Proverbios 3 - Q'eqchi Bible

Chanru xtawb'al li chaab'il na'leb'

¹ At walal ink'ajol, misachk sa' laach'ool link'utum ut k'uula sa' laawaanm linchaq'rab';

² chi jo'kan taanajto'q roq laayu'am ut us tat-elq sa' chixjunil, chiru k'iila chihab'.

³ B'aanu li yaal ut li rahok chi junelik; chak'uulaheb' jo' junaq chaab'il q'ol chakux, ut chatz'iib'aheb' sa' laach'ool.

⁴ Chi jo'kan osob'tesinb'ilaqat xb'aan li Yos ut taak'ehe'q aaloq'al xb'aaneb' li tenamit.

⁵ K'ojk'ooq aach'ool rik'in li Yos chi junelik, ut maawa' rik'in laak'a'uxl laana'leb'.

⁶ Sa' chixjunil li k'aru taab'aanu wanq sa' aach'ool li Qaawa' Yos, ut A'an tixtiikob'resi laab'e.

⁷ Maaye aawib' naq k'ajo' aana'leb'; chawoxloq'i li Qaawa' ut chatz'eqtaana li ink'a' us.

⁸ Chi jo'kan maak'a'aq aayajel ut q'axal kawaq aawib'.

⁹ Chak'e xloq'al li Qaawa' rik'ineb' laasahil eechej ut rik'inatq li xb'een ru laawawimq.

¹⁰ Chi jo'kan eb' laak'uuleb'aal te'nujaq chi ixim, ut jwal naab'alaq laa'ak' b'iin.

¹¹ At walal ink'ajol, maatz'eqtaana laatijb'al xb'aan li Qaawa', chi moko tatch'i'taaq naq tatxq'us,

¹² xb'aan naq li Qaawa' naxq'us li naxra, jo' jun li yuwa'b'ej naxq'us li ralal raaro xb'aan.

¹³ Us xaq reheb' li xe'xtaw li chaab'il na'leb', us xaq reheb' li wankeb' xseeb'al xk'a'uxeb'.

¹⁴ A'an jwal us wi' chik chiru xk'eeb'al li tumin sa' yakleb'aal tumin; jwal terto xtz'aq chiru li oor.

¹⁵ Li chaab'il k'a'uxl q'axal xchaq'alil ru chiru li lemtz'il q'ol; maak'a' naru xjuntaq'eetankil wi'.

¹⁶ Rik'in li xnim uq' naxyeechi'i aayu'am najt roq, ut rik'in li junchik naxyeechi'i aab'ihomal ut aaloq'al.

¹⁷ Xtaaqenkil li xnums, a'an q'axal sahilal; wi tatb'eeq jo' naxye a'an, tatwanq sa' tuqtuukilal.

¹⁸ A'an li che' nak'ehok yu'am reheb' li neke'tawok re: us xaq reheb' li neke'eechanink re.

¹⁹ Li Qaawa' kixk'ojob' li ruuchich'och' rik'in xnimal k'a'uxl; kixkupub' li choxa rik'in li xseeb'al xch'ool.

²⁰ Sa' xk'ab'a' li xnawom jachjookeb' li ha', ut eb' li choql neke'xk'e li xchu'ke.

²¹ At walal ink'ajol, k'uula sa' laach'ool li chaab'il na'leb' ut k'a'uxl, ut misachk chawu li wank sa' xyaalal:

²² a'anaq yu'am cho'q aawe ut xsahob' aawu jo' jun lemtz'il q'ol.

²³ Chi jo'kan tatb'eeq sa' xyaalal ut ink'a' taatichk'oq laawoq.

²⁴ Maak'a' taaxiwa naq tatyoklaaq; ut naq akaq xatsotlaak, sa tatwarq.

²⁵ Ink'a' taaxiwa li rahilal taachalq chi junpaat, chi moko li xsachikeb' li ink'a' useb' xch'ool,

²⁶ xb'aan naq li Qaawa' wanq aawik'in ut ink'a' tatxk'e chi t'ane'k sa'eb' li ra'al.

²⁷ Maaram junaq usilal reheb' li neke'raj tenq'aak, wi wank chawu xb'aanunkil.

²⁸ Maaye re laawas aawiitz'in: “Toj wulaj tatintenq'a”, naq wan chawu xtenq'ankil anaqwan.

²⁹ Matyoob'ank rahilal chirix laawas aawiitz'in li k'ojk'o xch'ool chawix.

³⁰ Matpleetik rik'in anihaq, wi maajun xb'aanunk rahilal aawe.

³¹ Maakaqaliheb' li neke'yoob'ank raaxiik', chi moko chatzol aawe li k'aru neke'xb'aanu,

³² xb'aan naq li Qaawa' xik' narileb' li ink'a' useb' xna'leb', ab'an naxraheb' li tiikeb' xch'ool.

³³ Li xmajewahom li Qaawa' wank sa' rochoch li naxb'aanu li maa'usilal; ab'an osob'tesinb'il li xjunkab'al li tiik xch'ool.

³⁴ Li Qaawa' naxse'eb' li neke'xnimob'resi rib', ab'an narusilaheb' li kub'enaqeb' xwankil.

³⁵ Eb' li wankeb' xna'leb' te'reechani li loq'al; ab'an tz'eqtaananb'ilaqeb' li maak'a'eb' xna'leb'.