'uulankil li chaab'il na'leb' k'a'uxl

¹ Ex walal ink'ajol, ab'ihomaq leetijb'al xb'aan leeyuwa'; k'ehomaq eech'ool chi xtawb'al eena'leb'.

² Jwal chaab'il li na'leb' nekexintzol wi'; jo'kan naq meetz'eqtaana li nink'ut cheru.

³ Laa'in ajwi' xink'uula'alo': k'ajo' naq xinxra linna'.

⁴ Ut linyuwa' xk'e chaq inna'leb', xye we chi jo'ka'in: “K'uula sa' laach'ool eb' li waatin; paab' linchaq'rab', ut tatyo'yooq.

⁵ Sik' li chaab'il na'leb', ut chiwanq xseeb'al laach'ool; maatz'eqtaanaheb', chi moko chisachq sa' laach'ool li k'aru ninye.

⁶ Wi nakara li chaab'il na'leb' ut maajun sut nakatz'eqtaana, a'an tatxtenq'a ut tatxkol.

⁷ Chayal aaq'e chi xtawb'al aana'leb'; chaweechani li seeb'al k'a'uxl, us ta tento xk'ayinkil laajunkab'lal.

⁸ Chara li chaab'il na'leb', ut a'an tixterq'usi laaloq'al; chajunaji aawib' rik'in, ut a'an tixxaqab' laawankil.

⁹ Sa' laajolom tixk'e jun lemtz'il q'ol ut tixsi aawe jun xchaq'alil ru koroon”.

¹⁰ Ab'i, at walal; k'ulub'a li waatin, re naq najtaq roq laayu'am sa' ruuchich'och'.

¹¹ Yookin chi xk'utb'al chawu li chaab'il b'e, ut nakatintzol rik'in li chaab'il na'leb'.

¹² Chi jo'kan sa' laab'eenik maak'a' taach'i'ch'i'inq aawe, ut wi tat-aanilaq, ink'a' tattichk'oq.

¹³ Chap aawib' chi kaw rik'in li nink'ut chawu, ut maawach'ab' chik; k'uula sa' laach'ool xb'aan naq a'an laayu'am.

¹⁴ Matxik chirixeb' li ink'a' useb' xna'leb', chi moko chataaqe xb'eheb' li ink'a' chaab'ileb' xch'ool.

¹⁵ Chakol aawib' chiruheb' ut maataaqe li xb'eheb'; isi aawib' chiruheb' ut ayu chi uub'ej.

¹⁶ Xb'aan naq eb' a'an ink'a' neke'ruuk chi wark, wi ink'a' xe'b'aanunk maa'usilal; ut ink'a' nakub'eek xwaraheb', wi ink'a' xe'xrahob'tesi junaq xb'enwa.

¹⁷ Li xwaheb', a'an li maa'usilal; ut li ruk'a'eb', a'an li raaxiik'.

¹⁸ Li xyu'ameb' li tiikeb' xch'ool a'an chanchan xsaqenkil li hik'e'k: na'ok chi lemtz'unk toj reetal nakutano'k ru sa' wa'leb'.

¹⁹ A'ut li xyu'ameb' li ink'a' useb' xch'ool a'an chanchan li aak'ab': chi moko neke'xnaw b'ar xe'tichk'ok.

²⁰ At walal ink'ajol, ab'i li waatin; chak'e reetal li ninye aawe.

²¹ Misachk chawu, k'uula b'an sa' xchamal laawaanm.

²² Xb'aan naq a'an li yu'am cho'q re li ani nak'ulub'ank re; a'an chanchan jun li b'an nak'ehok kawilal.

²³ Xb'een xb'een chab'eresi laak'a'uxl, xb'aan naq rik'in a'an natiklaak li yu'am.

²⁴ Isi sa' xtz'uumal aawe chixjunil li tik'ti' jo' ajwi' li b'alaq'il aatin.

²⁵ Tiik tat-iloq chawu ut k'e reetal li k'aru us.

²⁶ Chatiikob'resi ru laab'e, re naq maak'a' taak'ul sa' laab'eenik.

²⁷ Maajal laab'e, chi moko sa' laanim uq' chi moko sa' laatz'e uq' tatxik; ut junelik wanqat sa' tiikilal.