Proverbios 26 - Q'eqchi Bible

¹ Jo' li ratz'am ke sa' saq'ehil malaj li hab' sa' xq'ehil li q'olok, jo'kan ajwi' li loq'al: moko us ta naq nak'ehe'k re li maak'a' xna'leb'.

² Jo' li tz'unun ink'a' nahilank malaj li wilix naxik'ank chi junelik, jo'kan ajwi' li majewaak naq nachalk chi maak'a' xyaalal.

³ Aajel ru li tz'uum cho'q re li kawaay ut li ch'iich' sa' re li b'uur; jo'kan ajwi' aajel ru li che' cho'q re xyi rix li maak'a' xna'leb'.

⁴ Maasume ru li k'aru naxye li maak'a' xna'leb' re naq ink'a' tatkanaaq laa'at jo' a'an.

⁵ Tento taanaw xsumenkil li maak'a' xna'leb' re naq tixk'e reetal li xmajelal xna'leb'.

⁶ Wi taataqla junaq esil chirix li maak'a' xna'leb', a'an chanchan naq xaset laawoq ut xasik' aach'a'ajkilal.

⁷ Jo' naq li yeq roq ink'a' najt nawulak, jo'kan ajwi' li tusb'ileb' ru aatin cho'q re li maak'a' xna'leb'.

⁸ Moko na'leb' ta xb'ak'b'al li pek chiru li rant'in; jo'kan ajwi' xk'eeb'al xloq'al li maak'a' xna'leb'.

⁹ Li kalajenaq ink'a' nareek'a xtiq'om li k'ix; jo'kan ajwi' li uutz'u'ujinb'il aatin sa' re li maak'a' xna'leb'.

¹⁰ Li naxk'e xk'anjel li maak'a' xna'leb' sa' li rochoch, a'an chanchan laj yo li naxtiq' chixjunileb' li neke'nume'k.

¹¹ Jo' naq li tz'i' naxlow wi' chik sa' li xxa'aw, jo'kan ajwi' li maak'a' xna'leb' naq naxb'aanu wi' chik li maa'usilal.

¹² Toj naru xk'eeb'al xna'eleb'eb' li maak'a'eb' xna'leb'; ab'an jwal ch'a'aj xtenq'ankil junaq li naxk'oxla naq naxnaw chixjunil.

¹³ Naq laj q'em ink'a' naraj k'anjelak, naxye: “Wank jun kaqkoj sa' b'e li naraj inkamsinkil”, chan.

¹⁴ Li xtz'apb'al li okeb'aal naxsuri rib' sa' li k'ojk'o wi'; jo'kan ajwi' laj q'em naxtolk'osi rib' chiru li xch'aat.

¹⁵ Laj q'em naxch'ik li ruq' sa' li sek'; ab'an chi moko li tzekemq naxkuy xk'eeb'al sa' re.

¹⁶ Sa' xch'ool laj q'em naq q'axal wi' chik wank xna'leb' chiruheb' wuqub' chi winq aj k'ehol na'leb'.

¹⁷ Ani naxch'ik rib' sa' xraaxiik' jalan chik, a'an chanchan yo chi xchapb'al li xxik junaq tz'i'.

¹⁸ Jo' junaq kaan ru nakutuk simaj rik'in xam re kamsink,

¹⁹ jo'kan naxb'aanu li naxb'alaq'i li ramiiw, ut moqon chik naxye naq yal b'atz'unk re.

²⁰ Naq na'oso'k li si', nachupk li xam; ut naq na'so'k li tik'ti', nach'anaak li raaxiik'.

²¹ Si'ij ut si', a'an re xtz'ab'b'al li xam; ut li josq' aj winq, a'an nayoob'ank raaxiik'.

²² Li tik'ti'ik, a'an chanchan li saa'us: cham naxik wi', toj sa' xchamal li ch'oolej!

²³ Ch'och' uk'al uutz'u'ujinb'il rik'in plaat, jo'kan li q'unil aatin li naxye li ink'a' us xna'leb'.

²⁴ Li xik' na'ilok naxmuq li xna'leb' naq na'aatinak; ab'an sa' li xch'ool yo xk'uub'ankil li raaxiik'.

²⁵ Maapaab' naq tatraatina sa' q'unil aatin, xb'aan naq k'ajo' li maa'usilal wank sa' xch'ool.

²⁶ Us ta tixmuq li xlab'alil xch'ool, ab'an li xmaa'usilal taak'utunq chiruheb' chixjunileb' li poyanam.

²⁷ Li naxb'ek junaq jul, a'an ajwi' taat'ane'q chisa'; ut li natolk'osink pek, tixtaw li kamk rub'el a'an.

²⁸ Laj tik'ti' xik' naril li yaal; ut li na'aatinak rik'in li q'unil aatin naxjuk' chixjunil.