Proverbios 27 - Q'eqchi Bible

¹ Maaxuli aawib' chirix li taab'aanu wulaj, xb'aan naq ink'a' nakanaw li taak'ulmanq wulaj.

² Maak'e aaloq'al aajunes aawib', kanab' b'an naq jalaneb' te'k'ehoq aaloq'al.

³ Jwal aaleb' li pek ut li samahib'; jo'kan ajwi' li raalal li xjosq'il li maak'a' xna'leb'.

⁴ Li josq'il nayoob'ank ch'a'ajkilal ut nasachok; ab'an li sowenak maajun nakuyuk re.

⁵ Jwal us li q'usuk chi yaal chiru li rahok sa' b'alaq'il.

⁶ Q'axal wi' chik nakatxra laawamiiw naq nakatxq'us sa' yaal, chiru naq nakatxq'alu li xik' na'ilok aawe.

⁷ Li ak xtzekank, naxtz'eqtaana li saa'us; ab'an li yo xtz'okajik, us ta ch'am li tzekemq, ab'an sa cho'q re.

⁸ Jo' li xik'anel xul li naxik chi najt rik'in li xsuk, jo'kan ajwi' li winq li xkanab' li rochoch.

⁹ Li aseeyt ut li sununkil b'an nak'ehok sahil ch'oolej; li chaab'il na'leb' naxk'e junaq amiiw, naxsahob'resi li aanmej.

¹⁰ Maatz'eqtaana laawamiiw chi moko li ramiiw laayuwa'. Moxaaseeraq'i laach'a'ajkilal rik'ineb' laawas aawiitz'in. Jwal us tatxtenq'a laawechkab'al chiru laakomon li wan chaq chi najt.

¹¹ Chaab'ilaq laana'leb', at walal, ut taasaho'q linch'ool; chi jo'kan tinruuq xsumenkil eb' li xik' neke'ilok we.

¹² Li wank xna'leb' naril li raaxiik' ut naxkol rib' chiru; a'ut li maak'a' xna'leb' tiik nanume'k ut naxk'ul li rahilal.

¹³ Li xk'asok chirix li ink'a' naxnaw ru, maq'omaq li raq' chiru, ut kanaaq cho'q ruuchil li xk'asok.

¹⁴ Li naxjap re chi xk'eeb'al xsahil xch'ool li ramiiw toj eq'la, a'an chanchan xmajewankil.

¹⁵ Jun li ixq aj raaxiik', a'an kama' li okes ink'a' natz'aponk sa' hab'alq'e.

¹⁶ Xramb'al chiru, a'an jo' xchapb'al li iq' malaj jo' xchapb'al li aseeyt sa' laawuq'.

¹⁷ Li ch'iich' naq'esnaak rik'in ch'iich'; ut li winq, winq ajwi' taatuqub'anq xna'leb'.

¹⁸ Li naxch'oolani li rawimq, toxyal xsahil; ut li naxkol rix li xjunkab'lal laj eechal re, taak'ehe'q xloq'al.

¹⁹ Li xnaq' uhej nak'utunk sa' li ha'; jo'kan ajwi' li winq nak'utunk sa' li ch'oolej.

²⁰ Li kamk ut li muqleb'aal ink'a' neke'nujak; jo'kan ajwi' li winq ink'a' nak'ojlaak xch'ool rik'in li k'aru wank re: toj naxrahi ru xtz'aqob'.

²¹ Li oor ut li plaat neke'ch'ajob'resiik sa' li xam; ut li winq nak'utunk rik'in li xloq'al nak'eemank.

²² Li maak'a' xna'leb' moko tixkanab' ta li xmemil, us ta taaputz'iiq chiru li ke'leb'.

²³ Wanq aach'ool chirixeb' laakarneer ut k'e aach'ool chi xch'oolaninkileb' laaketomq,

²⁴ xb'aan naq li b'ihomal ut li sahil eechej moko neke'wank ta junelik.

²⁵ Naq neke'tuxmek li che'k'aam ut nasetmank li raxpim, chach'utub' li pim sa'eb' li loq'laj tzuultaq'a.

²⁶ Chi jo'kan rik'in li rixeb' laakarneer taayiib' laab'aatal, ut rik'in xtz'aq laakok' chib'aat taaloq' aach'och';

²⁷ ut taawanq naab'al xya'al xtu' eb' laachib'aat re naq taach'oolani aawib' laa'at jo' ajwi' laajunkab'lal ut chixjunileb' laj k'anjel chawu.